Google: విశాఖలో గూగుల్ డేటా సెంటర్.. ఏపీకి ఆర్థిక ఊపు.. -మంత్రి బీసీ జనార్థన్ రెడ్డి!

రూ.1.35 లక్షల కోట్ల పెట్టుబడి.. ఏపీలో ఉద్యోగాల విప్లవం..

గూగుల్ రాకతో గ్లోబల్ మ్యాప్‌లో విశాఖ ప్రత్యేక స్థానం..

అమరావతి: విశాఖపట్నంలో గూగుల్ డేటా సెంటర్ ఏర్పాటు నిర్ణయంపై రాష్ట్ర పెట్టుబడులు, మౌలిక సదుపాయాల శాఖ మంత్రి బీసీ జనార్ధన్ రెడ్డి హర్షం వ్యక్తం చేశారు. ఈ ప్రాజెక్ట్ వల్ల విశాఖతో పాటు మొత్తం ఆంధ్రప్రదేశ్ రాష్ట్రానికి గౌరవం పెరిగిందని ఆయన తెలిపారు.

గూగుల్ డేటా సెంటర్ ద్వారా సుమారు రూ.1.35 లక్షల కోట్ల పెట్టుబడులు రావడం రాష్ట్ర ఆర్థిక వ్యవస్థకు కొత్త ఊపును తీసుకురానుందని మంత్రి పేర్కొన్నారు. అంతేకాకుండా, ఈ ప్రాజెక్ట్ ద్వారా దాదాపు 1.80 లక్షల ఉద్యోగాలు సృష్టించబడే అవకాశముందని ఆయన వివరించారు. ఇది యువతకు పెద్ద స్థాయిలో ఉపాధి అవకాశాలను కల్పిస్తుందని చెప్పారు.

ఈ స్థాయి ప్రతిష్టాత్మక సంస్థ విశాఖను ఎంపిక చేయడానికి ముఖ్య కారణం ముఖ్యమంత్రి నారా చంద్రబాబు నాయుడు పై ప్రపంచ పెట్టుబడిదారులకు ఉన్న విశ్వాసమేనని మంత్రి అభిప్రాయపడ్డారు. అలాగే ఐటీ శాఖ మంత్రి నారా లోకేష్ కృషి, అంకితభావం కూడా ఈ ప్రాజెక్ట్ విజయానికి కారణమయ్యాయని చెప్పారు.

గూగుల్ రాకతో విశాఖ నగరం ప్రపంచ పటంలో ప్రత్యేక స్థానం సంపాదించిందని, ఇది రాష్ట్రానికి గర్వకారణమని ఆయన అన్నారు. గతంలో జరిగిన భూకబ్జాల వల్ల విశాఖ బ్రాండ్ ఇమేజ్ దెబ్బతిన్నప్పటికీ, ఇప్పుడు గూగుల్ వంటి అంతర్జాతీయ సంస్థలతో విశాఖను మళ్లీ గ్లోబల్ సిటీగా తీర్చిదిద్దుతున్నామని మంత్రి స్పష్టం చేశారు.

ఈ అభివృద్ధి కార్యక్రమాలు రాష్ట్ర భవిష్యత్తును మరింత బలపరుస్తాయని, పెట్టుబడులు, ఉద్యోగాల పెరుగుదలతో ప్రజల జీవన ప్రమాణాలు మెరుగుపడతాయని ఆయన విశ్వాసం వ్యక్తం చేశారు.