ఏపీ రాష్ట్రం తూర్పు గోదావరి జిల్లాలో ఈ రోజు వేకువజామున పెను ప్రమాదం తృటిలో తప్పింది. కొవ్వూరు పట్టణంలోని ఫ్లైఓవర్పై ప్రయాణిస్తున్న ఓ ప్రైవేట్ ట్రావెల్స్ బస్సు ఒక్కసారిగా మంటల్లో చిక్కుకుంది. ఖమ్మం నుంచి విశాఖపట్నం వైపు వెళ్తున్న ఈ బస్సులో సెల్ఫ్ మోటార్లో షార్ట్ సర్క్యూట్ జరగడంతో అగ్ని ప్రమాదం చోటుచేసుకున్నట్లు పోలీసులు వెల్లడించారు. వేకువజామున రాకపోకలు తక్కువగా ఉండటంతో పాటు డ్రైవర్ అప్రమత్తత కారణంగా భారీ ప్రాణ నష్టం తప్పినట్లైంది.
డీఎస్పీ దేవకుమార్, కొవ్వూరు సీఐ కె. విశ్వం తెలిపిన వివరాల ప్రకారం.. బస్సు కొవ్వూరు ఫ్లైఓవర్పైకి చేరుకున్న సమయంలో అకస్మాత్తుగా బస్సు ముందు భాగం నుంచి పొగలు రావడం ప్రారంభమైంది. వెంటనే అప్రమత్తమైన డ్రైవర్ పరిస్థితిని అంచనా వేసి బస్సును రోడ్డుపక్కన నిలిపివేశాడు. మంటలు వేగంగా వ్యాపిస్తున్నట్లు గమనించిన సిబ్బంది, ప్రయాణికులను ఎలాంటి గందరగోళం లేకుండా వెంటనే కిందికి దించారు. ఈ బస్సులో మొత్తం ఆరుగురు ప్రయాణికులు, నలుగురు సిబ్బంది ఉండగా, అందరూ సురక్షితంగా బయటపడటం ఊరట కలిగించింది.
ప్రమాద సమాచారం అందుకున్న వెంటనే స్థానిక అగ్నిమాపక శాఖ సిబ్బంది ఘటనా స్థలానికి చేరుకున్నారు. రెండు ఫైర్ ఇంజిన్లతో మంటలను అదుపులోకి తీసుకువచ్చారు. అయితే అప్పటికే బస్సు పూర్తిగా అగ్నికి ఆహుతై దగ్ధమైంది. ఫ్లైఓవర్పై కొద్దిసేపు ట్రాఫిక్కు అంతరాయం ఏర్పడినప్పటికీ, పోలీసులు వెంటనే చర్యలు తీసుకోవడంతో పరిస్థితి అదుపులోకి వచ్చింది. అనంతరం ప్రయాణికులను మరో బస్సులో వారి గమ్యస్థానాలకు తరలించినట్లు అధికారులు తెలిపారు.
ఈ ఘటనలో సుమారు రూ.80 లక్షల వరకు ఆస్తి నష్టం వాటిల్లినట్లు కొవ్వూరు అగ్నిమాపక అధికారి ఏవీఎన్ఎస్ వేణు వెల్లడించారు. ప్రైవేట్ బస్సుల్లో భద్రతా ప్రమాణాలు, ఎలక్ట్రికల్ వ్యవస్థల నిర్వహణపై మరింత కఠినంగా చర్యలు తీసుకోవాల్సిన అవసరం ఉందని అధికారులు సూచిస్తున్నారు. ఇటువంటి ఘటనలు మళ్లీ పునరావృతం కాకుండా రవాణా శాఖ, యాజమాన్యాలు ముందస్తు తనిఖీలు నిర్వహించాలని ప్రయాణికులు కోరుతున్నారు. డ్రైవర్ అప్రమత్తతే ఈ ఘటనలో ప్రాణాలను కాపాడిందని స్థానికులు ప్రశంసలు వ్యక్తం చేస్తున్నారు.
