అప్పుచేసి పప్పుకూడు తింటున్న అమెరికా! $40 ట్రిలియన్ సంక్షోభ ఊబిలో..
US Debt Crisis: ప్రపంచంలోనే అతిపెద్ద ఆర్థిక వ్యవస్థ అయిన అమెరికా రికార్డు స్థాయిలో 40 ట్రిలియన్ డాలర్ల (సుమారు రూ. 3,500 లక్షల కోట్లు) అప్పుల ఊబిలో కూరుకుపోయింది. యుద్ధాలు, కోవిడ్ ఉద్దీపనలు, పన్నుల కోతల వల్ల పెరిగిన ఈ అప్పులకు చెల్లించే వార్షిక వడ్డీ భారం ఏకంగా 1 ట్రిలియన్ డాలర్లను దాటి ఆ దేశ రక్షణ బడ్జెట్‌ను మించిపోయింది. పాత అప్పులు తీర్చడానికి అధిక వడ్డీతో కొత్త అప్పులు చేస్తుండటంతో పాటు, చైనా, భారత్ వంటి దేశాలు ట్రెజరీ బాండ్లలో పెట్టుబడులను తగ్గిస్తున్నాయి. ఈ సంక్షోభం వల్ల అంతర్జాతీయ మార్కెట్లలో డాలర్ ఒత్తిడి పెరిగి, భారత రూపాయి క్షీణత, చమురు దిగుమతుల భారం, ద్రవ్యోల్బణానికి దారితీసే ప్రమాదం ఉందని విశ్లేషకులు అభిప్రాయపడుతున్నారు.
పాత అప్పు కట్టేందుకు కొత్త అప్పులు.. క్రెడిట్ కార్డ్ ఉచ్చులా మారిన అగ్రరాజ్యం ఆర్థిక వ్యవస్థ!
డాలర్ బాండ్లను తగ్గిస్తున్న చైనా, భారత్.. ప్రైవేట్ ఇన్వెస్టర్లపై పెరుగుతున్న ఆధారపడటం!
గూగుల్, మైక్రోసాఫ్ట్ ఏఐ రేసుతో పోటీ.. అమెరికా ప్రభుత్వానికి పెరిగిన వడ్డీ భారం!
NRI: ప్రపంచంలోనే అత్యంత సంపన్న దేశం, శక్తివంతమైన సైన్యం కలిగిన అగ్రరాజ్యం అమెరికా ప్రస్తుతం కనీవినీ ఎరుగని రుణ సంక్షోభాన్ని ఎదుర్కొంటోంది. అమెరికా మొత్తం రుణం రికార్డు స్థాయిలో 40 ట్రిలియన్ డాలర్లను దాటిపోయింది. భారతీయ కరెన్సీలో ఇది దాదాపు రూ. 3,500 లక్షల కోట్లకు సమానం. చైనా, జర్మనీ, బ్రిటన్, భారత్ వంటి ప్రధాన దేశాల సంయుక్త జీడీపీ కంటే కూడా ఈ అప్పు ఎక్కువగా ఉండటం గమనార్హం. ఒకప్పుడు మొదటి 1 ట్రిలియన్ డాలర్ల అప్పు చేరడానికి 200 సంవత్సరాలు పడితే, ప్రస్తుతం కేవలం ప్రతి ఐదు నెలల వ్యవధిలోనే 1 ట్రిలియన్ డాలర్ అప్పు పెరిగిపోతుండటం తీవ్ర కలకలం రేపుతోంది.
అప్పు ఇంత భారీగా ఎలా పెరిగింది?
2001 సమయంలో అమెరికా అప్పు కేవలం 6 ట్రిలియన్ డాలర్లుగా ఉండేది. అప్పట్లో ప్రభుత్వం వద్ద మిగులు ఆదాయం (సర్ప్లస్) ఉండగా, పన్నుల కోతలు ప్రవేశపెట్టారు. సరిగ్గా అదే సమయంలో 9/11 దాడులు జరగడం, దాని వెనుకే ఆఫ్ఘనిస్తాన్, ఇరాక్ యుద్ధాల కారణంగా ప్రభుత్వానికి రక్షణ ఖర్చులు ఊహించని రీతిలో పెరిగిపోయాయి. ఆదాయం తగ్గడం, యుద్ధాల ఖర్చు పెరగడంతో అప్పుల పరంపర మొదలైంది. ఆ తర్వాత 2008 నాటి ప్రపంచ ఆర్థిక మాంద్యం, ఇటీవల వచ్చిన కోవిడ్ సంక్షోభం సమయంలో ఉద్దీపన ప్యాకేజీల పేరిట ట్రిలియన్ల డాలర్ల అప్పులు చేయడంతో, అప్పు-జీడీపీ నిష్పత్తి 32 శాతం నుంచి ఏకంగా 120 శాతానికి చేరింది.
తక్కువ వడ్డీ ముగిసి.. మొదలైన డెట్ స్పైరల్
గతంలో అప్పులు ఎక్కువగా ఉన్నప్పటికీ వడ్డీ రేట్లు 0.5% నుంచి 1% లోపు ఉండటంతో అగ్రరాజ్యానికి పెద్దగా ఇబ్బంది కలగలేదు. ఒక ప్రభుత్వం తర్వాత మరొక ప్రభుత్వం వరుసగా రుణాలు తీసుకుంటూ వెళ్లింది. అయితే గతంలో అతి తక్కువ వడ్డీకి తీసుకున్న 5 సంవత్సరాల బాండ్ల గడువు ముగియడంతో, వాటిని తీర్చేందుకు ప్రస్తుతం దాదాపు 4% పైగా అధిక వడ్డీకి కొత్త అప్పులు తీసుకోవాల్సి వస్తోంది. ఒక క్రెడిట్ కార్డు బిల్లు కట్టడానికి మరో క్రెడిట్ కార్డు తీసుకున్నట్లు పాత అప్పులు తీర్చడానికి కొత్త అప్పులు తీసుకునే ప్రమాదకర 'డెట్ స్పైరల్' (Debt Spiral) లోకి అమెరికా చిక్కుకుంది. దీనివల్ల 2019లో ఏడాదికి కేవలం 375 బిలియన్ డాలర్లుగా ఉన్న వడ్డీ ఖర్చు, ప్రస్తుతం ఏకంగా 1 ట్రిలియన్ డాలర్లను దాటి తన సొంత మిలిటరీ బడ్జెట్ కంటే ఎక్కువైంది.
రుణదాతల ఉపసంహరణ – ఏఐ టెక్ దిగ్గజాల పోటీ
గతంలో అమెరికా బాండ్లలో విదేశీ సెంట్రల్ బ్యాంకులు పెద్ద ఎత్తున పెట్టుబడులు పెట్టేవి. చైనా, జపాన్ వంటి దేశాలతో పాటు భారత్ కూడా అమెరికా ప్రభుత్వ ట్రెజరీ బాండ్లను కలిగి ఉంది. అయితే ఇటీవల చైనా తన హోల్డింగ్స్‌ను భారీగా తగ్గించగా, భారత్ సైతం తన వాటాను తగ్గించుకుంది. విదేశీ వాటా 50 శాతం నుంచి 40 శాతానికి పడిపోయింది. మరోవైపు ఏఐ డేటా సెంటర్ల విస్తరణ కోసం గూగుల్, మైక్రోసాఫ్ట్, మెటా లాంటి దిగ్గజ టెక్ కంపెనీలు అమెరికా ప్రభుత్వం కంటే ఎక్కువ వడ్డీని (6.4% వరకు) ఆఫర్ చేస్తూ మార్కెట్ నుంచి రుణాలు సేకరిస్తున్నాయి. ఫలితంగా ప్రభుత్వం అప్పులు పొందడానికి ప్రైవేట్ టెక్ దిగ్గజాలతో పోటీ పడాల్సి వస్తోంది (Crowding Out).
అమెరికన్ల భవిష్యత్తు – సోషల్ సెక్యూరిటీ ప్రమాదంలో
ప్రభుత్వ ఆదాయంలో అధిక భాగం కేవలం తీసుకున్న అప్పులకు వడ్డీలు చెల్లించడానికే సరిపోతుండటంతో ప్రజా సంక్షేమం, ఇన్ఫ్రాస్ట్రక్చర్, హెల్త్‌కేర్‌కు నిధులు కొరవడుతున్నాయి. అమెరికాలోని వృద్ధులకు ఆసరాగా నిలిచే సోషల్ సెక్యూరిటీ నిధులు 2032 చివరి నాటికి అడుగంటే ప్రమాదం పొంచి ఉంది. అలా జరిగితే పింఛన్లలో దాదాపు 22 శాతం కోత పడే అవకాశం ఉంది. దీనివల్ల సాధారణ అమెరికన్ పౌరులు నెలకు వందల డాలర్ల ఆదాయాన్ని కోల్పోయే దుస్థితి ఏర్పడుతుంది.
భారతదేశంపై దీని ప్రభావం ఎలా ఉంటుంది?
అమెరికా సంక్షోభం ఆ దేశానికే పరిమితం కాదు. యుఎస్ ట్రెజరీ బాండ్లు 4-5 శాతం సురక్షిత రాబడిని ఇస్తుండటంతో అంతర్జాతీయ మదుపరులు భారత్ లాంటి వర్థమాన దేశాల మార్కెట్ల నుంచి పెట్టుబడులను వెనక్కి తీసుకుని అమెరికా బాండ్ల వైపు మళ్లే ప్రమాదం ఉంది. దీనివల్ల డాలర్ బలపడి, భారత రూపాయి విలువపై ఒత్తిడి పెరుగుతుంది. భారత్ తన ముడి చమురు అవసరాల్లో దాదాపు 85 శాతం దిగుమతి చేసుకుంటున్నందున, రూపాయి బలహీనపడితే చమురు దిగుమతులు ఖరీదై పెట్రోల్, డీజిల్ ధరలు పెరుగుతాయి. ఇది అంతిమంగా నిత్యావసర వస్తువుల ధరల పెరుగుదలకు దారితీసి సామాన్యుడి జేబుకు గండి కొడుతుంది.
