పిల్లల ఆన్‌లైన్ భద్రతను కాపాడే దిశగా ఆస్ట్రేలియా ప్రభుత్వం ఒక విప్లవాత్మక నిర్ణయం తీసుకుంది. దేశంలో 16 సంవత్సరాల లోపు వయస్సు కలిగిన పిల్లలు ఇకపై సోషల్ మీడియా వేదికలను ఉపయోగించకూడదని నూతన చట్టం ద్వారా నిషేధం విధించింది. ఈ నిర్ణయాన్ని ప్రధాన మంత్రి ఆంథోనీ అల్బనీస్ అధికారికంగా ప్రకటించారు. ఈ చట్టం 2024 డిసెంబర్ 10వ తేదీ నుంచి దేశవ్యాప్తంగా అమల్లోకి రానుంది.
ఆన్‌లైన్ సేఫ్టీ అమెండ్‌మెంట్ (సోషల్ మీడియా మినిమమ్ ఏజ్) బిల్ 2024’ పేరుతో ప్రభుత్వం కొత్త చట్టాన్ని ప్రవేశపెట్టింది. దీని ప్రకారం 16 ఏళ్లలోపు పిల్లలు ఫేస్‌బుక్, ఇన్‌స్టాగ్రామ్, టిక్‌టాక్, స్నాప్‌చాట్, ఎక్స్‌ (ట్విట్టర్), యూట్యూబ్, రెడ్డిట్, కిక్ వంటి ప్రముఖ సోషల్ మీడియా ప్లాట్‌ఫారమ్‌లలో అకౌంట్లు సృష్టించడం లేదా వినియోగించడం పూర్తిగా నిషేధించబడింది. ఈ నియమాలను ఉల్లంఘించిన సంస్థలపై ప్రభుత్వం కఠిన చర్యలు తీసుకోనుంది. సోషల్ మీడియా సంస్థలు తమ వినియోగదారుల వయసును ధృవీకరించే విధానాలను తప్పనిసరిగా అమలు చేయాల్సి ఉంటుంది.
ప్రభుత్వ వర్గాల ప్రకారం, ఈ నిర్ణయం వెనుక ముఖ్య ఉద్దేశం పిల్లలను సైబర్ బుల్లీయింగ్, హానికరమైన కంటెంట్ ప్రభావం, డిజిటల్ వ్యసనం, తప్పుడు సమాచారం వంటి ముప్పుల నుంచి రక్షించడం. అనేక అధ్యయనాలు సోషల్ మీడియా చిన్న వయస్సు పిల్లల్లో మానసిక ఒత్తిడి, ఆత్మవిశ్వాసం లోపం, వ్యసనపు ధోరణులు పెంచుతున్నాయని వెల్లడించాయి. ఈ నేపథ్యంలో పిల్లల మానసిక ఆరోగ్యం, భద్రతకు ప్రాధాన్యతనిస్తూ ప్రభుత్వం ఈ కఠిన నిర్ణయం తీసుకుంది.
ఆస్ట్రేలియా ప్రభుత్వం చెప్పినట్టుగా, ఈ చట్టం కేవలం నిషేధమే కాకుండా, ఒక సురక్షిత డిజిటల్ వాతావరణాన్ని సృష్టించే ప్రయత్నం. తల్లిదండ్రులు, పాఠశాలలు, టెక్ కంపెనీలు కలిసి పిల్లల ఆన్‌లైన్ ప్రవర్తనపై పర్యవేక్షణ పెంచాలని ప్రభుత్వం సూచించింది. ప్రపంచవ్యాప్తంగా పిల్లల ఆన్‌లైన్ భద్రతపై అవగాహన పెరిగిన తరుణంలో, ఆస్ట్రేలియా తీసుకున్న ఈ నిర్ణయం ఇతర దేశాలకు కూడా మార్గదర్శకంగా మారే అవకాశం ఉంది.
