ఆంధ్రప్రదేశ్లో డ్రైవింగ్ లైసెన్సుల జారీ ప్రక్రియను మరింత పారదర్శకంగా, సమర్థవంతంగా మార్చేందుకు ప్రభుత్వం ముందడుగు వేసింది. సరైన శిక్షణ లేకుండా లైసెన్సులు పొందడం వల్ల రోడ్డు ప్రమాదాలు పెరుగుతున్నాయని గుర్తించిన రవాణా శాఖ, ఈ సమస్యకు శాశ్వత పరిష్కారం కనుగొనాలని నిర్ణయించింది. కేంద్ర రవాణా, జాతీయ రహదారుల మంత్రిత్వ శాఖ (MoRTH) మార్గదర్శకాల ప్రకారం రాష్ట్రవ్యాప్తంగా 53 డ్రైవింగ్ శిక్షణ కేంద్రాలు (డీటీసీలు) మరియు 5 ప్రాంతీయ డ్రైవింగ్ శిక్షణ కేంద్రాలు (ఆర్డీటీసీలు) ఏర్పాటు చేయడానికి ఆమోదం తెలిపింది. ఈ నిర్ణయం అమల్లోకి వస్తే, లైసెన్సుల జారీ వ్యవస్థలో పూర్తిస్థాయి పారదర్శకత నెలకొననుంది.
కొత్త విధానం ప్రకారం డ్రైవింగ్ శిక్షణ కేంద్రాల్లో శిక్షణ పూర్తిచేసిన అభ్యర్థులు ఇకపై రవాణా శాఖ కార్యాలయాల్లో డ్రైవింగ్ టెస్ట్ ఇవ్వాల్సిన అవసరం ఉండదు. డీటీసీ నుండి పొందిన శిక్షణ సర్టిఫికెట్ ఆధారంగా వారికి నేరుగా లైసెన్స్ మంజూరు చేస్తారు. ఈ శిక్షణ కేంద్రాల్లో ద్విచక్ర వాహనాలు, కార్లు, ట్రక్కులు వంటి అన్ని రకాల వాహనాల డ్రైవింగ్ నేర్పిస్తారు. తరగతి గదుల్లో ట్రాఫిక్ నిబంధనలు, రోడ్డు భద్రతపై అవగాహన కల్పించడం, ఆధునిక సిమ్యులేటర్లపై ప్రాక్టీస్ చేయించడం, ప్రత్యేకంగా రూపొందించిన ట్రాక్లపై డ్రైవింగ్ శిక్షణ ఇవ్వడం ఈ కార్యక్రమంలో భాగమవుతుంది. లైసెన్సు రకం ఆధారంగా శిక్షణ కాలం, ఫీజు మొదలైన అంశాలను కేంద్ర రవాణా శాఖ నిర్ణయించనుంది.
రాష్ట్రంలో ప్రతిపాదిత 5 ప్రాంతీయ డ్రైవింగ్ శిక్షణ కేంద్రాలను (ఆర్డీటీసీలు) ఉత్తరాంధ్ర, కోస్తా, రాయలసీమ ప్రాంతాల్లో ఏర్పాటు చేయనున్నారు. వీటిలో శిక్షణ పొందిన వారికి అదనపు సౌకర్యాలు లభిస్తాయి. వారు లైసెన్సు కోసం ప్రత్యేకంగా ఆర్టీఏ కార్యాలయానికి వెళ్లాల్సిన అవసరం లేకుండా, శిక్షణ పూర్తయ్యే వెంటనే అక్కడికక్కడే లైసెన్సు కోసం దరఖాస్తు చేసుకుని పొందవచ్చు. దీంతో సమయం, ఖర్చు రెండూ ఆదా అవుతాయి. అంతేకాకుండా, ప్రామాణిక శిక్షణతో నైపుణ్యం కలిగిన డ్రైవర్లు పెరగడం ద్వారా రోడ్డు భద్రత కూడా గణనీయంగా మెరుగుపడుతుంది.
ఈ కేంద్రాల ఏర్పాటుకు కేంద్ర ప్రభుత్వం ఆర్థిక సహాయం కూడా అందిస్తోంది. ఒక్కో డ్రైవింగ్ శిక్షణ కేంద్రం (డీటీసీ) ఏర్పాటుకు కనీసం 2 ఎకరాల స్థలం అవసరం కాగా, దానిలో అయ్యే మొత్తం ఖర్చులో 85% (గరిష్టంగా రూ.2.5 కోట్లు) వరకు కేంద్రం భరిస్తుంది. అలాగే, ఆర్డీటీసీ స్థాపనకు 3 ఎకరాల భూమి అవసరం కాగా, ఒక్కో కేంద్రానికి రూ.5 కోట్లు వరకు సబ్సిడీ ఇస్తోంది. ఇప్పటివరకు ఎన్టీఆర్, శ్రీకాకుళం, నెల్లూరు జిల్లాల నుంచి రెండేసి దరఖాస్తులు అందగా, అనంతపురం, తిరుపతి, కృష్ణా, పశ్చిమగోదావరి, బాపట్ల, కాకినాడ జిల్లాల నుంచి ఒక్కో దరఖాస్తు వచ్చింది. అనంతపురంలోని ఒక డీటీసీకి ఇప్పటికే కేంద్రం ఆమోదం తెలిపింది. అయితే ఆర్డీటీసీలకు ఇంకా దరఖాస్తులు రాలేదు. జనవరి చివరి వరకు దరఖాస్తులు స్వీకరించి, ఫిబ్రవరి నాటికి కేంద్రానికి పంపనున్నారు. వచ్చే ఏడాది నాటికి ఈ కేంద్రాలు పూర్తిస్థాయిలో పనిచేయడం ప్రారంభించనున్నాయి.
