సాధారణంగా రైలు ప్రయాణం అంటే చాలా మందికి చాలా ఇష్టం. కొన్ని గంటలు లేదా ఒకట్రెండు రోజుల పాటు ప్రయాణించి, హాయిగా గమ్యాన్ని చేరుకుంటాం. కానీ, మీరు వింటున్న ఈ రైలు మాత్రం ఒకట్రెండు రోజులు కాదు, ఏకంగా 21 రోజుల పాటు పరుగులు పెడుతూనే ఉంటుంది! ఈ సుదీర్ఘ ప్రయాణం ప్రపంచంలోనే అతి ఎక్కువ దూరం ప్రయాణించే రైలుగా కొత్త రికార్డును సృష్టించింది.
ఇప్పటివరకు లండన్ నుంచి సింగపూర్ వరకు వెళ్లే రైలు ఈ రికార్డును కలిగి ఉండగా, ఇప్పుడు పోర్చుగల్ నుంచి సింగపూర్ వరకు వెళ్లే రైలు ఆ స్థానాన్ని ఆక్రమించింది. ఈ ప్రయాణం కేవలం దూరం పరంగానే కాదు, ప్రయాణికులకు రెండు ఖండాల సంస్కృతులను, అద్భుతమైన ప్రకృతి దృశ్యాలను చూసే అరుదైన అవకాశాన్ని కల్పిస్తుంది.
ఈ అద్భుతమైన రైలు ప్రయాణం వివరాలు నిజంగా ఆశ్చర్యం కలిగిస్తాయి:
పోర్చుగల్‌లోని అల్గార్వే ప్రాంతంలో ఈ రైలు ప్రయాణం మొదలవుతుంది.
సింగపూర్
మొత్తం 18,755 కిలోమీటర్లు!
సుమారు 21 రోజుల సమయం పడుతుంది. (వాతావరణ పరిస్థితులు, ఇతర ఆలస్యాల కారణంగా ఈ సమయం కొద్దిగా పెరగవచ్చు.)
ఈ సుదీర్ఘ మార్గంలో రైలు కేవలం 55 స్టేషన్లలో మాత్రమే ఆగుతుంది. అందులో 11 మాత్రమే ప్రధానమైన, ప్రసిద్ధి చెందిన స్టేషన్లు.
ఈ రైలు మొత్తం 13 దేశాల గుండా ప్రయాణం చేస్తుంది.
ఐరోపా ఖండాన్ని ఆసియా ఖండంతో కలిపే ఈ చారిత్రక ప్రయాణం, ప్రయాణికులకు ఒక గొప్ప అనుభూతిని ఇస్తుంది. మరి ఇంత సుదీర్ఘ ప్రయాణానికి టికెట్ ధర ఎంత ఉంటుందో అని ఆలోచిస్తున్నారా?
ఈ 21 రోజుల సుదీర్ఘ ప్రయాణానికి టికెట్ ధర సుమారుగా 1350 డాలర్లు. ఇది మన భారత కరెన్సీలో సుమారు రూ.1.14 లక్షలుగా నిర్ణయించారు.
ఈ ధరలోనే భోజనం, డ్రింక్స్, వసతి సహా ప్రయాణానికి కావాల్సిన అన్ని సౌకర్యాలను అందిస్తారు. దీంతో ప్రయాణికులు ఎలాంటి ఇబ్బందులు లేకుండా ప్రయాణాన్ని పూర్తిగా ఆస్వాదించవచ్చు.
రైలు ఆగే ప్రధాన నగరాల గురించి చెప్పాలంటే, పారిస్, మాస్కో, బీజింగ్, బ్యాంకాక్ వంటి ప్రపంచంలోని అత్యంత ప్రసిద్ధి చెందిన నగరాల్లోని స్టేషన్లలో ఈ రైలును రాత్రి మొత్తం నిలిపి ఉంచుతారు. దీనివల్ల ప్రయాణికులు ఆయా నగరాలను దిగి చూసే అవకాశం కూడా ఉంటుందట. ఒకే టికెట్‌పై ఇన్ని ప్రదేశాలను, ఇంత అద్భుతమైన ప్రకృతిని చూసే ఛాన్స్ రావడం అంటే నిజంగా అదృష్టమే కదా!
ఈ అద్భుతమైన రికార్డు సృష్టించడానికి ప్రధాన కారణం.. లావోస్, చైనా మధ్య కొత్తగా ప్రారంభించిన రైలు లింక్ అని చెప్పాలి. కొత్తగా నిర్మించిన లావోస్-చైనా లింక్ రైలు మార్గం, చైనాలోని కున్మింగ్ నగరాన్ని లావోస్ రాజధాని వియెంటియాన్‌తో ప్రత్యక్షంగా కలుపుతుంది. ఈ చారిత్రక లింక్‌ను రూపొందించడంలో పాలుపంచుకున్న రైల్వే నిపుణులు, ట్రావెల్ ఔత్సాహికులు ఈ అద్భుతమైన మార్గాన్ని అభివృద్ధి చేశారు.
మన దేశంలో అత్యంత సుదీర్ఘమైన రైలు ప్రయాణం 'వివేక్ ఎక్స్‌ప్రెస్'. ఇది అస్సాంలోని డిబ్రూగఢ్ నుంచి తమిళనాడులోని కన్యాకుమారి వరకు సాగుతుంది. ఈ రైలు 80 గంటల 15 నిమిషాలు ప్రయాణించి, 4,273 కిలోమీటర్ల దూరాన్ని చేరుకుంటుంది.
