అమెరికాలో స్థిరపడాలని, అక్కడి శాశ్వత పౌరసత్వం (Green Card) పొందాలని ప్రతి ఏటా లక్షలాది మంది వలసదారులు ప్రయత్నిస్తుంటారు. ఇందుకోసం చాలా మంది ఎంచుకునే సులభమైన మార్గం.. అమెరికా పౌరుడిని వివాహం చేసుకోవడం. అయితే, ఇకపై ఈ 'షార్ట్కట్' పద్ధతి పనికిరాకపోవచ్చు. గ్రీన్ కార్డ్ కోసం కేవలం వివాహ ధృవీకరణ పత్రం (Marriage Certificate) ఉంటే సరిపోదని, అమెరికా ఇమ్మిగ్రేషన్ విభాగం నిబంధనలను అత్యంత కఠినతరం చేస్తోంది.
అమెరికా ఇమ్మిగ్రేషన్ అటార్నీ జనరల్ బ్రాడ్ బెర్న్స్టీన్ చేసిన తాజా వ్యాఖ్యలు ఇప్పుడు వలసదారుల్లో ఆందోళన కలిగిస్తున్నాయి. దీనికి సంబంధించిన పూర్తి వివరాలు ఇప్పుడు చూద్దాం. చాలా మంది విదేశీయులు అమెరికాలో ఉండటానికి అక్కడి పౌరులను నామమాత్రంగా వివాహం చేసుకుని డాక్యుమెంట్లు సృష్టిస్తుంటారు. దీనిపై బెర్న్స్టీన్ స్పష్టమైన హెచ్చరిక జారీ చేశారు.
"అమెరికా పౌరుడిని వివాహం చేసుకుంటే గ్రీన్ కార్డ్ దక్కుతుందని ఎటువంటి గ్యారెంటీ లేదు. వివాహం అనేది కేవలం కలిసి జీవించడానికి ఒక అనుమతి మాత్రమే, అది పౌరసత్వానికి టికెట్ కాదు" అని ఆయన తేల్చి చెప్పారు. వివాహం చేసుకున్న వ్యక్తిని అమెరికా పౌరుడికి అత్యంత సన్నిహిత బంధువుగా మాత్రమే గుర్తిస్తాం తప్ప, నేరుగా గ్రీన్ కార్డ్ ఇవ్వబోమని స్పష్టం చేశారు.
గ్రీన్ కార్డ్ కోసం దరఖాస్తు చేసుకున్న దంపతుల మధ్య నిజమైన అనుబంధం ఉందా లేదా అనే అంశాన్ని అమెరికా ప్రభుత్వం క్షుణ్ణంగా పరిశీలించబోతోంది. దంపతులు ప్రతిరోజూ ఒకే ఇంట్లో కలిసి నివసించకపోతే, ఆ వివాహాన్ని కేవలం డాక్యుమెంట్ల కోసమే చేసుకున్న 'ఫేక్ మ్యారేజ్'గా భావిస్తారు. దంపతులు ఉద్యోగ రీత్యానో లేదా ఇతర కారణాల వల్లనో విడివిడిగా ఉంటున్నామని చెబితే అధికారులు ఒప్పుకోరు. విడివిడిగా ఉండటానికి గల కారణాలు తమకు అవసరం లేదని, దంపతులుగా నిజంగా కలిసి జీవిస్తున్నారా? లేదా? అనేదే తమకు ముఖ్యమని బెర్న్స్టీన్ వివరించారు.
ఎవరైనా విడివిడిగా నివసిస్తున్నట్లు తెలిస్తే, వారి దరఖాస్తులను మరింత లోతుగా విచారిస్తారు. అనుమానం వస్తే వెంటనే గ్రీన్ కార్డ్ దరఖాస్తును తిరస్కరిస్తారు. గ్రీన్ కార్డ్ దరఖాస్తుదారులకు మరో గట్టి ఎదురుదెబ్బ తగిలింది. గతంలో గ్రీన్ కార్డ్ ప్రక్రియలో ఉన్నవారికి ఇచ్చే వర్క్ పర్మిట్ (Work Permit) ఐదేళ్ల పాటు చెల్లుబాటు అయ్యేది. కానీ ఇప్పుడు దానిని కేవలం 18 నెలలకు తగ్గించారు. దీనివల్ల వలసదారులు ప్రతి ఏడాదిన్నరకోసారి రెన్యూవల్ చేసుకోవాల్సిన పరిస్థితి ఏర్పడుతుంది.
ఇప్పటికే అమెరికా ప్రభుత్వం డైవర్సిటీ వీసా లాటరీని రద్దు చేసిన విషయాన్ని కూడా అధికారులు గుర్తు చేస్తున్నారు. అమెరికాలో అక్రమ వలసలను అరికట్టడానికి ట్రంప్ ప్రభుత్వం యుద్ధ ప్రాతిపదికన చర్యలు తీసుకుంటోంది. వివాహాల ఆధారంగా వచ్చే గ్రీన్ కార్డుల విషయంలో నిబంధనలను పక్కాగా అమలు చేయాలని నిర్ణయించారు.
వివాహం ద్వారా గ్రీన్ కార్డ్ కోసం ప్రయత్నించే వారు ముందే చట్టపరమైన సలహాలు తీసుకోవాలని బెర్న్స్టీన్ సూచించారు. లేదంటే చిన్న పొరపాటు జరిగినా దేశం నుంచి బహిష్కరించబడే (Deportation) ప్రమాదం ఉంది.
అమెరికాలో గ్రీన్ కార్డ్ పొందడం ఇప్పుడు ఒక సవాలుగా మారింది. కేవలం కాగితాల మీద పెళ్లి చూపించి అగ్రరాజ్యంలో స్థిరపడదామనుకునే వారికి ఇకపై కష్టాలు తప్పవు. నిజమైన బంధం ఉండి, దంపతులుగా కలిసి ఉండేవారికి మాత్రమే అమెరికాలో చోటు ఉంటుందని ఈ తాజా మార్పులు స్పష్టం చేస్తున్నాయి.
