Gottipati Ravi: విధ్వంసమైన విద్యుత్ వ్యవస్థను రెండేళ్లలో గాడిలో పెట్టాం: మంత్రి గొట్టిపాటి

విద్యుత్ చార్జీల పెంపు లేదు.. వచ్చే మూడేళ్లూ భారం ఉండదు: గొట్టిపాటి..

ట్రూ అప్ నుంచి ట్రూ డౌన్ వరకు.. విద్యుత్ రంగంలో కీలక మార్పులు..

అమరావతి: రాష్ట్ర విద్యుత్ వ్యవస్థను గత రెండేళ్లలో మళ్లీ బలోపేతం చేశామని ఇంధన శాఖ మంత్రి గొట్టిపాటి రవి కుమార్ తెలిపారు. ముఖ్యమంత్రి నారా చంద్రబాబు నాయుడు నాయకత్వంలోని కూటమి ప్రభుత్వం ఏర్పడిన తర్వాత విద్యుత్ రంగంలో కీలక మార్పులు తీసుకొచ్చామని ఆయన పేర్కొన్నారు.

కూటమి ప్రభుత్వం రెండేళ్ల పాలన పూర్తి చేసుకున్న సందర్భంగా మంత్రి గొట్టిపాటి విడుదల చేసిన ప్రకటనలో విద్యుత్ రంగ అభివృద్ధికి తీసుకున్న చర్యలను వివరించారు. గత ప్రభుత్వం హయాంలో విద్యుత్ వ్యవస్థ తీవ్ర ఆర్థిక సమస్యల్లోకి వెళ్లిందని, దానిని క్రమంగా సరిదిద్దామని చెప్పారు.

గత రెండేళ్లలో ఒక్క రూపాయి కూడా విద్యుత్ ఛార్జీలు పెంచలేదని మంత్రి స్పష్టం చేశారు. రాబోయే మూడేళ్లలో కూడా వినియోగదారులపై ఎలాంటి విద్యుత్ ఛార్జీల పెంపు లేదా అదనపు భారం ఉండదని హామీ ఇచ్చారు.

గతంలో అమలు చేసిన ట్రూ అప్ విధానానికి బదులుగా కూటమి ప్రభుత్వం ట్రూ డౌన్ విధానం అమలు చేసిందని మంత్రి తెలిపారు. విద్యుత్ వినియోగదారులపై భారం తగ్గిస్తూ 13 పైసల ట్రూ డౌన్ అమలు చేసినట్లు వెల్లడించారు.

గత వైసీపీ ప్రభుత్వం విద్యుత్ ఛార్జీలను పలుమార్లు పెంచి ప్రజలపై భారం మోపిందని మంత్రి విమర్శించారు. దీనికి భిన్నంగా ప్రస్తుత ప్రభుత్వం ప్రజా ప్రయోజనాలను దృష్టిలో ఉంచుకుని విద్యుత్ రంగాన్ని ఆర్థికంగా బలోపేతం చేస్తోందని చెప్పారు.

విద్యుత్ ఉత్పత్తి సామర్థ్యాన్ని పెంచడం ద్వారా ఇతర రాష్ట్రాల నుంచి విద్యుత్ కొనుగోళ్లను తగ్గించామని తెలిపారు. భవిష్యత్ అవసరాలను దృష్టిలో ఉంచుకుని సంప్రదాయేతర ఇంధన రంగంలో 160 గిగావాట్ల విద్యుత్ ఉత్పత్తి లక్ష్యంగా ముందుకు సాగుతున్నామని వివరించారు.

ప్రధానమంత్రి నరేంద్ర మోదీ ప్రారంభించిన పీఎం సూర్యఘర్ పథకం ద్వారా రాష్ట్రంలోని ఎస్సీ, ఎస్టీ కుటుంబాలకు 6 లక్షల ఉచిత సోలార్ కనెక్షన్లు అందించేందుకు చర్యలు తీసుకుంటున్నామని మంత్రి చెప్పారు. సోలార్ విద్యుత్ వినియోగం పెంచడం ద్వారా ప్రజలకు, రాష్ట్రానికి ప్రయోజనం చేకూరుతుందని తెలిపారు.

గ్రామీణ ప్రాంతాల్లో విద్యుత్ మౌలిక సదుపాయాలను మెరుగుపరిచేందుకు ఆర్డీఎస్ఎస్ పథకం కింద పనులు చేపడుతున్నామని మంత్రి వెల్లడించారు. కొత్త సబ్‌స్టేషన్లు, ట్రాన్స్‌మిషన్ లైన్ల నిర్మాణం ద్వారా విద్యుత్ సరఫరా నాణ్యతను పెంచుతున్నామని చెప్పారు.

ట్రాన్స్‌మిషన్ నష్టాలను తగ్గించడం, విద్యుత్ అంతరాయాలు, లో వోల్టేజ్ సమస్యలను తగ్గించడం లక్ష్యంగా ప్రభుత్వం చర్యలు తీసుకుంటోందని మంత్రి గొట్టిపాటి రవి కుమార్ తెలిపారు. రాష్ట్ర ప్రజలకు నాణ్యమైన విద్యుత్ అందించడమే ప్రభుత్వ లక్ష్యమని స్పష్టం చేశారు.