ఉక్రెయిన్ అధ్యక్షుడు వోలోడిమిర్ జెలెన్స్కీ (Volodymyr Zelensky) సతీమణి, ఫస్ట్ లేడీ ఒలీనా వొలోడిమిరివ్నా ఇటీవల భారతదేశంలోని జైపూర్ ఎయిర్‌పోర్ట్‌ను సందర్శించడం పెద్ద ఊహించని పరిణామంగా మారింది. అయితే ఇది ముందుగా ప్లాన్ చేసిన పర్యటన కాదని, పూర్తిగా ఒక అత్యవసర పరిస్థితిలో భాగంగా జరిగిన సంఘటన అని తెలుస్తోంది.
జపాన్ టూర్‌కు వెళ్తున్న సందర్భంగా, ఒలీనా ప్రయాణిస్తున్న విమానానికి ఆకాశమార్గంలో ఇంధనం అయిపోవడం వల్ల, తాత్కాలికంగా జైపూర్ ఎయిర్‌పోర్ట్‌లో ల్యాండింగ్ చేయాల్సి వచ్చింది. ఇది పూర్తిగా సాంకేతిక, భద్రతాపరమైన చర్యగా అధికారులు వివరించారు. ఎమర్జెన్సీ ల్యాండింగ్ అనంతరం, విమానానికి తిరిగి ఇంధనం నింపే వరకు ఆమె ఎయిర్‌పోర్టులో ఉన్న వీఐపీ లాంజ్‌లో కొద్దిసేపు విశ్రాంతి తీసుకున్నారు.
ఈ ప్రయాణంలో ఒలీనా వొలోడిమిరివ్నాకు తోడుగా ఉక్రెయిన్ డిప్యూటీ విదేశాంగ మంత్రితోపాటు పలువురు ఉన్నతాధికారులు కూడా ఉన్నారు. జైపూర్ ఎయిర్‌పోర్ట్ వర్గాలు ఈ విషయాన్ని గోప్యతగా ఉంచగా, ఇటీవలే ఈ సమాచారం మీడియా ద్వారా వెలుగులోకి వచ్చింది. అంతర్జాతీయ డెలిగేట్ల భద్రతను దృష్టిలో ఉంచుకొని, అప్పట్లో దీనిపై అధికారిక ప్రకటన చేయలేదు.
ఎయిర్‌పోర్ట్ సిబ్బంది వెంటనే అప్రమత్తమై, ఎలాంటి అసౌకర్యం కలగకుండా వీఐపీ లాంజ్ ఏర్పాట్లు చేశారు. కొన్ని గంటల విరామం అనంతరం, ఇంధనం నింపిన తరువాత విమానం మళ్లీ జపాన్ దిశగా పయనమైంది. ఫస్ట్ లేడీ పర్యటన లేదని భావించిన పరిస్థితుల్లో ఆమెకు సంబంధించి ఈ విధంగా సమాచారం రావడం ఆశ్చర్యంగా మారింది.
ఈ ఘటనపై భారత వైమానిక నిబంధనలు, అంతర్జాతీయ ప్రమాణాల ప్రకారం ఎలాంటి గందరగోళం లేకుండా వ్యవహరించినందుకు భారత ఎయిర్‌పోర్ట్ అధికారులను పలువురు ప్రశంసిస్తున్నారు.
