Nara Lokesh: జగన్‌కు భాస్కర్ అవార్డు ఇవ్వొచ్చు.. 'రప్పారప్పా' అన్నది మీరే కదా: నారా లోకేశ్ కౌంటర్ అటాక్..

• Politics: వైసీపీకి తాను గొడ్డలి పార్టీ అని పేరు పెడితే జగన్ బాగా ఫీల్ అయ్యారన్న లోకేశ్… 
   
• కూటమి పార్టీల మధ్య చిచ్చు పెట్టేందుకు సైకోలు కుట్రలు చేస్తున్నారని మండిపాటు..

Nara Lokesh: ఆంధ్రప్రదేశ్ రాజకీయాల్లో ‘గొడ్డలి పార్టీ’, ‘హత్యా రాజకీయాలు’ అనే అంశాలపై అధికార కూటమి, ప్రతిపక్ష వైఎస్సార్ కాంగ్రెస్ పార్టీల మధ్య మాటల యుద్ధం ఉత్కంఠభరితంగా పీక్స్‌కు చేరింది. నిన్న వైసీపీ అధినేత వైఎస్ జగన్‌మోహన్ రెడ్డి ప్రెస్‌మీట్ పెట్టి ముఖ్యమంత్రి చంద్రబాబు నాయుడుపై చేసిన సంచలన ఆరోపణలకు, నేడు కడపలో జరిగిన తెలుగుదేశం పార్టీ కార్యకర్తల విస్తృత స్థాయి సమన్వయ సమావేశంలో రాష్ట్ర మంత్రి నారా లోకేశ్ అత్యంత ఘాటుగా కౌంటర్ ఇచ్చారు. తాము వైఎస్సార్ కాంగ్రెస్ పార్టీకి కొత్తగా 'గొడ్డలి పార్టీ' అని నామకరణం చేస్తే జగన్ తీవ్రంగా ఫీల్ అయ్యారని లోకేశ్ ఎద్దేవా చేశారు. గతంలో థియేటర్లలో 'రప్పారప్పా' అంటూ గన్ కల్చర్‌ను, ఫ్యాక్షనిజాన్ని సమర్థించింది మీ కుటుంబ సభ్యులే కాదా అంటూ ఈ సందర్భంగా ఆయన నిలదీశారు. గత ఐదేళ్లుగా జగన్ రాష్ట్ర ప్రజలకు అరాచకపు సినిమా చూపించారని, ఇప్పుడు దానికి సంపూర్ణంగా ఎండ్ కార్డ్ వేసే బాధ్యత పసుపు సైనికులే తీసుకుంటారని లోకేశ్ స్పష్టం చేశారు.

ఇటీవల కడపలో జరిగిన రియల్ ఎస్టేట్ వ్యాపారి పెద్ద దస్తగిరి దారుణ హత్య ఉదంతాన్ని ప్రస్తావిస్తూ నారా లోకేశ్ సంచలన వ్యాఖ్యలు చేశారు. పెద్ద దస్తగిరిని అత్యంత కిరాతకంగా చంపేసింది జగన్ మేనమామేనని, కానీ ఆ తప్పును దాచిపెట్టి తిరిగి తామేదో అన్యాయం చేసినట్లు తమ కూటమి ప్రభుత్వంపై, కార్యకర్తలపై కేసులు పెడతామని బెదిరించడం హాస్యాస్పదంగా ఉందని మండిపడ్డారు. జగన్ నిత్యం చెప్పే అబద్ధాలు, చేసే మోసాలు చూస్తుంటే ఆయనకు గిన్నిస్ బుక్ తరహాలో 'చీటింగ్ బుక్ ఆఫ్ వరల్డ్ రికార్డ్స్' అనే ప్రత్యేక అవార్డు ఇవ్వొచ్చని తీవ్రస్థాయిలో ధ్వజమెత్తారు. ప్రజల ముందుకు వస్తే ఎంతో ఆప్యాయంగా ముద్దులు పెట్టడం, తీరా లోపలికి వెళ్తే వెన్నుపోటు పొడవడం జగన్ నైజమని విమర్శించారు. ఆయన చేసే ఈ అద్భుతమైన నటనకు ప్రపంచ ప్రఖ్యాతి గాంచిన ఆస్కార్ అవార్డు కాదు కానీ, 'భాస్కర్ అవార్డు' మాత్రం ఖచ్చితంగా గ్యారంటీ అంటూ తీవ్ర వ్యంగ్యాస్త్రాలు సంధించారు.

రాష్ట్రంలో అధికారంలో ఉన్న కూటమి ప్రభుత్వం (టీడీపీ, జనసేన, బీజేపీ) మధ్య ఎలాగైనా చిచ్చు పెట్టాలని వైసీపీకి చెందిన సైకోలు రకరకాల కుట్రలు పన్నుతున్నారని లోకేశ్ ఆగ్రహం వ్యక్తం చేశారు. రాయలసీమ ప్రాంత అభివృద్ధిని కుంటుపరిచి, ఫ్యాక్షన్ అరాచకాలతో ఆ ప్రాంతానికి పట్టిన ఒక 'క్యాన్సర్ గడ్డ' జగన్మోహన్ రెడ్డి అని తీవ్ర ఆరోపణలు చేశారు. అధికారం కోసం సొంత తల్లిని, చెల్లిని కూడా చూడకుండా రాష్ట్రం దాటి తరిమేశారని, సొంత బాబాయ్‌ని లేపేసి మరో చెల్లి కుటుంబానికి తీరని అన్యాయం చేశారని మండిపడ్డారు. గత 2019 ఎన్నికల ముందు వివేకానందరెడ్డి చనిపోతే మొదట గుండెపోటు అని కథలు చెప్పారని, ఆ తర్వాత గొడ్డలివేటు అసలు నిజం బయటకు వచ్చిందని గుర్తుచేశారు. ఆ వెంటనే సొంత సాక్షి పేపరులో 'నారాసుర రక్తచరిత్ర' అని కథనాలు రాసి, చంద్రబాబు చేతిలో కత్తి ఉన్నట్లు గ్రాఫిక్స్ ఫొటోలు వేసి నీచమైన రాజకీయం చేసింది నిజం కాదా అని ప్రశ్నించారు. జగన్ ఎంతటి మోసగాడో, ఆయన క్రిమినల్ బ్రెయిన్ ఎలాంటిదో సొంత కడప జిల్లా ప్రజలతో పాటు యావత్ ఆంధ్రప్రదేశ్ సమాజానికి క్లియర్‌గా అర్థమైందని లోకేశ్ వ్యాఖ్యానించారు.