Pawan Kalyan: ఆ రంగానికి బ్రాండ్ అంబాసిడర్‌గా ఉండటం నాకు గర్వకారణం... పవన్ కల్యాణ్ సంచలన వ్యాఖ్యలు!

• నేతన్నల సంక్షేమానికి ప్రభుత్వం కట్టుబడి ఉందని వ్యాఖ్య...
  
  
• Politics: నేడు జాతీయ చేనేత దినోత్సవం..

Pawan Kalyan: జాతీయ చేనేత దినోత్సవం (National Handloom Day) సందర్భాన్ని పురస్కరించుకుని ఆంధ్రప్రదేశ్ ఉపముఖ్యమంత్రి పవన్ కల్యాణ్ రాష్ట్రంలోని చేనేత కార్మికులు, కళాకారులందరికీ హృదయపూర్వక శుభాకాంక్షలు తెలిపారు. భారతదేశపు అమూల్యమైన నేత వారసత్వాన్ని, సాంస్కృతిక వైభవాన్ని తమ సృజనాత్మక నైపుణ్యంతో సజీవంగా ఉంచుతున్న ప్రతి చేతికీ తలవంచి గౌరవం ప్రకటిస్తున్నట్లు ఆయన పేర్కొన్నారు.

ప్రతి చేనేత వస్త్రం మన భారతీయ సంస్కృతికి, విశిష్టమైన చేతిపనితనానికి, స్వావలంబన స్ఫూర్తికి నిదర్శనమని అభివర్ణించిన పవన్ కల్యాణ్, చేనేత రంగానికి బ్రాండ్ అంబాసిడర్‌గా వ్యవహరించడం తనకు ఎంతో గర్వకారణంగా భావిస్తున్నానని వెల్లడించారు.

నేతన్నల సంక్షేమానికి ‘నేతన్న సేవలో’ పథకం..
చేనేత ఉత్పత్తులను ఎంచుకోవడం ద్వారా మన పూర్వీకుల సంప్రదాయాలను పరిరక్షించడమే కాకుండా, లక్షలాది మంది కార్మికుల కుటుంబాల జీవనోపాధికి కొండంత బలాన్ని ఇచ్చినవారమవుతామని పవన్ కల్యాణ్ అన్నారు. రాష్ట్రంలో ఎన్డీఏ కూటమి ప్రభుత్వం నేతన్నల సంక్షేమం, సాధికారతకు సంపూర్ణంగా కట్టుబడి ఉందన్నారు.

నేతన్న సేవలో పథకం: నేత కార్మికులకు ఊరటనిచ్చేలా ఉచిత విద్యుత్ సరఫరాతో పాటు, వార్షికంగా రూ.25,000 ఆర్థిక సాయాన్ని అందించే ‘నేతన్న సేవలో’ పథకాన్ని ప్రభుత్వం సమర్థవంతంగా అమలు చేస్తోందన్నారు.

ప్రత్యేక విభాగానికి శ్రీకారం: రాజకీయ రంగంలోనూ నేత కార్మికుల గొంతుకను వినిపించేందుకు, వారి సమస్యల పరిష్కారానికి జనసేన పార్టీలో ప్రత్యేకంగా ‘నేత కార్మికుల అభివృద్ధి విభాగం’ ఏర్పాటు చేసినట్లు గుర్తుచేశారు.

డిజిటల్ ప్రచారానికి పవన్ కల్యాణ్ పిలుపు...
ప్రధానమంత్రి నరేంద్ర మోదీ గతంలో ఇచ్చిన పిలుపును ప్రస్తావిస్తూ సోషల్ మీడియా వేదిక ఎక్స్ (ట్విట్టర్) ద్వారా పవన్ కల్యాణ్ యువతకు, కంటెంట్ క్రియేటర్లకు ఒక ప్రత్యేక విజ్ఞప్తి చేశారు.

చేనేత ప్రచారంపై డిప్యూటీ సీఎం పవన్ కల్యాణ్(Pawan kalyan) ఆకాంక్ష:
"ప్రతి భారతీయుడు చేనేత ఉత్పత్తులను తమ దైనందిన జీవితంలో ఒక భాగంగా చేసుకోవాలి. యువత, కంటెంట్ క్రియేటర్లు చేనేత దుస్తులు ధరించి సరికొత్త వీడియోలతో సోషల్ మీడియా వేదికగా విస్తృత ప్రచారం కల్పించాలి. మన నేతన్నల సృజనాత్మకతను ప్రపంచానికి చాటిచెప్పే బాధ్యత మనందరిపైనా ఉంది."

చేనేత ఉత్పత్తుల వినియోగాన్ని ఒక ఉద్యమంలా ముందుకు తీసుకెళ్లడం ద్వారానే రాష్ట్రంలోని చేనేత రంగానికి పూర్వవైభవం సాధ్యమవుతుందని డిప్యూటీ సీఎం పవన్ కల్యాణ్ అభిప్రాయపడ్డారు.