Chandrababu Naidu: తప్పు చేస్తే నా వాడైనా వదిలేది లేదు.. గుంటూరు ఘటనపై చంద్రబాబు సంచలన నిర్ణయం!

• గుంటూరు జిల్లాలో మహిళను వివస్త్రను చేసి దాడి చేసిన ఘటన..
  
  
• మహిళలపై దాడి చేస్తే ఉపేక్షించేది లేదని చంద్రబాబు హెచ్చరిక..

Chandrababu Naidu: ఆంధ్రప్రదేశ్ గుంటూరు జిల్లాలో (Guntur District) ఒక మహిళపై జరిగిన అత్యంత అమానుషమైన దాడి ఘటన రాష్ట్రవ్యాప్తంగా తీవ్ర కలకలం రేపింది. ఈ దారుణ ఉదంతంపై ఆంధ్రప్రదేశ్ ముఖ్యమంత్రి నారా చంద్రబాబు నాయుడు (CM Chandrababu Naidu) అత్యంత తీవ్రంగా స్పందించారు. నడిరోడ్డుపై మహిళను వివస్త్రను చేసి, పిడిగుద్దులతో దాడి చేసిన ఘటన తనను తీవ్రంగా కలచివేసిందని ఆయన ఆవేదన వ్యక్తం చేశారు. తప్పు చేసిన వారు ఎంతటి వారైనా, వారికి ఎలాంటి పొలిటికల్ బ్యాక్‌గ్రౌండ్ ఉన్నా సరే ఉపేక్షించే ప్రసక్తే లేదని సోషల్ మీడియా వేదికగా సీఎం కరాఖండిగా తేల్చి చెప్పారు.

వైరల్ వీడియోతో రంగంలోకి పోలీసులు.. నిందితుల అరెస్ట్..
ఈ ఘోరానికి సంబంధించిన వివరాలు సమాజంలో ప్రతి ఒక్కరినీ తలదించుకునేలా చేస్తున్నాయి. గుంటూరు జిల్లాలో అందరూ చూస్తుండగానే నడిరోడ్డుపై సదరు మహిళను వివస్త్రను చేసి, పిడిగుద్దులతో కిరాతకంగా దాడి చేశారు. అనంతరం నిందితులు అక్కడి నుంచి పరారయ్యారు. సమాజంలో అవమానం, భయంతో బాధితురాలు పోలీస్ స్టేషన్‌లో ఫిర్యాదు చేయడానికి మొదట వెనకడుగు వేసింది. అయితే, ఈ అనాగరిక దాడికి సంబంధించిన భయానక వీడియో సోషల్ మీడియాలో విపరీతంగా వైరల్ కావడంతో పోలీసులు తక్షణమే స్పందించారు. సుమోటోగా కేసు నమోదు చేసుకొని దర్యాప్తును వేగవంతం చేశారు. ఈ దారుణానికి ఒడిగట్టిన ప్రధాన నిందితుడు మూర్తితో పాటు దాడిలో పాల్గొన్న మిగిలిన వారందరినీ పోలీసులు రౌండప్ చేసి అరెస్ట్ చేశారు.

సొంత పార్టీ నేతపై వేటు.. చంద్రబాబు సంచలన నిర్ణయం..
ప్రధాన నిందితుడు మూర్తి అధికార అధికార తెలుగుదేశం పార్టీకి (TDP) చెందిన వ్యక్తి అని నిర్ధారణ కావడంతో ముఖ్యమంత్రి చంద్రబాబు నాయుడు ఏమాత్రం వెనుకాడలేదు. తప్పు చేసిన వాడు తన పార్టీ వాడైనా సరే వదిలేది లేదని నిరూపిస్తూ.. మూర్తిని పార్టీ ప్రాథమిక సభ్యత్వం నుంచి తక్షణమే సస్పెండ్ (Suspended from TDP) చేస్తూ సంచలన ఆదేశాలు జారీ చేశారు. "రాజకీయ పార్టీలతో అనుబంధం ఉందనే నెపంతో తప్పు చేసి చట్టం నుంచి తప్పించుకోవచ్చని చూస్తే కుదరదు. నేరస్థులకు ప్రభుత్వం తరఫున ఎలాంటి రక్షణ లభించదు. ఎటువంటి భయం, పక్షపాతం లేకుండా చట్టాన్ని నిష్పక్షపాతంగా అమలు చేయడమే మా ప్రభుత్వ ఏకైక విధానం" అని చంద్రబాబు స్పష్టం చేశారు.

మహిళల భద్రతకు కూటమి ప్రభుత్వం అండ..
సమాజంలో ఏ మహిళను అవమానించినా, వారిపై దాడులకు తెగబడినా అది ఎంతమాత్రం ఆమోదయోగ్యం కాదని, ఇలాంటి అనాగరిక చర్యలకు నూతన సమాజంలో చోటు లేదని ముఖ్యమంత్రి మండిపడ్డారు. ఆంధ్రప్రదేశ్‌లోని ప్రతి మహిళకు తమ గౌరవానికి, భద్రతకు కూటమి ప్రభుత్వం ఎల్లప్పుడూ అండగా ఉంటుందని భరోసా ఇచ్చారు. రాష్ట్రంలో మహిళలు పూర్తి ధీమాతో, రక్షణతో బతకాలన్నదే తమ ప్రభుత్వ ప్రధాన ఆశయమని చంద్రబాబు నాయుడు ఈ సందర్భంగా స్పష్టం చేశారు. ఈ కేసును ఫాస్ట్ ట్రాక్ కోర్టు ద్వారా విచారించి, నిందితులకు అత్యంత కఠినమైన శిక్ష పడేలా చూడాలని ఆయన ఉన్నతాధికారులను ఆదేశించారు.