తూర్పు గోదావరి జిల్లా అనపర్తి ప్రజలు ఏళ్లుగా ఎదురుచూస్తున్న కల చివరకు నెరవేరింది. విశాఖపట్నం–లింగంపల్లి మధ్య నడిచే ప్రతిష్ఠాత్మక జన్మభూమి సూపర్ ఫాస్ట్ ఎక్స్ప్రెస్ (12805/12806) ఇకపై అనపర్తి రైల్వే స్టేషన్లో కూడా హాల్టింగ్ ఇవ్వనుంది. ఈ కీలక నిర్ణయంతో అనపర్తి ప్రాంత ప్రజలకు ప్రయాణ సౌకర్యం మరింత మెరుగవ్వనుంది. ఇప్పటివరకు రాజమండ్రి లేదా ఇతర సమీప స్టేషన్లపై ఆధారపడాల్సి వచ్చిన ప్రయాణికులకు ఇప్పుడు స్వస్థలంలోనే ప్రధాన రైలు ఆగుతుండటం విశేషంగా మారింది. ఈ హాల్టింగ్ అనపర్తి అభివృద్ధి దిశగా మరో ముందడుగుగా భావిస్తున్నారు.
ఈ జన్మభూమి ఎక్స్ప్రెస్ హాల్టింగ్ను మంగళవారం రాజమండ్రి ఎంపీ దగ్గుబాటి పురందేశ్వరి, అనపర్తి ఎమ్మెల్యే నల్లమిల్లి రామకృష్ణారెడ్డి లాంఛనంగా ప్రారంభించారు. ఈ సందర్భంగా వారు రైలుకు పచ్చ జెండా ఊపి అధికారికంగా హాల్టింగ్ను ప్రారంభించారు. కార్యక్రమానికి ముందు అనపర్తి రైల్వే స్టేషన్ పరిసరాలు పండుగ వాతావరణాన్ని తలపించాయి. కూటమి నాయకులు, కార్యకర్తలు, స్థానిక ప్రజలు భారీ సంఖ్యలో ర్యాలీగా స్టేషన్కు చేరుకుని సంబరాలు నిర్వహించారు. జన్మభూమి రైలు అనపర్తిలో ఆగడం తమ జీవితాల్లో ఒక చారిత్రక ఘట్టంగా మారిందని స్థానికులు భావోద్వేగంగా తెలిపారు.
ఈ సందర్భంగా ఎంపీ దగ్గుబాటి పురందేశ్వరి మాట్లాడుతూ కీలక వ్యాఖ్యలు చేశారు. ఎన్నికల ప్రచార సమయంలో ప్రజలు తమను అడిగిన మొదటి డిమాండ్ జన్మభూమి ఎక్స్ప్రెస్ అనపర్తిలో హాల్టింగ్ ఇవ్వాలన్నదేనని ఆమె గుర్తు చేశారు. ప్రజలకు ఇచ్చిన హామీని గెలిచిన ఏడాదిన్నరలోనే నెరవేర్చడం ఎంతో సంతృప్తినిచ్చిందని పేర్కొన్నారు. ఈ విజయం ప్రధాని నరేంద్ర మోదీ, కేంద్ర రైల్వే మంత్రి అశ్విని వైష్ణవ్ల సహకారంతోనే సాధ్యమైందని తెలిపారు. ఇందుకు కేంద్ర ప్రభుత్వానికి ప్రత్యేక కృతజ్ఞతలు తెలియజేశారు.
అనపర్తి ఎమ్మెల్యే నల్లమిల్లి రామకృష్ణారెడ్డి మాట్లాడుతూ, ఈ హాల్టింగ్తో విద్యార్థులు, ఉద్యోగులు, వ్యాపారులు, వలస ప్రయాణికులకు అపారమైన ప్రయోజనం చేకూరుతుందని అన్నారు. అనపర్తి అభివృద్ధిలో ఇది ఒక కీలక మైలురాయిగా నిలుస్తుందని చెప్పారు. ఏళ్లుగా కొనసాగుతున్న ప్రజల డిమాండ్ నెరవేరడంతో అనపర్తి ప్రజలు సంక్రాంతి పండుగ ముందే వచ్చినట్టుగా ఆనందం వ్యక్తం చేస్తున్నారు. ఇకపై అనపర్తి రైల్వే స్టేషన్ ప్రాధాన్యం మరింత పెరగనుందని, రాబోయే రోజుల్లో మరిన్ని రైళ్లకు కూడా హాల్టింగ్ వచ్చే అవకాశాలున్నాయని స్థానికులు ఆశాభావం వ్యక్తం చేస్తున్నారు.
