ఉచిత బస్సు! పర్సులు గల్లంతు! చిల్లర దొంగల హవా!

• ఉచిత ప్రయాణంతో ఆర్టీసీ బస్సుల్లో మహిళా ప్రయాణికుల రద్దీ పెరిగింది.
• బస్టాండ్లు, రద్దీ ప్రాంతాల్లో ప్రత్యేక నిఘా ఏర్పాటు చేస్తున్నట్లు పోలీసులు తెలిపారు.

కొత్తకోట: మహిళలకు ఆర్టీసీ బస్సుల్లో ఉచిత ప్రయాణ సౌకర్యం అందుబాటులోకి రావడంతో బస్సుల్లో రద్దీ గణనీయంగా పెరిగింది. ఇదే రద్దీని కొందరు దొంగలు తమకు అనుకూలంగా మార్చుకుంటున్నారు. బస్సుల్లో ప్రయాణికుల రద్దీని ఆసరాగా చేసుకుని పర్సులు, నగదు, మొబైల్ ఫోన్లు, బంగారు ఆభరణాలు చోరీ చేస్తున్న ఘటనలు జిల్లాలో తరచూ చోటుచేసుకుంటున్నాయి.

47 మంది ప్రయాణించాల్సిన బస్సుల్లో కొన్నిసార్లు 70 మందికి పైగా ప్రయాణికులు ఎక్కుతుండటంతో నిలబడేందుకు కూడా ఇబ్బందికర పరిస్థితులు ఏర్పడుతున్నాయి. బస్సు ఎక్కే సమయంలో, దిగే సమయంలో జరిగే తోపులాటను దొంగలు అవకాశంగా మార్చుకుంటున్నట్లు తెలుస్తోంది.

రద్దీ బస్సులే టార్గెట్

వనపర్తి డిపో పరిధిలోని 'కొత్తకోట–ఆత్మకూర్, వనపర్తి–పానగల్, వనపర్తి–పెబ్బేరు' మార్గాల్లో ప్రయాణికుల రద్దీ ఎక్కువగా ఉంటోంది. ముఖ్యంగా మహిళలు అధిక సంఖ్యలో ప్రయాణించే బస్సులను కొందరు దొంగలు లక్ష్యంగా చేసుకుంటున్నారని స్థానికులు చెబుతున్నారు.

ప్రయాణికులు బస్సు ఎక్కుతున్న సమయంలో లేదా తమ గమ్యస్థానంలో దిగుతున్న సమయంలో రద్దీని ఉపయోగించుకుని పర్సులు, మొబైల్ ఫోన్లు, మెడలోని బంగారు గొలుసులు, చిన్నారుల ఆభరణాలను అపహరిస్తున్న ఘటనలు నమోదవుతున్నాయి.

బస్టాండ్లలోనూ ఇదే పరిస్థితి

కొత్తకోట, వనపర్తి, ఆత్మకూర్ బస్టాండ్లలో ఇలాంటి ఘటనలు తరచూ జరుగుతున్నట్లు సమాచారం. పండగలు, సెలవుల సమయంలో రద్దీ మరింత పెరగడంతో దొంగలకు మరింత అవకాశం లభిస్తోందని ప్రయాణికులు అంటున్నారు.

చోరీ జరిగిన తర్వాత చాలామంది బాధితులు పోలీసులకు ఫిర్యాదు చేయకుండానే ఇంటికి వెళ్లిపోతున్నారని తెలుస్తోంది. దీంతో కొన్ని ఘటనలు అధికారికంగా నమోదు కాకపోవడంతో అసలు చోరీల సంఖ్య మరింత ఎక్కువగా ఉండొచ్చనే అభిప్రాయాలు వ్యక్తమవుతున్నాయి.

మహిళ పర్సు చోరీ

కొత్తకోటకు చెందిన ఓ మహిళ వనపర్తికి వెళ్లేందుకు ఆర్టీసీ బస్సు ఎక్కారు. ఆమె పర్సులో 2 గ్రాముల బంగారం, రూ.9 వేల నగదు ఉన్నట్లు సమాచారం. తన గమ్యస్థానంలో బస్సు దిగిన తర్వాత పర్సు కనిపించకపోవడంతో చోరీ జరిగినట్లు గుర్తించారు. అయితే ఆమె పోలీసులకు ఫిర్యాదు చేయకుండానే వెళ్లిపోయారు.

నిఘా పెంచాలని డిమాండ్

బస్టాండ్లు, రద్దీ ప్రాంతాల్లో పోలీసుల నిఘా మరింత పెంచాలని ప్రయాణికులు కోరుతున్నారు. ముఖ్యంగా మఫ్టీలో పోలీసులు ఉండటంతో పాటు అనుమానాస్పద వ్యక్తుల కదలికలను పరిశీలించాలని సూచిస్తున్నారు. బస్టాండ్లలో సీసీ కెమెరాల పర్యవేక్షణను పెంచాలని కూడా డిమాండ్ చేస్తున్నారు.

ఇప్పటికే కొందరు దొంగల అరెస్ట్

ఈ ఘటనలపై పోలీసులు దృష్టి సారించినట్లు వనపర్తి డీఎస్పీ గిరిబాబు తెలిపారు. కొత్తకోట, వనపర్తి, పెబ్బేరు బస్టాండ్లలో ప్రత్యేక నిఘా ఏర్పాటు చేస్తున్నామని, ఇప్పటికే కొంతమంది దొంగలను పట్టుకుని రిమాండ్‌కు తరలించినట్లు చెప్పారు. బస్టాండ్లలో మఫ్టీ పోలీసులను కూడా ఏర్పాటు చేస్తామని వెల్లడించారు.

ఉచిత ప్రయాణంతో పెరిగిన రద్దీ నేపథ్యంలో ప్రయాణికులు కూడా తమ నగదు, మొబైల్ ఫోన్లు, బంగారు ఆభరణాల విషయంలో అప్రమత్తంగా ఉండాలని పోలీసులు సూచిస్తున్నారు.