ముంబైలో జరిగిన మైక్రోసాఫ్ట్ AI టూర్ కార్యక్రమంలో సంస్థ సీఈఓ సత్య నాదెళ్ల కృత్రిమ మేధస్సు మారుస్తున్న ప్రపంచ దృశ్యంపై విస్తృతంగా మాట్లాడారు. AI వలన ఇప్పుడు “సాధ్యమయ్యే పరిధి” ఊహించని వేగంతో పెరుగుతోందని ఆయన చెప్పారు. ప్రభుత్వాలు నుంచి చిన్న వ్యాపారాల వరకు, వ్యక్తుల నుంచి గ్లోబల్ కంపెనీల వరకు అందరూ తమ పనితీరును AI సహాయంతో మళ్లీ నిర్వచించే దశకు వచ్చారని నాదెళ్ల అభిప్రాయపడ్డారు.
కస్టమర్ సేవలు, ఉద్యోగుల పనితీరు, నిర్ణయాలు తీసుకునే విధానం, సంస్థల అంతర్గత కార్యకలాపాలు ఇవన్ని ఇప్పుడు సాంకేతికత ఆధారంగా మరింత సమర్థవంతంగా మారుతున్నాయని ఆయన పేర్కొన్నారు. టెక్నాలజీ గురించి మాట్లాడినప్పుడు కొత్త అవకాశాలపై ఉత్సాహం రావడం సహజమేనని, AI మన జీవన విధానాన్ని ప్రతి రంగంలో మలుపు తిప్పుతోందని నాదెళ్ల అన్నారు.
ప్రత్యేకంగా ఎక్కువ నియంత్రణలతో పనిచేసే ఔషధ పరిశ్రమ కూడా AIతో భారీ మార్పులను చూస్తోందని ఆయన తెలిపారు. మందుల అభివృద్ధిలో కీలకమైన క్లినికల్ ట్రయల్స్ను వేగంగా పూర్తిచేయడానికి AI పెద్ద సహాయంగా మారుతోందని చెప్పారు. దీని వల్ల ప్రయోగ దశల్లో గడిచే సమయం తగ్గి, మందులను మార్కెట్లోకి త్వరగా తీసుకురావడం సాధ్యమవుతుందని నాదెళ్ల పేర్కొన్నారు. ప్రపంచవ్యాప్తంగా పరిశ్రమలు “ఫ్రంటియర్ టెక్నాలజీస్” వైపు పరుగులు తీస్తున్నాయని, కొత్త సామర్థ్యాలు అందిస్తున్న అవకాశాలను ఉపయోగించుకోవడంలో ప్రతి కంపెనీ పోటీ పడుతోందని ఆయన వివరించారు.
పాత పద్ధతులు ఇక సరిపోని సమయం ఇది ఇప్పుడు కొత్త ఆలోచనలు, కొత్త సాధనాలు అవసరమని ఆయన స్పష్టం చేశారు. AI అభివృద్ధి విధానం సంప్రదాయ సాఫ్ట్వేర్ డెవలప్మెంట్తో పోలిస్తే పూర్తిగా భిన్నంగా సాగుతుందని నాదెళ్ల తెలిపారు. గతంలో ఏదైనా సిస్టమ్ను రూపొందించాలంటే ముందుగా పెద్ద స్పెసిఫికేషన్ తయారు చేసి, ఆపై నిర్మాణాన్ని ప్రారంభించేవారు. కానీ AIలో మాత్రం ముందుగా “స్పెక్” కాకుండా “టెస్ట్”తో ప్రారంభించాలి అని ఆయన అన్నారు.
ముందే కావలసిన ఫలితాన్ని కొలిచే ప్రమాణాన్ని నిర్ణయించి, దానికి అనుగుణంగా మోడల్ను మళ్లీ మళ్లీ మెరుగుపరిచే విధానమే AI అభివృద్ధి. సంప్రదాయ రీతిలో ఎడమ నుంచి కుడికి కదిలే ప్రక్రియ ఇక్కడ పూర్తిగా తిరగబడిందని నాదెళ్ల వివరించారు. ఈ విధానం వల్ల సమస్యను చూడే కోణం మారిపోతుందని, అదే AIను ప్రత్యేకంగా నిలబెడుతుందని చెప్పారు.
ఈ కొత్త దశలో నిలబడాలంటే వ్యక్తులూ, కంపెనీలూ కొత్త నైపుణ్యాలను నేర్చుకోవాల్సిన అవసరం ఉందని నాదెళ్ల స్పష్టం చేశారు. పాత అలవాట్లను “అన్లెర్న్” చేసి, డేటా, సాధనాలు, వర్క్ఫ్లో ఒకే వేదికపై కలిసేలా రూపొందించగలిగితేనే AIను నిజమైన రోజువారీ పనిలో ఉపయోగించగలమన్నారు. AIను కేవలం టెక్నాలజీ మాటలా కాకుండా, ప్రతిరోజూ ఉపయోగించే సాధనంగా మార్చుకోవడం కాలం డిమాండ్ అని ఆయన చెప్పారు. ఇదే మార్పు ప్రపంచాన్ని కొత్త దిశల్లో నడిపిస్తోందని, ఇది కేవలం టెక్ రంగం మార్పు మాత్రమే కాకుండా ప్రపంచవ్యాప్తంగా ఆలోచనా విధానం మారుకునే దశ అని వ్యాఖ్యానించారు.
