75 ఏళ్లుగా సాగులో ఉన్న భూమి.. కానీ రికార్డుల్లో చూస్తే! బయటపడ్డ 90 సెంట్ల భూ కబ్జా... అసైన్డ్ భూముల అక్రమ అమ్మకాలు!

• ఐదెకరాల భూమిని ఆక్రమించి కార్యాలయాల చుట్టూ తిప్పుతున్నారు.. రొంపిచర్ల మహిళ ఆక్రోశం!

• పింఛన్లు, రేషన్, వైద్య సహాయం కోసం భారీగా దరఖాస్తులు.. నిరుద్యోగుల ఉద్యోగ విజ్ఞప్తులు!

• పేదల సమస్యల సత్వర పరిష్కారానికి కృషి.. ప్రజా వేదికలో నేతల ప్రత్యేక చొరవ!

Mangalagiri: మంగళగిరిలోని తెలుగుదేశం పార్టీ కేంద్ర కార్యాలయంలో నిర్వహించిన ప్రజా వినతుల స్వీకరణ కార్యక్రమానికి రాష్ట్రంలోని వివిధ జిల్లాల నుంచి పెద్ద సంఖ్యలో బాధితులు తరలివచ్చారు. ఏపీ లిడ్ క్యాప్ ఛైర్మన్ పిల్లి మాణిక్యాలరావు, ఏపీ కుమ్మరి శాలివాహన వెల్ఫేర్ అండ్ డెవలప్‌మెంట్ కార్పొరేషన్ ఛైర్మన్ పేరేపి ఈశ్వర్ అర్జీలను నేరుగా స్వీకరించారు. భూ ఆక్రమణలు, రెవెన్యూ రికార్డుల అవకతవకలు, దౌర్జన్యాలు, పింఛన్లు, గృహ నిర్మాణాలు మరియు ఉపాధి అవకాశాలకు సంబంధించిన సమస్యలపై నేతలు ప్రత్యేకంగా దృష్టి సారించి, సంబంధిత అధికారులతో ఫోన్లలో మాట్లాడి తక్షణ పరిష్కారానికి ఆదేశించారు.

లీజు పేరుతో 90 సెంట్ల భూమి ఫోర్జరీ కబ్జా – కోనసీమ ఘటన

డాక్టర్ బి.ఆర్. అంబేద్కర్ కోనసీమ జిల్లా పి.గన్నవరం మండలం కారుపల్లిపాడు గ్రామానికి చెందిన రాంబాబు తన కుటుంబానికి జరిగిన అన్యాయంపై అర్జీ సమర్పించారు. సర్వే నెం. 9/1 లో తమ పూర్వీకుల నాటి 90 సెంట్ల భూమిని 1992లో పీచు ఫ్యాక్టరీ నడపడానికి ఆర్.ఏనుగుపల్లి గ్రామానికి చెందిన తోటకూర సత్యనారాయణ రాజుకు లీజుకు ఇచ్చామని తెలిపారు. లీజుదారుడు తమ కుటుంబ సభ్యుల ప్రమేయం లేకుండా, సంతకాలను ఫోర్జరీ చేసి ఆ మొత్తం 90 సెంట్ల స్థలాన్ని తన పేరిట అక్రమంగా రాయించుకుని కబ్జా చేశారని, అధికారులకు ఎన్నిసార్లు ఫిర్యాదు చేసినా ఫలితం లేకపోవడంతో నేతలను ఆశ్రయించి న్యాయం చేయాలని వేడుకున్నారు.

రియల్ ఎస్టేట్ కోసం సహజసిద్ధమైన వాగు పూడ్చివేత – ప్రకాశం జిల్లా వివాదం

ప్రకాశం జిల్లా నాగులుప్పలపాడు మండలం ఉప్పగుండూరు గ్రామానికి చెందిన నాగేశ్వరరావు రియల్ ఎస్టేట్ వ్యాపారి అక్రమాలపై ఫిర్యాదు చేశారు. గ్రామంలో దక్షిణ బజారు వైపు ప్రవహించే సహజసిద్ధమైన నాగన్న వాగు పక్కన పట్టా భూమి కొనుగోలు చేసిన ఒక వ్యాపారి, తన వెంచర్ విస్తరణ కోసం వాగును మట్టితో పూడ్చివేశారని వాపోయారు. పాత వాగును పూడ్చి పక్కనే ఉన్న ప్రభుత్వ డి.కె. భూమిలో కొత్తగా ఇష్టారాజ్యంగా వాగు తవ్వడం వల్ల వర్షాకాలంలో గ్రామంలోకి వరద నీరు ముంచెత్తే ప్రమాదం ఉందని తెలిపారు. ఆర్డీవో ఆదేశాల మేరకు జిల్లా సర్వేయర్ వచ్చి పనులు ఆపాలని ఆదేశించినా రాత్రి వేళల్లో దౌర్జన్యంగా పనులు కొనసాగిస్తున్నారని, తక్షణమే రక్షణ కల్పించాలని కోరారు.

75 ఏళ్లుగా సాగులో ఉన్న 6 ఎకరాలు.. రికార్డుల్లో వేరొకరి పేర్లు – మాచర్ల రైతుల ఆవేదన

పల్నాడు జిల్లా మాచర్ల మండలం కొత్తూరు గ్రామానికి చెందిన లక్ష్మణ్ నాయక్ తమ వారసత్వ భూమి రికార్డుల అవకతవకలపై మొరపెట్టుకున్నారు. సర్వే నంబర్లు 461/1, 461/2 లోని మొత్తం 6.00 ఎకరాల భూమిలో గత 75 సంవత్సరాలుగా తమ కుటుంబం సాగు చేసుకుంటూ జీవిస్తోందని వివరించారు. క్షేత్రస్థాయిలో భూమి తమ ఆధీనంలో ఉన్నప్పటికీ, రెవెన్యూ రికార్డుల్లో హైదరాబాద్‌కు చెందిన వ్యక్తుల పేర్లను అక్రమంగా నమోదు చేశారని ఆరోపించారు. స్థానిక అధికారుల చుట్టూ తిరిగినా సమస్య పరిష్కారం కాకపోవడంతో రికార్డులను సరిచేసి తమ పేర్లను ఎక్కించాలని విజ్ఞప్తి చేశారు.

సర్వేలను అడ్డుకుంటూ కర్రలతో భౌతిక దాడులు – దళిత భూముల ఆక్రమణలు

ప్రకాశం జిల్లా తాళ్లూరు మండలం మాధవరంలో తమ మాగాణి భూమి హద్దులను నిర్ధారించేందుకు వచ్చిన రెవెన్యూ సర్వేయర్లను కొందరు స్థానికులు బెదిరించి వెనక్కి పంపడంతో పాటు, తమపై కర్రలతో భౌతిక దాడులకు దిగుతున్నారని కె. సుబ్బారావు ఫిర్యాదు చేశారు. మరోవైపు ఏలూరు జిల్లా కామవరపుకోట మండలం కొండగూడెం గ్రామంలో పేద దళితులకు కేటాయించిన అసైన్డ్ భూములను సంపన్నులు చట్టవిరుద్ధంగా ఆక్రమించి, అక్రమ అమ్మకాలు మరియు మ్యుటేషన్లు చేసుకున్నారని కరిపోతు కృష్ణ వాపోయారు. అలాగే పల్నాడు జిల్లా తుంగపాడుకు చెందిన బండారి చిట్టెమ్మ తమ 5 ఎకరాల జీవనాధార భూమిని ఆక్రమించారని, మూడేళ్లుగా రెవెన్యూ అధికారులు కాలయాపన చేస్తూ అన్యాయం చేస్తున్నారని కన్నీటిపర్యంతమయ్యారు.

సామాజిక, ఆర్థిక సమస్యల పరిష్కారానికి కార్యాచరణ

భూ వివాదాలతో పాటు పలువురు వృద్ధులు, వికలాంగులు పింఛన్లు, రేషన్ కార్డులు, ఇళ్ల నిర్మాణాలకు సంబంధించిన సమస్యలపై అర్జీలను సమర్పించారు. అనారోగ్య సమస్యలతో బాధపడుతున్న నిరుపేదలు వైద్య ఖర్చుల నిమిత్తం ఆర్థిక సహాయం అందించాలని కోరగా, చదువుకున్న నిరుద్యోగ యువకులు ఉద్యోగాల కోసం రెజ్యూమ్‌లు అందజేశారు. ప్రజా వేదిక ద్వారా అందిన ప్రతి అర్జీని సంబంధిత జిల్లా కలెక్టర్లు, పోలీస్ ఉన్నతాధికారులకు పంపి, బాధితులకు సత్వర న్యాయం జరిగేలా చర్యలు తీసుకుంటామని ఛైర్మన్లు పిల్లి మాణిక్యాలరావు, పేరేపి ఈశ్వర్ హామీ ఇచ్చారు.