Minister Narayana: అమరావతి ఐకానిక్ భవనాల నిర్మాణ పనులకు డెడ్‌లైన్: మంత్రి నారాయణ ఉన్నతస్థాయి సమీక్ష.. అధికారులకు కీలక ఆదేశాలు!

• Politics: ఐకానిక్ భవానాల నిర్మాణ పనులు పురోగతిపై నారాయణ సమీక్షా సమావేశం..
  
  
• వర్షాల కారణంగా నిర్మాణ పనులు నిలిచిపోకుండా చర్యలు తీసుకోవాలన్న మంత్రి..

Minister Narayana: ఆంధ్రప్రదేశ్ రాజధాని అమరావతిని ప్రపంచస్థాయి నగరంగా తీర్చిదిద్దే దిశగా రాష్ట్ర ప్రభుత్వం పనులను మరింత వేగవంతం చేసింది. రాజధాని పరిధిలో అత్యంత ప్రతిష్ఠాత్మకంగా నిర్మిస్తున్న ఐకానిక్ భవనాల నిర్మాణ పనుల పురోగతిపై రాష్ట్ర పురపాలక, పట్టణాభివృద్ధి శాఖ మంత్రి పొంగూరు నారాయణ అమరావతి సచివాలయంలో ఉన్నతస్థాయి సమీక్షా సమావేశం నిర్వహించారు. ఈ సమావేశంలో సీఆర్‌డీఏ (CRDA) ఉన్నతాధికారులు, ఇంజినీర్లు మరియు నిర్మాణ పనులను పర్యవేక్షిస్తున్న కాంట్రాక్ట్ సంస్థల ప్రతినిధులతో కలిసి పనుల తీరుతెన్నులను క్షుణ్ణంగా పరిశీలించారు.

ఐకానిక్ టవర్ల పురోగతిపై ప్రత్యేక దృష్టి...
ఆంధ్రప్రదేశ్ రాజధానిగా అమరావతి రూపురేఖలను ప్రతిబింబించే ప్రధాన ల్యాండ్‌మార్క్ నిర్మాణాలైన అసెంబ్లీ, హైకోర్టు మరియు సచివాలయ టవర్ల నిర్మాణ పనులు ఏయే దశల్లో ఉన్నాయనే పూర్తి వివరాలను మంత్రి నారాయణ అధికారులను అడిగి తెలుసుకున్నారు.

 పనుల నిరంతరాయ నిర్వహణ: వర్షాకాలం ప్రభావం పనులపై పడకుండా ముందస్తు జాగ్రత్త చర్యలు తీసుకుంటున్నట్లు అధికారులు మంత్రికి వివరించారు.

వర్షాల వల్ల ఆటంకం లేకుండా: వర్షాలు కురుస్తున్నప్పటికీ, నిర్మాణాలు నిలిచిపోకుండా ప్రత్యామ్నాయ ప్రణాళికలతో పనులను నిరంతరాయంగా కొనసాగిస్తున్నామని కాంట్రాక్ట్ ప్రతినిధులు స్పష్టం చేశారు.ఈ సమీక్షా సమావేశంలో ఏజీఐసీఎల్ (AGICL) మేనేజింగ్ డైరెక్టర్ అభిషేక్ కుమార్, ఇంజినీర్ ఇన్ చీఫ్ (ENC) గోపాల్‌రెడ్డిలతో పాటు పలువురు చీఫ్ ఇంజినీర్లు పాల్గొని సాంకేతిక వివరాలను వివరించారు.

నిర్దేశిత గడువులోనే పూర్తి కావాలి: మంత్రి నారాయణ ఆదేశాలు ప్రభుత్వం నిర్దేశించిన గడువు (Targets) ప్రకారమే రాజధాని ప్రాజెక్టులను వేగవంతంగా పూర్తి చేయాలని మంత్రి నారాయణ స్పష్టమైన ఆదేశాలు జారీ చేశారు.

మంత్రి నారాయణ కీలక ఆదేశాలు:"అమరావతి నిర్మాణ పనుల్లో వేగంతో పాటు నాణ్యత అత్యంత ముఖ్యం. ఎక్కడా నాణ్యతా లోపాలు తలెత్తకుండా అధికారులు, కాంట్రాక్ట్ సంస్థలు సమన్వయంతో పనిచేయాలి. ప్రభుత్వం నిర్దేశించిన షెడ్యూల్ ప్రకారమే అన్ని ఐకానిక్ నిర్మాణాలను పూర్తి చేసి అందుబాటులోకి తేవాలి." రాజధాని పనుల్లో ఎలాంటి అలసత్వానికి తావులేకుండా నాణ్యతా ప్రమాణాలను కఠినంగా పాటించాలని అధికారులను ఆదేశించారు.