ఆదివారాలు ఇష్టంగా తినే మటన్ అంటే? గొర్రె లేదా మేక? తెలుసుకోవాల్సిన విషయమే..

• గొర్రె మాంసం వర్సెస్ మేక మాంసం.. అసలైన మటన్ ఏంటో తేల్చేసిన చరిత్ర!

• 'మౌంటన్' నుంచి పుట్టుకొచ్చిన మటన్.. ఫ్రెంచ్ భాష నుంచి ఆంగ్లంలోకి చేరిన పదం!

• మేక మాంసాన్ని అసలు ఏమంటారో తెలుసా?.. ప్రపంచవ్యాప్తంగా పిలిచే పేరు 'చేవన్'!

Food: మాంసాహార ప్రియులకు మటన్ అంటే అమితమైన ఇష్టం. ముఖ్యంగా తెలుగు రాష్ట్రాల్లో ఆదివారం వచ్చిందంటే చికెన్, మటన్ లేకుండా భోజనం పూర్తికాదు. పండుగలు, శుభకార్యాలు, స్నేహితుల విందుల్లో స్పెషల్ వంటకం అంటే ముందుగా గుర్తొచ్చేది మటన్ కర్రీయే. అయితే మనం మార్కెట్‌కు వెళ్లి లేదా రెస్టారెంట్లలో ఎంతో ఇష్టంగా ఆర్డర్ ఇచ్చే ‘మటన్’ అసలు గొర్రె మాంసమా లేక మేక మాంసమా అనే విషయంపై చాలామందికి స్పష్టత ఉండదు. ఈ రెండు మాంసాల వెనుక శతాబ్దాల చరిత్ర, భాషా పరిణామం దాగి ఉన్నాయి.

మటన్ అనే పదం ఎక్కడి నుంచి వచ్చింది?

సాంకేతికంగా మరియు చారిత్రకంగా 'మటన్' (Mutton) అంటే గొర్రె మాంసం మాత్రమే. ఇది ప్రాచీన ఫ్రెంచ్ పదమైన ‘మౌంటన్’ (Mouton) నుంచి రూపాంతరం చెందింది. పాత ఫ్రెంచ్ భాషలో మౌంటన్ అంటే గొర్రె అని అర్థం. నార్మన్ల దండయాత్రల కాలంలో ఫ్రెంచ్ సంస్కృతి, భాష ఇంగ్లాండ్‌లోకి ప్రవేశించినప్పుడు ఈ పదం ఆంగ్ల భాషలో అంతర్భాగమైంది. బ్రిటన్‌లో వయోజన గొర్రె మాంసాన్ని సూచించడానికి మటన్ అనే పదాన్ని ప్రామాణికంగా వాడటం మొదలుపెట్టారు.

మేక మాంసాన్ని అసలు ఏమని పిలుస్తారు?

గొర్రె మాంసాన్ని మటన్ అని పిలిస్తే.. మరి మేక మాంసాన్ని ఏమని పిలుస్తారు అనే ప్రశ్న సహజంగానే వస్తుంది. అంతర్జాతీయంగా మేక మాంసాన్ని ‘గోట్ మీట్’ (Goat Meat) అని పిలుస్తారు. అయితే దీనికి కూడా ఫ్రెంచ్ మూలాలున్న ఒక ప్రత్యేకమైన శాస్త్రీయ పదం ఉంది. అదే ‘చేవన్’ (Chevon). ఫ్రెంచ్ భాషలోని ‘చెవ్రే’ (మేక) అనే పదం నుంచి ఉద్భవించిన చేవన్‌ను పాశ్చాత్య దేశాల్లో మేక మాంసాన్ని గుర్తించడానికి ప్రత్యేకంగా ఉపయోగిస్తుంటారు.

పాశ్చాత్య దేశాల్లో కచ్చితమైన తేడాలు – ల్యాంబ్, మటన్, గోట్

బ్రిటన్, అమెరికా, ఆస్ట్రేలియా, న్యూజిలాండ్ వంటి దేశాల్లో మాంసం విషయంలో అత్యంత స్పష్టమైన వర్గీకరణ ఉంటుంది. ఒక సంవత్సరం కంటే తక్కువ వయసున్న లేత గొర్రెపిల్ల మాంసాన్ని ‘ల్యాంబ్’ (Lamb) అని పిలుస్తారు. పూర్తి ఎదిగిన, ముదిరిన గొర్రె మాంసాన్ని మాత్రమే ‘మటన్’ (Mutton) అంటారు. ఇక మేక మాంసాన్ని పూర్తిగా వేరుగా పరిగణిస్తూ ‘గోట్ మీట్’ లేదా ‘చేవన్’ అని మాత్రమే పిలుస్తారు. అక్కడ రెస్టారెంట్లలో మటన్ అని అడిగితే కేవలం గొర్రె మాంసం మాత్రమే వడ్డిస్తారు తప్ప మేక మాంసం ఇవ్వరు.

భారతదేశంలో మటన్ ప్రయాణం – బ్రిటీషర్ల ప్రభావం

భారతదేశాన్ని బ్రిటీషర్లు వలస పాలన కిందకు తెచ్చిన తర్వాత మన దేశంలోనూ ఆంగ్ల పదజాలం స్థిరపడింది. అయితే మన దేశంలోకి వచ్చేసరికి ఈ పదాల వాడకంలో ఒక విచిత్రమైన మార్పు చోటుచేసుకుంది. భారతీయులు గొర్రె మాంసమైనా, మేక మాంసమైనా రెండింటినీ కలిపి సాధారణంగా ‘మటన్’ అనే ఒకే పేరుతో పిలవడం అలవాటు చేసుకున్నారు. మార్కెట్లలో మేక మాంసాన్ని అమ్ముతున్నప్పటికీ దాన్ని మటన్ అనే లేబుల్‌తోనే విక్రయిస్తుంటారు. స్థానిక భాషల్లో ప్రత్యేకంగా 'మేక మాంసం' లేదా 'గొర్రె మాంసం' అని అడిగితేనే దుకాణదారులు వాటిని వేరువేరుగా ఇస్తారు.

విదేశాలకు వెళ్లేవారు తెలుసుకోవాల్సిన ముఖ్య విషయం

మన దేశంలో ఉన్నంతవరకు ఏ మాంసాన్నైనా మటన్ అని పిలిచినా పెద్దగా ఇబ్బంది ఉండకపోవచ్చు. కానీ విదేశాలకు ప్రయాణించేటప్పుడు, లేదా అంతర్జాతీయ హోటళ్లలో ఆహారం తీసుకునేటప్పుడు ఈ పదజాలంపై అవగాహన ఉండటం చాలా ముఖ్యం. మేక మాంసం తినాలనుకుని పొరపాటున మటన్ అని ఆర్డర్ చేస్తే గొర్రె మాంసం వస్తుంది. గొర్రె మాంసంలో కొవ్వు శాతం, వాసన, రుచి మేక మాంసంతో పోలిస్తే పూర్తిగా భిన్నంగా ఉంటాయి. కాబట్టి ఈ తేడాను గుర్తించి సరైన ఆహారాన్ని ఎంపిక చేసుకోవడం అవసరమని ఆహార నిపుణులు సూచిస్తున్నారు.