Sports News: క్రికెట్ ప్రపంచంలోకి మరో దిగ్గజ పారిశ్రామికవేత్త.. ఐపీఎల్ గ్లామర్‌ను పెంచనున్న మిట్టల్-పూనావాలా జోడీ.!

• Sports: దాదాపు రూ. 13,700 కోట్లుగా ఫ్రాంచైజీ విలువ..
   
• జట్టులో 75 శాతం వాటా మిట్టల్ కుటుంబానికి సొంతం..

Sports News: ప్రముఖ పారిశ్రామికవేత్త లక్ష్మీ ఎన్. మిట్టల్ కుటుంబం ఇండియన్ ప్రీమియర్ లీగ్ (ఐపీఎల్) రంగంలోకి భారీ పెట్టుబడులతో అడుగుపెట్టింది. రాజస్థాన్ రాయల్స్ ఫ్రాంచైజీని మనోజ్ బడాలే నేతృత్వంలోని కన్సార్టియం నుండి కొనుగోలు చేస్తున్నట్లు మిట్టల్ కుటుంబం ఆదివారం అధికారికంగా ప్రకటించింది. ఈ మెగా డీల్‌లో 'వ్యాక్సిన్ ప్రిన్స్' గా పేరుగాంచిన అదర్ పూనావాలా కూడా భాగస్వామిగా చేరడం విశేషం. గతంలో కల్ సోమానీ కన్సార్టియం ఈ జట్టును కొనుగోలు చేసేందుకు ప్రయత్నించి నిధుల కొరతతో విఫలం కాగా, ఇప్పుడు మిట్టల్ కుటుంబం రంగంలోకి దిగి ఈ కొనుగోలు ప్రక్రియను ఖరారు చేసింది.

ఈ భారీ ఒప్పందం ప్రకారం, రాజస్థాన్ రాయల్స్‌లో మిట్టల్ కుటుంబం సుమారు 75 శాతం మెజారిటీ వాటాను కలిగి ఉండనుంది. మిగిలిన వాటాల్లో అదర్ పూనావాలాకు 18 శాతం, మనోజ్ బడాలేతో కూడిన పాత పెట్టుబడిదారులకు 7 శాతం వాటా లభిస్తుంది. కేవలం భారతీయ ఐపీఎల్ జట్టు మాత్రమే కాకుండా, దక్షిణాఫ్రికాలోని పార్ల్ రాయల్స్, కరీబియన్ లీగ్‌లోని బార్బడోస్ రాయల్స్‌ను కలుపుకుని ఈ మొత్తం డీల్ విలువ సుమారు 1.65 బిలియన్ డాలర్లు (సుమారు రూ. 13,700 కోట్లు) ఉంటుందని అంచనా వేస్తున్నారు. ఫ్రాంచైజీ వ్యవస్థాపకుడైన బడాలే తన అనుభవంతో జట్టు అభివృద్ధికి సహకరిస్తూనే ఉంటారని నూతన యాజమాన్యం స్పష్టం చేసింది.

తమ స్వస్థలమైన రాజస్థాన్ జట్టును సొంతం చేసుకోవడం పట్ల లక్ష్మీ మిట్టల్ హర్షం వ్యక్తం చేస్తూ, క్రికెట్‌పై ఉన్న మక్కువతోనే ఈ నిర్ణయం తీసుకున్నట్లు తెలిపారు. ఫ్రాంచైజీ వారసత్వాన్ని కాపాడుతూనే యువ ప్రతిభను వెలికితీస్తామని ఆయన కుమారుడు ఆదిత్య మిట్టల్ పేర్కొన్నారు. బీసీసీఐ మరియు ఐపీఎల్ గవర్నింగ్ కౌన్సిల్ నుండి అవసరమైన అధికారిక అనుమతులు పొందిన తర్వాత, ఈ కొనుగోలు ప్రక్రియ 2026 మూడో త్రైమాసికం నాటికి పూర్తిగా ముగిసే అవకాశం ఉంది. కరోనా సమయంలో కొవిషీల్డ్ వ్యాక్సిన్‌తో ప్రపంచ గుర్తింపు పొందిన అదర్ పూనావాలా రాకతో రాజస్థాన్ రాయల్స్ ఫ్రాంచైజీకి మరింత గ్లామర్ చేకూరింది.