భారత ఐటీ రంగంలో అగ్రగామిగా ఉన్న టాటా కన్సల్టెన్సీ సర్వీసెస్ (టీసీఎస్) మరోసారి వార్తల్లో నిలిచింది. కంపెనీ 2025-26 ఆర్థిక సంవత్సరానికి సంబంధించిన రెండో త్రైమాసిక ఫలితాలను గురువారం ప్రకటించింది. అయితే ఈ ఫలితాల కంటే ఎక్కువ చర్చనీయాంశంగా మారింది ఉద్యోగుల సంఖ్యలో వచ్చిన భారీ తగ్గుదల. జూన్‌తో ముగిసిన త్రైమాసికంలో టీసీఎస్ సిబ్బంది సంఖ్య 6,13,069గా ఉండగా, సెప్టెంబర్‌ నాటికి అది 5,93,314కి పడిపోయింది. అంటే కేవలం మూడు నెలల్లోనే దాదాపు 19,755 మంది ఉద్యోగులు తగ్గారు. ఈ రికార్డు స్థాయి తగ్గుదల ఐటీ రంగంలో పెద్ద కలకలానికి దారితీసింది.
టీసీఎస్ విడుదల చేసిన ఫైనాన్షియల్ రిపోర్ట్ ప్రకారం, కంపెనీ లాభాల్లో మాత్రం పెద్ద మార్పు కనిపించలేదు. ఈ త్రైమాసికంలో టీసీఎస్ రూ.12,075 కోట్ల నికర లాభాన్ని నమోదు చేసింది. గతేడాది ఇదే కాలంతో పోలిస్తే ఇది కేవలం 1.39 శాతం పెరిగినట్టే. అయితే, కార్యకలాపాల ద్వారా వచ్చిన ఆదాయం మాత్రం స్వల్పంగా పెరిగి రూ.65,799 కోట్లకు చేరింది. లాభాల వృద్ధి కాస్త సానుకూలమైనప్పటికీ, ఉద్యోగుల సంఖ్యలో ఈ భారీ కోత మార్కెట్ నిపుణుల్లో ఆందోళనను రేపుతోంది.
ఉద్యోగుల తొలగింపులపై ఇప్పటికే వివిధ వర్గాలు ఆగ్రహం వ్యక్తం చేస్తున్నాయి. నేషనల్ ఇన్ఫర్మేషన్ టెక్నాలజీ ఎంప్లాయీస్ సెనేట్ (NITES) అనే ఉద్యోగుల సంఘం, ఎలాంటి సరైన సమాచారమూ ఇవ్వకుండా పెద్ద ఎత్తున ఉద్యోగులను తొలగించడం అన్యాయం అని తీవ్రంగా విమర్శించింది. అయితే, టీసీఎస్ సీఏచ్‌ఆర్ఓ సుదీప్ కున్నుమల్ ఈ ఆరోపణలను ఖండించారు. కంపెనీ రీస్ట్రక్చరింగ్ ప్రాసెస్‌లో భాగంగా కేవలం ఒక శాతం మంది సిబ్బందిని — అంటే దాదాపు 6,000 మందిని మాత్రమే తొలగించామని ఆయన స్పష్టం చేశారు. కానీ కంపెనీ చెప్పిన సంఖ్య, వాస్తవంగా తగ్గిన ఉద్యోగుల సంఖ్య మధ్య ఉన్న భారీ తేడా ఐటీ వర్గాల్లో ప్రశ్నలను లేవనెత్తుతోంది.
ఐటీ రంగంలో ఇటీవలి కాలంలో ఉద్యోగాల కోతలు పెరుగుతున్నాయి. గ్లోబల్ డిమాండ్ తగ్గడం, ప్రాజెక్టుల వాయిదాలు, ఆటోమేషన్ టెక్నాలజీ వేగవంతం కావడం వంటి కారణాలు ఇందుకు దారితీస్తున్నాయి. టీసీఎస్ వంటి పెద్ద కంపెనీ ఒక్క త్రైమాసికంలోనే ఇంత పెద్ద స్థాయిలో ఉద్యోగులను తగ్గించడం ఐటీ ఉద్యోగుల భవిష్యత్తుపై సందేహాలను రేకెత్తిస్తోంది. నిపుణుల అభిప్రాయం ప్రకారం, సంస్థలు వ్యయ నియంత్రణ, లాభదాయకతను కాపాడుకునే క్రమంలో ఈ నిర్ణయాలు తీసుకుంటున్నప్పటికీ, దీని ప్రభావం భారత యువతపై, ముఖ్యంగా కొత్తగా ఐటీ రంగంలో అడుగుపెడుతున్న ఇంజనీర్లపై తీవ్రంగా పడే అవకాశం ఉంది.
