తెలంగాణ క్యాబినెట్ ప్రక్షాళనకు రంగం సిద్ధం..
కొందరు మంత్రుల శాఖల్లో మార్పులు, చేర్పులు..
తెలంగాణ రాజకీయాల్లో మరో కీలక పరిణామానికి రంగం సిద్ధమైంది. రాష్ట్ర క్యాబినెట్లో ప్రక్షాళన చేపట్టేందుకు ప్రభుత్వం కసరత్తులు ప్రారంభించినట్లు సమాచారం. ఇప్పటికే ఖాళీగా ఉన్న రెండు మంత్రి పదవులను భర్తీ చేయడానికి చర్యలు వేగవంతం అవుతున్నాయి.
ప్రభుత్వం ఏర్పడి రెండున్నరేళ్లు పూర్తవుతున్న నేపథ్యంలో, పాలనను మరింత సమర్థవంతంగా ముందుకు తీసుకెళ్లేందుకు ఈ మార్పులు అవసరమని భావిస్తున్నట్లు తెలుస్తోంది. ముఖ్యంగా మంత్రుల పనితీరు ఆధారంగా శాఖల్లో మార్పులు, చేర్పులు చేపట్టే అవకాశం ఉంది.
కొంతమంది మంత్రులకు ఉద్వాసన పలికే అవకాశమున్నట్లు రాజకీయ వర్గాల్లో చర్చ జరుగుతోంది. అదే సమయంలో, కొందరికి కీలక శాఖలు అప్పగిస్తూ బాధ్యతలను పునర్వ్యవస్థీకరించనున్నారని సమాచారం. ముఖ్యమంత్రి రేవంత్ రెడ్డి తీసుకునే ఈ నిర్ణయాలకు పార్టీ అధిష్టానం గ్రీన్ సిగ్నల్ ఇచ్చినట్లు తెలుస్తోంది. దీంతో క్యాబినెట్ మార్పులు ఖరారు కావడం దాదాపు నిశ్చయంగా కనిపిస్తోంది.
వచ్చే వారంలోనే క్యాబినెట్ ప్రక్షాళన చేపట్టాలని సీఎం రేవంత్ యోచిస్తున్నారని సమాచారం. ఈ మార్పులతో ప్రభుత్వం మరింత చురుకుగా పనిచేస్తుందని పార్టీ వర్గాలు భావిస్తున్నాయి. తెలంగాణలో జరగబోయే ఈ క్యాబినెట్ మార్పులు రాష్ట్ర రాజకీయాల్లో కొత్త చర్చలకు దారితీసే అవకాశం ఉంది.
