గిరిజన విద్యార్థుల పోస్ట్ మెట్రిక్ స్కాలర్షిప్లకు సంబంధించి పెండింగ్లో ఉన్న బకాయిలను కూటమి ప్రభుత్వం పూర్తిగా పరిష్కరించింది. గత ప్రభుత్వ హయాంలో విడుదల కాకుండా మిగిలిపోయిన స్కాలర్షిప్ నిధులను అత్యంత ప్రాధాన్యంగా తీసుకుని, నేరుగా లబ్ధిదారుల ఖాతాల్లో జమ చేసినట్లు గిరిజన సంక్షేమ శాఖ మంత్రి గుమ్మిడి సంధ్యారాణి వెల్లడించారు. దీనివల్ల వేలాది మంది గిరిజన విద్యార్థులకు ఆర్థిక ఊరట లభించిందన్నారు.
2023–24 విద్యా సంవత్సరానికి సంబంధించి గత ప్రభుత్వం కేవలం రూ.18.67 కోట్లు మాత్రమే విడుదల చేసిందని మంత్రి తెలిపారు. అయితే అప్పట్లో పెండింగ్లో ఉన్న మూడు త్రైమాసికాల స్కాలర్షిప్ బకాయిలకు గాను, కూటమి ప్రభుత్వం రూ.71.67 కోట్లను విడుదల చేసి 69,227 మంది విద్యార్థుల తల్లుల బ్యాంక్ ఖాతాల్లో నేరుగా జమ చేసిందన్నారు. ఈ చర్యతో పాత బకాయిల సమస్య పూర్తిగా పరిష్కారమైందని పేర్కొన్నారు.
అలాగే 2024–25 విద్యా సంవత్సరానికి సంబంధించి కూడా స్కాలర్షిప్ నిధులను సకాలంలో విడుదల చేశామని మంత్రి తెలిపారు. ఈ ఏడాదికి ఆర్టీఎఫ్ (RTF) కింద రూ.85.67 కోట్లను కళాశాలల ఖాతాల్లోకి, ఎంటీఎఫ్ (MTF) కింద రూ.9.11 కోట్లను విద్యార్థుల తల్లుల ఖాతాల్లోకి జమ చేశామని చెప్పారు. మొత్తం 42,203 మంది విద్యార్థులు ఈ నిధుల ద్వారా లబ్ధి పొందారని వివరించారు.
ప్రస్తుతం 2025–26 విద్యా సంవత్సరానికి అర్హులైన గిరిజన విద్యార్థులకు కూడా స్కాలర్షిప్ నిధులు విడుదల చేస్తున్నట్లు మంత్రి సంధ్యారాణి వెల్లడించారు. ఇప్పటి వరకు మొత్తం రూ.100.93 కోట్లను విడుదల చేసి, 59,297 మంది విద్యార్థులకు ఆర్థిక సహాయం అందించినట్లు తెలిపారు. ప్రభుత్వం విద్యను అత్యంత ప్రాధాన్యంగా తీసుకుంటోందని ఈ చర్యలు స్పష్టం చేస్తున్నాయన్నారు.
ఈ స్కాలర్షిప్ నిధుల విడుదలతో గిరిజన విద్యార్థుల చదువులు అడ్డంకులు లేకుండా కొనసాగుతాయని మంత్రి తెలిపారు. విద్యార్థులు ఆర్థిక ఇబ్బందుల కారణంగా చదువులు మానేయకుండా, ఉన్నత విద్యను పూర్తి చేసేలా ప్రభుత్వం అన్ని చర్యలు తీసుకుంటుందని స్పష్టం చేశారు. గిరిజన విద్యార్థుల భవిష్యత్ను బలపర్చడమే కూటమి ప్రభుత్వ లక్ష్యమని మంత్రి పేర్కొన్నారు.
