ఆంధ్రప్రదేశ్ ప్రభుత్వం వీవోఏల (గ్రామ సమాఖ్య సహాయకులు) కోసం పెద్ద శుభవార్త ప్రకటించింది. గత ప్రభుత్వం విధించిన మూడేళ్ల కాలపరిమితిని కూటమి ప్రభుత్వం రద్దు చేసింది. దీంతో రాష్ట్రవ్యాప్తంగా పనిచేస్తున్న 27 వేల మంది వీవోఏలకు ఊరట లభించింది. సెర్ప్‌ ఎక్స్‌ అఫీషియో కార్యదర్శి వాకాటి కరుణ కొత్త ఉత్తర్వులు జారీ చేశారు. ఇకపై వీవోఏల నియామకం, తొలగింపు బాధ్యతలు మండల అధికారుల వద్ద కాకుండా జిల్లా పీడీ పరిధిలోకి మారాయి. ఎవరైనా అవినీతి లేదా అక్రమాలకు పాల్పడితే, పీడీ నేరుగా చర్యలు తీసుకోగలరు.
వీవోఏల సేవలను ప్రభుత్వం మరో స్థాయికి తీసుకెళ్లే నిర్ణయం తీసుకుంది. ఎంఎస్ఎంఈ మంత్రి కొండపల్లి శ్రీనివాస్ వీవోఏల ప్రతినిధులతో సమావేశమై, వారి సమస్యలను విన్నారు. ఆయన మాట్లాడుతూ, రాబోయే రెండు నెలల్లో వీవోఏలకు ఉచితంగా 5జీ ఆండ్రాయిడ్ మొబైల్స్ అందిస్తామని హామీ ఇచ్చారు. ఈ మొబైల్స్ ద్వారా వీవోఏలు ప్రభుత్వ పథకాలను ప్రజలకు వేగంగా, సమర్థవంతంగా చేరవేయగలరని మంత్రి అన్నారు. అలాగే ఫీల్డ్ లెవెల్‌లో వారి పనితీరు మరింత మెరుగుపడుతుందని తెలిపారు.
గతంలో వీవోఏల సేవలకు కాలపరిమితి పెట్టడం వల్ల ఉద్యోగ భద్రతపై వారు ఆందోళన చెందారు. ఈ కొత్త నిర్ణయంతో ఆ భయం తొలగిపోయింది. ప్రభుత్వం ఉద్యోగ స్థిరత్వం కల్పించడంతో వీవోఏల్లో ఉత్సాహం నెలకొంది. ఇది గ్రామ స్థాయిలో ప్రభుత్వ పథకాల అమలులో కీలకమైన పాత్ర పోషిస్తున్న వీవోఏలకు నమ్మకం కలిగించే చర్యగా భావిస్తున్నారు.
ఇక మరో ముఖ్య నిర్ణయంగా, ప్రభుత్వం పెన్షనర్లకు అదనపు పెన్షన్ ఆటోమెటిక్‌గా అందేలా చర్యలు చేపడుతోంది. పెన్షనర్లు నిర్ణయించిన వయసుకు చేరిన వెంటనే అదనపు పెన్షన్ అందేలా సాఫ్ట్‌వేర్‌లో మార్పులు చేయాలని సీఎంవో ఆదేశించింది. ఈ ప్రతిపాదనను ఆర్థిక శాఖకు పంపించి, ఒక నెలలో నివేదిక ఇవ్వాలని ముఖ్య కార్యదర్శి ముద్దాడ రవిచంద్ర సూచించారు.
ఇక రాష్ట్రవ్యాప్తంగా రూ.2,500 కోట్లతో రహదారుల అభివృద్ధి పనులు చేపట్టనున్నట్లు కూడా ప్రభుత్వం ప్రకటించింది. అదేవిధంగా, మెగా డీఎస్సీలో ఎంపికైన కొత్త ఉపాధ్యాయులకు మాన్యువల్ కౌన్సెలింగ్ ప్రక్రియ కూడా ప్రారంభమైంది. ఈ నిర్ణయాలన్నీ రాష్ట్రంలోని ప్రజా సేవలను బలోపేతం చేయడానికే అని అధికారులు తెలిపారు.
