మరి పిచ్చివాడిని అధికారిగా నియమించిన అసలైన పిచ్చి వాడు ఎవరు?

• నాడు మాస్కులు అడిగినందుకు డాక్టర్ సుధాకర్‌పై పిచ్చి ముద్ర.. ప్రాణం తీసిన వైఖరి!

• జగన్ పాలనను విమర్శిస్తే మెంటల్ హాస్పటల్‌కు పంపిన చరిత్ర.. ప్రశ్నించిన వారంతా పిచ్చోళ్లా?!

• పదేళ్లుగా పిచ్చోడైతే వేల కోట్ల బేవరేజెస్ కార్పొరేషన్‌లో కీలక పదవి ఎలా ఇచ్చారు?

Amaravati: వైఎస్సార్ కాంగ్రెస్ పార్టీ ఐదేళ్ల పాలనలో జరిగిన వేల కోట్ల మద్యం కుంభకోణంలో అసలు నిజాలు ఒక్కొక్కటిగా వెలుగులోకి వస్తుండటంతో నాటి పాలకుల్లో తీవ్ర వణుకు మొదలైంది. ఆంధ్రప్రదేశ్ బేవరేజెస్ కార్పొరేషన్ లిమిటెడ్ (ఏపీఎస్‌బీసీఎల్) ప్రత్యేక అధికారిగా పనిచేసిన దొడ్డా వెంకట సత్యప్రసాద్ ఈ కేసులో అప్రూవర్‌గా మారుతూ న్యాయాధికారి ముందు వాంగ్మూలం ఇవ్వడంతో వైసీపీ నేతలు ఉలిక్కిపడ్డారు. ముఖ్యంగా మాజీ మంత్రి పేర్ని నాని తెరపైకి వచ్చి, సత్యప్రసాద్ గత పదేళ్లుగా తీవ్ర మానసిక సమస్యలతో బాధపడుతున్నాడంటూ ఒక సర్టిఫికెట్‌ను మీడియా ముందు ప్రదర్శించి ఆయనపై 'పిచ్చోడు' అనే ముద్ర వేసే ప్రయత్నం చేశారు.

ఐఏఎస్ ఆశచూపి లిక్కర్ దందా నిర్వహణ

గత ఐదేళ్ల హయాంలో సాధారణ ఎక్సైజ్ అధికారైన సత్యప్రసాద్‌కు కన్ఫర్మ్డ్ ఐఏఎస్ హోదా ఇప్పిస్తామంటూ వైసీపీ పెద్దలు ఆశ చూపించారు. ఏపీఎస్‌బీసీఎల్‌లో ప్రత్యేక అధికారిగా నియమించి, లంచాలు ఇచ్చిన కంపెనీలకే ఆర్డర్లు ఇవ్వడం, సరుకు దిగుమతులు, డబ్బుల వసూళ్లు వంటి వ్యవహారాల పర్యవేక్షణను ఆయనకు అప్పగించారు. ఎవరెవరికి ఎంతెంత వాటాలు వెళ్లాలి, ఏ సిండికేట్ ఎంత వసూలు చేయాలి, మిగిలిన ప్రధాన సొమ్మును తాడేపల్లి ప్యాలెస్‌కు ఎలా చేర్చాలనే కీలక చక్రం మొత్తం సత్యప్రసాద్ ద్వారానే తిప్పించినట్లు విచారణలో వెల్లడైంది.

ఐదు గంటల వాంగ్మూలం – అంతిమ లబ్ధిదారు జగనే!

ఈ భారీ కుంభకోణంపై దర్యాప్తు చేస్తున్న సిట్ అధికారులు, ఏసీబీ కోర్టు న్యాయాధికారి ఎదుట సత్యప్రసాద్ దాదాపు ఐదు గంటల పాటు వివరాలను పూసగుచ్చినట్లు వెల్లడించారు. మద్యం విధాన రూపకల్పన, ముడుపుల ప్లాన్ మొత్తం తాడేపల్లి ప్యాలెస్‌లోనే రూపుదిద్దుకుందని స్పష్టం చేశారు. రాజ్కేశ్ రెడ్డి, మిథున్ రెడ్డి, విజయసాయిరెడ్డి, కృష్ణమోహన్ రెడ్డి, ధనుంజయ రెడ్డి వంటి కీలక వ్యక్తులు తమ తమ వాటాలను మినహాయించుకుని, నెలకు దాదాపు రూ.50 నుంచి రూ.60 కోట్ల మేర అక్రమ సొమ్మును నేరుగా వైఎస్ జగన్ దగ్గరకు చేర్చేవారని ఆయన వివరించారు.

పదేళ్లుగా పిచ్చివాడైతే కీలక పదవి ఎలా ఇచ్చారు?

అప్రూవర్‌గా మారి నిజాలు చెప్పేసరికి సత్యప్రసాద్‌ను పిచ్చివాడంటూ వైసీపీ ప్రచారం చేయడంపై టీడీపీ నేతలు తీవ్రస్థాయిలో ఎదురుదాడికి దిగారు. పదేళ్లుగా మానసిక సమస్యలు ఉంటే, అంతటి సున్నితమైన, వేల కోట్ల లావాదేవీలు జరిగే బేవరేజెస్ కార్పొరేషన్ ప్రత్యేక అధికారిగా ఎలా నియమించారని ప్రశ్నిస్తున్నారు. అధికారం ఉన్నప్పుడు కోరి తెచ్చి కీలక బాధ్యతలు అప్పగించి, ఇప్పుడు అవినీతి బండారం బట్టబయలవుతుంటే పిచ్చివాడంటూ బురదజల్లడం వైసీపీ ద్వంద్వ నీతికి నిదర్శనమని మండిపడుతున్నారు.

డాక్టర్ సుధాకర్ ఉదంతం – ప్రశ్నించిన వారిపై ముద్రలు

తమ అక్రమాలను ప్రశ్నించిన వారిపై పిచ్చి ముద్ర వేయడం వైసీపీకి కొత్తేమీ కాదని చరిత్ర గుర్తుచేస్తోంది. కరోనా సంక్షోభ సమయంలో ప్రాణాలు పణంగా పెట్టి సేవ చేస్తూ కనీస రక్షణ కోసం మాస్కులు అడిగిన పాపానికి దళిత వైద్యుడు డాక్టర్ సుధాకర్‌ను రోడ్డుపై ఈడ్చి, కొట్టి, పిచ్చివాడని ముద్రవేసి విశాఖ మెంటల్ ఆసుపత్రికి పంపించారు. ఆ అవమాన భారాన్ని తట్టుకోలేక గుండెపోటుతో ఆయన ప్రాణాలు కోల్పోయారు. అలాగే జగన్ పాలనను సామాజిక మాధ్యమాల్లో విమర్శించినందుకు రైల్వే గ్యాంగ్‌మెన్ తోట సాయికృష్ణను కూడా మానసిక రోగిగా చిత్రీకరించి విశాఖ పిచ్చాసుపత్రిలో చేర్పించిన దారుణాలు ప్రజల మనసుల్లో ఇంకా సజీవంగానే ఉన్నాయి.

చట్టం ముందు నిలబడక తప్పదంటున్న విశ్లేషకులు

ప్రశ్నించిన వారందరినీ పిచ్చివాళ్లుగా చిత్రీకరిస్తూ తమను తాము శుద్ధపూసలుగా ప్రచారం చేసుకున్న పాలకుల నిజస్వరూపం నేడు పూర్తిగా బహిర్గతమైంది. పక్కా ఆధారాలు, డాక్యుమెంట్లతో సాగుతున్న ఈ లిక్కర్ స్కామ్ దర్యాప్తులో ఎంతటి డైవర్షన్ డ్రామాలు ఆడినా అసలు దోషులు తప్పించుకోలేరని స్పష్టమవుతోంది. తప్పులను కప్పిపుచ్చుకోవడానికి వ్యక్తిత్వ హననానికి పాల్పడటం మానుకోవాలని, న్యాయస్థానం ముందు దోషులుగా నిలబడే సమయం ఆసన్నమైందని రాజకీయ విశ్లేషకులు హెచ్చరిస్తున్నారు.