అమెరికాలో రాజకీయ సంక్షోభం ముదిరిపోవడంతో అక్కడి ప్రభుత్వం షట్‌డౌన్‌లోకి వెళ్లింది. అధ్యక్షుడు డొనాల్డ్ ట్రంప్, కాంగ్రెస్ మధ్య ప్రభుత్వ ఖర్చుల కేటాయింపుపై ఒప్పందం కుదరకపోవడమే దీనికి కారణమైంది. దీని ప్రభావం అమెరికా అంతర్గత పరిపాలనపైనే కాకుండా ప్రపంచవ్యాప్తంగా ఉన్న వలసదారులపై కూడా పడింది. ముఖ్యంగా, భారతీయ టెక్ నిపుణులు ఆధారపడే హెచ్-1బీ వీసా జారీ ప్రక్రియ పూర్తిగా స్తంభించిపోయింది. అత్యవసరంకాని అనేక ప్రభుత్వ కార్యాలయాలు తాత్కాలికంగా మూతపడగా, వీసా సంబంధిత దరఖాస్తులపై అనిశ్చితి నెలకొంది.
ఇమ్మిగ్రేషన్ న్యాయవాది నికోల్ గునారా ప్రకారం, హెచ్-1బీ వీసా ప్రక్రియలో కీలకమైన మొదటి దశ లేబర్ కండిషన్ అప్లికేషన్ (ఎల్‌సీఏ)ను అమెరికా కార్మిక శాఖ ఆమోదించాలి. కానీ కార్మిక శాఖ నిధులు కాంగ్రెస్ నుంచి వస్తాయి. ఇప్పుడు షట్‌డౌన్ కారణంగా ఆ నిధులు నిలిచిపోవడంతో ఎల్‌సీఏ దరఖాస్తులపై ఎలాంటి చర్యలు తీసుకోవడం సాధ్యం కాదని ఆమె తెలిపారు. అంటే, ఇప్పటికే ఎల్‌సీఏ ఆమోదం పొందిన వారు తప్ప, కొత్తగా వీసా దరఖాస్తులు చేసుకున్నవారు లేదా ఉద్యోగం మారాలని భావిస్తున్నవారు షట్‌డౌన్ ముగిసే వరకు వేచి చూడాల్సిందే. ఇది అమెరికాలో ఉన్న వేలాది మంది భారతీయ ఐటీ నిపుణుల భవిష్యత్తును తాత్కాలికంగా సందిగ్ధంలోకి నెట్టింది.
అయితే, యూఎస్ సిటిజన్‌షిప్ అండ్ ఇమ్మిగ్రేషన్ సర్వీసెస్ (USCIS) మాత్రం ఫీజుల ద్వారా నడుస్తుంది కాబట్టి దాని సేవలు కొనసాగుతాయి. అంటే, పిటిషన్ దాఖలు చేయడంలో ఇబ్బంది ఉండదు. కానీ ఎల్‌సీఏ ఆమోదం లేకుండా పిటిషన్ ముందుకు సాగదని న్యాయ నిపుణులు స్పష్టం చేస్తున్నారు. మరోవైపు, ట్రంప్ ప్రభుత్వం ఇటీవలే హెచ్-1బీ వీసాల వార్షిక ఫీజులను పెంచి, లాటరీ విధానాన్ని రద్దు చేస్తూ వేతనాల ఆధారంగా ఎంపిక విధానాన్ని ప్రవేశపెట్టే ప్రయత్నం చేసింది. ఈ మార్పులు ఇంకా పూర్తిగా అమల్లోకి రాకముందే షట్‌డౌన్ రావడం వల్ల టెక్కీలలో అనిశ్చితి మరింత పెరిగింది.
ఇక, భారత్‌తో పాటు చైనా వంటి దేశాల నుంచి టెక్ కంపెనీలు నిపుణులను నియమించుకోవడానికి పూర్తిగా హెచ్-1బీ వీసాలపై ఆధారపడుతున్నాయి. వీసా ప్రక్రియ నిలిచిపోవడం వలన అమెరికాలో ఉన్న పెద్ద టెక్ కంపెనీలకూ అంతర్జాతీయ నియామకాలకూ అడ్డంకులు ఏర్పడుతున్నాయి. ఇదే సమయంలో, భారత్‌లోని అమెరికా రాయబార కార్యాలయం ఒక ప్రకటన విడుదల చేసింది. "నిధుల కొరత ఉన్నప్పటికీ, అమెరికాలోనూ విదేశాల్లోనూ రాయబార కార్యాలయాల ద్వారా పాస్‌పోర్ట్, వీసా సేవలు కొనసాగుతాయి" అని స్పష్టతనిచ్చింది. అయినా, కొత్త హెచ్-1బీ వీసా పొందదలచిన వారికి ఈ షట్‌డౌన్ ఒక పెద్ద అడ్డుగోడగా మారింది.
