దేశంలోని పేద మరియు మధ్యతరగతి ప్రజలకు మెరుగైన వైద్య సేవలు అందించే లక్ష్యంతో కేంద్ర ప్రభుత్వం ఆయుష్మాన్ భారత్ ప్రధానమంత్రి జన్ ఆరోగ్య యోజన (AB-PMJAY) పథకాన్ని ప్రారంభించింది. ఈ పథకం కింద ప్రతి కుటుంబానికి ఏటా రూ. 5 లక్షల ఉచిత ఆరోగ్య బీమా లభిస్తున్న విషయం తెలిసిందే.
అయితే, కేంద్ర ప్రభుత్వం ఈ ఉచిత బీమా పథకంలో కీలకమైన మార్పును తీసుకొచ్చింది. ఈ మార్పు ద్వారా కొన్ని అర్హత గల కుటుంబాలు తమ బీమా పరిమితిని రూ. 5 లక్షల నుంచి రూ. 10 లక్షల వరకు పెంచుకునే 'టాప్-అప్' అవకాశాన్ని కల్పిస్తోంది. ఈ ముఖ్య విషయం చాలా మందికి తెలియదు.
సాధారణంగా ఆయుష్మాన్ భారత్ పథకం కింద ఒక కుటుంబానికి రూ. 5 లక్షల ఉచిత బీమా లభిస్తుంది. అయితే, కేంద్రం ఇటీవల తీసుకొచ్చిన నిబంధన ప్రకారం, ఈ కవరేజీని రూ. 10 లక్షలకు పెంచుకోవడానికి ఒక సులభమైన మార్గం ఉంది.
వయోవృద్ధులకు అదనపు కవరేజ్:
కేంద్ర ప్రభుత్వం 70 ఏళ్ల వయసు దాటిన వయోవృద్ధుల (Senior Citizens) కోసం అదనంగా రూ. 5 లక్షల ఉచిత బీమా కవరేజీని కల్పిస్తోంది. ఆర్థిక పరిస్థితితో సంబంధం లేకుండా ఈ అదనపు బీమా కవరేజీని అందిస్తారు.
ఒక కుటుంబంలో 70 ఏళ్లు దాటిన వ్యక్తి ఉంటే, ఆ కుటుంబానికి సాధారణంగా వచ్చే రూ. 5 లక్షల ఉచిత బీమాతో పాటు, సీనియర్ సిటిజన్ కేటగిరీలో ఆ వ్యక్తికి అదనంగా రూ. 5 లక్షల బీమా లభిస్తుంది. అంటే మొత్తంగా ఆ కుటుంబానికి రూ. 10 లక్షల ఉచిత బీమా కవరేజీ అందుబాటులోకి వస్తుంది.
ఈ అవకాశం వయోవృద్ధులకు నిజంగా ఒక గొప్ప వరం. వయసు పైబడిన వారికి ఆరోగ్య సమస్యలు ఎక్కువగా వస్తుంటాయి. ఇలాంటి సమయంలో రూ. 10 లక్షల వరకు ఉచిత బీమా లభించడం అంటే, వైద్య ఖర్చుల భారం నుంచి ఆ కుటుంబం పూర్తి ఊరట పొందవచ్చని చెప్పవచ్చు.
ఈ రూ. 5 లక్షల అదనపు టాప్-అప్ బెనిఫిట్ పొందడానికి ఆయుష్మాన్ భారత్ కవరేజీ పొందుతున్న కుటుంబాలు చేయాల్సిన ఒకే ఒక్క చిన్న పని ఉంది. ఆయుష్మాన్ భారత్ కవరేజీ పొందుతోన్న కుటుంబాల్లో 70 ఏళ్ల వయసు దాటిన వ్యక్తి ఉంటే, వారు ఆధార్ eKYC ని మరోసారి చేయించాల్సి ఉంటుంది. ఆధార్ ఈ-కేవైసీ పూర్తి చేయడం ద్వారా ఈ పెంచిన కవరేజీని యాక్టివేట్ చేసుకోవచ్చు.
చాలా ఇన్సూరెన్స్ కంపెనీలు 60 లేదా 65 ఏళ్ల తర్వాత వయో పరిమితి విధిస్తాయి. కానీ ఆయుష్మాన్ భారత్ స్కీమ్లో అలాంటి ఎలాంటి పరిమితి లేదు. 70 ఏళ్లు, 80 ఏళ్లు.. ఇలా ఎంత వయసు ఉన్నా బీమా కవరేజీ లభిస్తుంది. కాబట్టి, 70 ఏళ్లు దాటిన వ్యక్తి కోసం తక్షణమే కేవైసీ పూర్తి చేసి రూ. 5 లక్షల అదనపు టాప్ అప్ యాక్టివేట్ చేసుకోవడం చాలా అవసరం.
