దేశంలోని చాలా రాష్ట్రాలను భారీ వర్షాలు అతలాకుతలం చేస్తున్నాయి. బంగాళాఖాతంలో ఏర్పడిన అల్పపీడనం, ఇతర వాతావరణ పరిస్థితుల ప్రభావంతో దక్షిణ భారతదేశంతో పాటు ఉత్తర, మధ్య భారత దేశంలోనూ భారీ వర్షాలు కురుస్తున్నాయి. భారత వాతావరణ శాఖ (ఐఎండీ) విడుదల చేసిన హెచ్చరికల ప్రకారం, రానున్న రోజుల్లోనూ ఈ వర్షాల తీవ్రత కొనసాగుతుందని, ప్రజలు అప్రమత్తంగా ఉండాలని సూచించింది.
వాయవ్య బంగాళాఖాతంలో కేంద్రీకృతమైన అల్పపీడనం మరింత బలపడి వాయుగుండంగా మారనుంది. దీని ప్రభావం వల్ల కోస్తాంధ్ర, తెలంగాణ, దక్షిణ ఒడిశా, దక్షిణ ఛత్తీస్‌గఢ్‌తో పాటు కర్ణాటకలోని పలు ప్రాంతాల్లో భారీ వర్షాలు కురిసే అవకాశం ఉంది. ఈ వర్షాలు గత వారం కురిసిన వర్షాల కంటే తీవ్రంగా ఉండవచ్చని వాతావరణ నిపుణులు అంచనా వేస్తున్నారు.
కొంకణ్, గోవా, మహారాష్ట్ర, కోస్తా కర్ణాటక: ఈ ప్రాంతాల్లో సెప్టెంబర్ 7 వరకు అతి భారీ వర్షాలు కొనసాగుతాయని ఐఎండీ పేర్కొంది. ఈ ప్రాంతాల్లో కొండచరియలు విరిగిపడే ప్రమాదం ఉన్నందున పర్యాటకులు జాగ్రత్తగా ఉండాలని హెచ్చరించారు.
ఈ వర్షాల వల్ల లోతట్టు ప్రాంతాలు జలమయం అయ్యే అవకాశం ఉంది. అలాగే, నదులు, వాగుల నీటిమట్టం పెరుగుతుంది. అందువల్ల ప్రజలు వరద ప్రభావిత ప్రాంతాలకు వెళ్లకుండా, సురక్షిత ప్రాంతాల్లో ఉండాలని అధికారులు సూచిస్తున్నారు.
దక్షిణ భారతదేశంతో పాటు ఉత్తర, మధ్య భారత దేశంలోనూ వర్షాలు బీభత్సం సృష్టిస్తున్నాయి. హిమాచల్ ప్రదేశ్, ఉత్తరాఖండ్, ఛత్తీస్‌గఢ్, ఒడిశా, గుజరాత్, మధ్యప్రదేశ్ రాష్ట్రాలకు ఐఎండీ రెడ్ అలర్ట్ జారీ చేసింది. ఈ ప్రాంతాల్లో కుండపోత వర్షాలు కురిసే అవకాశం ఉంది.
ప్రమాదకర పరిస్థితులు: కొండ ప్రాంతాల్లో కొండచరియలు విరిగిపడటం, వరదలు సంభవించే ప్రమాదం ఉందని ఐఎండీ హెచ్చరించింది. ఈ నేపథ్యంలో, పర్యాటకులు, యాత్రికులు కొండ ప్రాంతాలకు ప్రయాణాలు తాత్కాలికంగా వాయిదా వేసుకోవాలని అధికారులు విజ్ఞప్తి చేశారు.
దేశ రాజధాని ఢిల్లీని సైతం భారీ వర్షాలు అతలాకుతలం చేస్తున్నాయి. గత కొన్ని రోజులుగా కురుస్తున్న వానలకు యమునా నది ప్రమాదకర స్థాయిలో ప్రవహిస్తోంది. నది నీటిమట్టం 207 మీటర్ల మార్కును దాటడంతో ఢిల్లీ, ఎన్‌సీఆర్ ప్రాంతాలకు ఆరెంజ్, యెల్లో అలర్ట్‌లు ప్రకటించారు. వరదల కారణంగా రోడ్లపై ట్రాఫిక్ జామ్‌లు, విమాన సర్వీసులకు అంతరాయం ఏర్పడి సాధారణ జనజీవనం స్తంభించింది.
ఈశాన్య రాష్ట్రాల్లో కూడా వారం రోజుల పాటు వర్షాలు కొనసాగుతాయని ఐఎండీ పేర్కొంది. ఈ ప్రకృతి వైపరీత్యాల నేపథ్యంలో ప్రజలు అప్రమత్తంగా ఉండటం చాలా ముఖ్యం. ముఖ్యమైన పనుల ఉంటే తప్ప ప్రయాణాలు పెట్టుకోవద్దని, అలాగే వాతావరణ శాఖ ఇచ్చే సూచనలను ఎప్పటికప్పుడు గమనిస్తూ ఉండాలని అధికారులు ప్రజలకు విజ్ఞప్తి చేశారు. విపత్తు నిర్వహణ బృందాలు కూడా సహాయక చర్యల కోసం సిద్ధంగా ఉన్నాయి.
