స్థానిక సంస్థల ఎన్నికలు సాధారణంగా గ్రామాల రాజకీయ వాతావరణాన్ని మార్చుతాయి. కానీ వికారాబాద్ జిల్లా బషీరాబాద్ మండలం మతన్గౌడ్ గ్రామంలో మాత్రం ఈ ఎన్నికలు ఒక నిరుపేద కుటుంబం అదృష్టాన్ని పూర్తిగా మార్చే విధంగా మారాయి. రిజర్వేషన్ల వ్యవస్థ పుణ్యమానే అనాలి… ఒకే కుటుంబానికి సర్పంచ్తో పాటు రెండు వార్డు మెంబర్ పదవులు కూడా దక్కే అరుదైన పరిస్థితి ఏర్పడింది. ఈ సంఘటన గ్రామంలోనే కాకుండా మొత్తం జిల్లాలో చర్చనీయాంశంగా మారింది.
మతన్గౌడ్ గ్రామ పంచాయతీ సర్పంచ్ పదవిని ఈసారి ఎస్టీ వర్గానికి రిజర్వ్ చేశారు. అయితే గ్రామంలోని ఓటర్ల సంఖ్య 494. వాటిలో ఎరుకల భీమప్ప కుటుంబమే ఏకైక ఎస్టీ కుటుంబం. కాబట్టి పోటీ, ప్రచారం, ఎదురుదెబ్బ ఏమీ లేకుండానే ఈ సర్పంచ్ స్థానం నేరుగా భీమప్ప కుటుంబానికే దక్కడం ఖాయమైంది. భీమప్ప తన భార్య వెంకటమ్మతో కలిసి చీపుర్లు, బుట్టలు తయారు చేసి అమ్ముతూ జీవనం సాగిస్తున్నారు. ఆర్థికంగా బలహీనంగా ఉన్నా, గ్రామంలో అందరికీ సహాయకారి, మృదువుగా ఉండే వ్యక్తిగా పేరుంది. వారి కుటుంబం అకస్మాత్తుగా గ్రామ రాజకీయాల కేంద్రబిందువుగా మారడం గ్రామస్తులకు కూడా ఆశ్చర్యమే.
కేవలం సర్పంచ్ స్థానం మాత్రమే కాదు, వార్డు సభ్యుల స్థానాల్లో కూడా అద్భుత పరిణామం చోటుచేసుకుంది. గ్రామంలో ఎస్టీ జనరల్ మరియు ఎస్టీ మహిళలకు రిజర్వ్ చేసిన రెండు వార్డులు ఉన్నాయి. గ్రామంలో వేరే ఎస్టీ కుటుంబాలు లేకపోవడంతో ఈ రెండు పదవులూ భీమప్ప కుటుంబ సభ్యులకు దక్కనున్నాయి. భీమప్పకు ఇద్దరు కుమారులు ఎల్లప్ప, మహేశ్, అలాగే కోడళ్లు సప్న, సుజాత ఉన్నారు. కుమారులు ఆటో నడుపుతూ జీవనం సాగిస్తున్నారు. రాజకీయ అనుభవం ఏమీ లేకున్నా, ఒక్కసారిగా వారిపై గ్రామ బాధ్యతలు పడుతుండటం కుటుంబానికి కూడా ఒక కొత్త ప్రయాణం.
ఒక నిరుపేద ఎస్టీ కుటుంబం ఇలా మూడు ప్రజాప్రతినిధి పదవులను పొందడం అరుదైన సందర్భం. ఈ ఎన్నికలు వారి ఆర్థిక పరిస్థితిని మాత్రమే కాకుండా, వారి సామాజిక స్థితిని కూడా పూర్తిగా మార్చే అవకాశం ఉంది. గ్రామస్తులు కూడా “ఇది వారి కుటుంబానికి దేవుడు ఇచ్చిన దీవెన” అంటూ మాట్లాడుకుంటున్నారు. భీమప్ప కుటుంబం అధికారంలోకి వస్తే గ్రామ అభివృద్ధిలోకి కొత్త ఉత్సాహం వస్తుందని గ్రామస్థులు ఆశాభావం వ్యక్తం చేస్తున్నారు. ఊహించని రాజకీయ అవకాశంతో వారి జీవితాల్లో కొత్త వెలుగులు నిండబోతున్నాయి.
