ఆన్లైన్ బెట్టింగ్ వల్ల యువత వ్యసనాలకు బానిసలు
242 అక్రమ బెట్టింగ్ వెబ్సైట్లు కేంద్రం బ్లాక్
8 వేల జూదం వెబ్సైట్లపై కఠిన చర్యలు
ఆన్లైన్ గేమింగ్ యాక్ట్తో రియల్ మనీ గేమ్స్ నిషేధం
ఆన్లైన్ బెట్టింగ్, జూదం కారణంగా యువత వ్యసనాలకు బానిసలవుతూ ఆర్థికంగా తీవ్ర నష్టాలు చవిచూస్తున్నారని కేంద్ర ప్రభుత్వం గుర్తించింది. ఈ అక్రమ కార్యకలాపాల వల్ల కుటుంబాలు అప్పుల పాలవడం, సామాజికంగా సమస్యలు పెరుగుతున్నాయని పేర్కొంది. యువత భవిష్యత్తును దెబ్బతీస్తున్న ఈ పరిణామాలను అరికట్టేందుకు కేంద్రం కఠిన చర్యలు చేపట్టినట్లు అధికార వర్గాలు వెల్లడించాయి.
అక్రమ బెట్టింగ్, ఆన్లైన్ జూదాన్ని ప్రోత్సహిస్తున్న వెబ్సైట్లపై దేశవ్యాప్తంగా పెద్ద ఎత్తున చర్యలు తీసుకున్నట్లు కేంద్రం ప్రకటించింది. ఈ క్రమంలో 242 బెట్టింగ్, జూదం వెబ్సైట్లను బ్లాక్ చేసినట్లు తెలిపింది. ఇప్పటి వరకు బెట్టింగ్, జూదానికి సంబంధించిన దాదాపు 8 వేల వెబ్సైట్లపై చర్యలు తీసుకున్నామని స్పష్టం చేసింది.
యువతను తప్పుదోవ పట్టిస్తూ సమాజానికి ముప్పుగా మారుతున్న ఈ అక్రమ కార్యకలాపాలపై కఠినంగా వ్యవహరిస్తామని కేంద్రం హెచ్చరించింది. ఆన్లైన్ బెట్టింగ్ కారణంగా ఆర్థికంగా చితికిపోతున్న కుటుంబాల సంఖ్య పెరుగుతోందని అధికారులు ఆందోళన వ్యక్తం చేశారు. ఈ నేపథ్యంలో ప్రజల భద్రతే లక్ష్యంగా ఈ నిర్ణయాలు తీసుకున్నామని తెలిపారు.
ఈ పరిస్థితులను దృష్టిలో పెట్టుకుని కేంద్ర ప్రభుత్వం గతేడాది అక్టోబర్లో ఆన్లైన్ గేమింగ్ యాక్ట్–2023ను అమల్లోకి తీసుకువచ్చింది. ఈ చట్టం ప్రకారం నగదు లావాదేవీలతో కూడిన గేమ్స్పై నిషేధం విధించడంతో పాటు రియల్ మనీ గేమ్స్పై కఠిన నియంత్రణలు అమలు చేస్తున్నట్లు పేర్కొంది. ఈ నిర్ణయాల ప్రభావంతో వింజో, నజారా టెక్నాలజీస్ వంటి ప్రముఖ ఆన్లైన్ గేమింగ్ సంస్థలు రియల్ మనీ గేమ్స్ను నిలిపివేశాయి.కేంద్ర ఎలక్ట్రానిక్స్, ఐటీ శాఖ ఆధ్వర్యంలో దేశీయంగా మాత్రమే కాకుండా విదేశీ సర్వర్ల ద్వారా నడుస్తున్న అక్రమ బెట్టింగ్ వేదికలను కూడా గుర్తించారు. సామాజిక మాధ్యమాల ద్వారా ప్రచారం చేస్తున్న వెబ్సైట్లపై నిఘా పెట్టి ఇప్పటి వరకు దాదాపు 8 వేల సైట్లపై చర్యలు తీసుకున్నట్లు అధికారులు తెలిపారు.
