Telangana News Telugu: తెలంగాణ రాజకీయాల్లో తనకంటూ ఒక ప్రత్యేక గుర్తింపు తెచ్చుకున్న మాజీ మంత్రి, మేడ్చల్ ఎమ్మెల్యే చామకూర మల్లారెడ్డి మరోసారి వార్తల్లో నిలిచారు. అసెంబ్లీ బడ్జెట్ సమావేశాల సందర్భంగా లాబీల్లో మీడియా ప్రతినిధులతో ముచ్చటించిన ఆయన, తనదైన శైలిలో పంచ్లు విసురుతూ అందరినీ నవ్వించారు. సోషల్ మీడియాలో తనకున్న క్రేజ్ గురించి మాట్లాడుతూ, ప్రస్తుతం రాష్ట్రంలో తనకంటే పెద్ద "ట్రెండింగ్ స్టార్" ఎవరూ లేరని ధీమా వ్యక్తం చేశారు.
సాధారణంగా రాజకీయ నాయకులు సీరియస్ చర్చల్లో మునిగిపోతుంటారు. కానీ మల్లారెడ్డి రూటే వేరు. ఇటీవల తన 50వ పెళ్లి రోజు వేడుకల్లో ఆయన వేసిన స్టెప్పులు నెట్టింట ఎంతలా వైరల్ అయ్యాయో అందరికీ తెలిసిందే. దీనిపై స్పందిస్తూ, "ఇప్పుడు నేనే ట్రెండింగ్ స్టార్ను.. అసలు సోషల్ మీడియాను ప్రమోట్ చేస్తోంది నేనే కదా! అంటూ చమత్కరించారు. తన వీడియోలు చూసి జనం ఎంజాయ్ చేస్తున్నారని, అది తనకు సంతోషాన్ని ఇస్తుందని చెప్పుకొచ్చారు.
ఇక సినిమాల్లో నటించే ఆలోచన ఉందా అన్న ప్రశ్నకు మల్లారెడ్డి మాస్ సమాధానం ఇచ్చారు... నాకు ఎవరో ఛాన్స్ ఇవ్వడం ఏంటి? నేనే ఒక స్టార్ను. నాకు సినిమా చేయాలనిపిస్తే.. ఎవరి కోసమో వెయిట్ చేయను. నేనే సొంతంగా సినిమా తీసి, అందులో హీరోగా నటిస్తా" అని ప్రకటించారు. మల్లారెడ్డి కాన్ఫిడెన్స్ చూసి అక్కడ ఉన్న వారంతా ఒక్కసారిగా ఆశ్చర్యపోయారు. ఆయన ఎనర్జీ చూస్తుంటే త్వరలోనే వెండితెరపై మల్లారెడ్డి మార్క్ యాక్షన్ చూడవచ్చని నెటిజన్లు కామెంట్స్ చేస్తున్నారు.
గత కొద్ది రోజులుగా మల్లారెడ్డి బీఆర్ఎస్ (BRS) వీడి కాంగ్రెస్లో చేరుతారంటూ జోరుగా ప్రచారం జరుగుతోంది. ముఖ్యంగా కర్ణాటక డిప్యూటీ సీఎం శివకుమార్తో ఆయన భేటీ కావడమే ఇందుకు కారణమని టాక్ నడిచింది. అయితే ఈ ప్రచారాన్ని మల్లారెడ్డి తీవ్రంగా ఖండించారు. "నాకు 73 ఏళ్లు.. ఏ నిర్ణయం ఎప్పుడు తీసుకోవాలో నాకు బాగా తెలుసు. ఎవడైనా మునిగిపోయే పడవ ఎక్కుతాడా? కాంగ్రెస్ పార్టీ ఇప్పుడు అలాంటిదే. రేవంత్ రెడ్డి ఎన్ని చెప్పినా, అది మునిగిపోయే నావ మాత్రమే" అని విమర్శించారు.
తను పార్టీ మారుతున్నట్లు వస్తున్న వార్తల్లో నిజం లేదని తేల్చిచెప్పిన ఆయన, క్షేత్రస్థాయిలో ఏ పార్టీ బలంగా ఉందో ప్రజలకు తెలుసని అన్నారు. ఇదే సమయంలో ఆయన కోడలు ప్రీతి రెడ్డి కూడా త్వరలోనే యాక్టివ్ పాలిటిక్స్లోకి వస్తారని వస్తున్న వార్తలపై రాజకీయ వర్గాల్లో ఆసక్తి నెలకొంది. మొత్తానికి తన రాజకీయ వ్యూహాలతో పాటు, ఎంటర్టైన్మెంట్ విషయంలోనూ మల్లారెడ్డి మల్టీ టాలెంటెడ్ అని మరోసారి నిరూపించుకున్నారు.
