సూది గేదకు సూటేసి నమిద్దాం అనుకున్నాడు! విజయనగరంలో బొత్స ఔట్!

• సస్పెన్షన్ వేటు పడిన గంటల్లోనే రాజీనామా.. జగన్ నియంతృత్వంపై బడ్డుకొండ అప్పలనాయుడు నిప్పులు!

• వైఎస్సార్‌సీపీ ఒక ప్రైవేట్ లిమిటెడ్ కంపెనీ.. క్రమశిక్షణ కమిటీ ఎక్కడుందంటూ నిలదీత!

• బంధుత్వమే తప్పయితే బొత్స, షర్మిల సంగతేంటి?.. అధినేత ద్వంద్వ వైఖరిపై తీవ్ర ప్రశ్నలు!

Vizianagaram: విజయనగరం జిల్లా రాజకీయాల్లో వైఎస్సార్ కాంగ్రెస్ పార్టీకి మరో భారీ ఎదురుదెబ్బ తగిలింది. నెల్లిమర్ల మాజీ ఎమ్మెల్యే బడ్డుకొండ అప్పలనాయుడిపై పార్టీ అధిష్ఠానం క్రమశిక్షణ ఉల్లంఘన పేరిట సస్పెన్షన్ వేటు వేయగా, ఆ ఉత్తర్వులు వెలువడిన కొన్ని గంటల వ్యవధిలోనే ఆయన పార్టీ ప్రాథమిక సభ్యత్వానికి రాజీనామా చేశారు. ఇటీవల తెలుగుదేశం పార్టీలో చేరిన డీసీసీబీ మాజీ చైర్మన్ మజ్జి శ్రీనివాసరావు (చిన్న శ్రీను)కు అప్పలనాయుడు స్వయానా బావ కావడం, ఇరువురి మధ్య ఉన్న బంధుత్వమే ఈ వేటుకు కారణంగా ప్రచారం జరగడంతో ఈ వ్యవహారం జిల్లా రాజకీయాల్లో పెను ప్రకంపనలు సృష్టించింది.

వైఎస్సార్‌సీపీ ఒక ప్రైవేట్ లిమిటెడ్ కంపెనీ – తీవ్ర విమర్శలు

రాజీనామా అనంతరం మీడియాతో మాట్లాడిన బడ్డుకొండ అప్పలనాయుడు వైఎస్ జగన్‌మోహన్ రెడ్డి తీరుపై నిప్పులు చెరిగారు. అసలు పార్టీలో క్రమశిక్షణ కమిటీ అనేది ఉందా అని, తనపై చర్యలు తీసుకునే ముందు ఎలాంటి వివరణ గానీ నోటీసులు గానీ ఎందుకు ఇవ్వలేదని నిలదీశారు. వైఎస్సార్ కాంగ్రెస్ పార్టీ అనేది ప్రజాస్వామ్యబద్ధమైన సంస్థ కాదని, కేవలం జగన్ ఇష్టాయిష్టాలతో నడిచే ఒక ప్రైవేట్ లిమిటెడ్ కంపెనీ అని ఘాటుగా విమర్శించారు. అధికారం పోయిన తర్వాత కూడా నియోజకవర్గంలో సొంత నిధులు ఖర్చు పెట్టి పనిచేసిన వారికి దక్కిన బహుమానం ఇదేనా అని ఆవేదన వ్యక్తం చేశారు.

బంధుత్వమే నేరమైతే బొత్స, షర్మిల మాటేంటి?

బంధుత్వం ప్రాతిపదికన తనపై వేటు వేశారని చెబుతున్న నాయకులు ఆత్మపరిశీలన చేసుకోవాలని అప్పలనాయుడు డిమాండ్ చేశారు. చిన్న శ్రీనుకు తనకంటే ముందు బొత్స సత్యనారాయణ కూడా బావ వరుస అవుతారని, అలాంటప్పుడు బొత్సపై ఎందుకు చర్యలు తీసుకోలేదని ప్రశ్నించారు. సాక్షాత్తు జగన్ సొంత చెల్లెలు వైఎస్ షర్మిల కాంగ్రెస్ అధ్యక్షురాలిగా ఉంటే దానికి జగన్ ఏం సమాధానం చెబుతారని నిలదీశారు. బంధుత్వాలను రాజకీయాలతో ముడిపెడితే చాలామంది నాయకులు రాజీనామాలు చేయాల్సి వస్తుందని ఎద్దేవా చేశారు.

అధిష్ఠానం మొండితనం – నేతల సూచనలు బేఖాతరు

నెల్లిమర్ల నియోజకవర్గంలో మాజీ ఎమ్మెల్యేగా పట్టున్న అప్పలనాయుడిని తప్పిస్తే పార్టీ ఘోరంగా నష్టపోతుందని మాజీ మంత్రి బొత్స సత్యనారాయణ, పార్టీ ముఖ్య నేత సజ్జల రామకృష్ణారెడ్డి, ఉత్తరాంధ్ర సమన్వయకర్త కురసాల కన్నబాబు అధినేత జగన్‌కు నచ్చజెప్పే ప్రయత్నం చేసినా ప్రయోజనం లేకుండా పోయింది. ఎవరి మాట వినకుండా ఏకపక్షంగా తీసుకున్న నిర్ణయంతో జిల్లాలో పార్టీ పునాదులు మరింత బలహీనపడ్డాయని క్షేత్రస్థాయి పరిశీలకులు భావిస్తున్నారు.

చీపురుపల్లి, నెల్లిమర్ల, గజపతినగరంలో పట్టుతప్పిన ఫ్యాన్

జిల్లాలో వైఎస్సార్‌సీపీకి అత్యంత కీలకమైన చీపురుపల్లి, నెల్లిమర్ల, గజపతినగరం నియోజకవర్గాల్లో పార్టీ పరిస్థితి అగమ్యగోచరంగా మారింది. క్షేత్రస్థాయిలో పార్టీ క్యాడర్‌తో నిత్యం సంబంధాలు నెరపుతూ బలమైన వర్గాన్ని నడిపించిన చిన్న శ్రీను, అప్పలనాయుడు వరుసగా బయటకు రావడంతో ద్వితీయ శ్రేణి నాయకులు, సర్పంచులు, ఎంపీటీసీలు భారీగా టీడీపీ కండువా కప్పుకుంటున్నారు. దీంతో బొత్స సత్యనారాయణ, ఆయన సోదరుడు అప్పలనరసయ్యల రాజకీయ భవిష్యత్తుకు జిల్లాలో గట్టి ప్రతిబంధకం ఏర్పడింది.

బొత్స ఆధిపత్యానికి ముగింపు పలికేలా తాజా పరిణామాలు

ఒకప్పుడు విజయనగరం జిల్లా రాజకీయాలను ఏకఛత్రాధిపత్యంగా శాసించిన బొత్స సత్యనారాయణకు ప్రస్తుతం అధికారం లేకపోవడంతో పాటు, అండగా నిలిచే బలమైన కేడర్ ఒక్కొక్కరుగా చేజారిపోతున్నారు. వయోభారం, అనారోగ్య సమస్యల నడుమ రాబోయే స్థానిక సంస్థల ఎన్నికల నాటికి పార్టీని కాపాడుకోవడం ఆయనకు పెను సవాలుగా మారింది. వరుస రాజీనామాలు, వలసలతో జిల్లాలో బొత్స రాజకీయ ఆధిపత్యానికి పూర్తిగా శుభం కార్డు పడినట్లేనని రాజకీయ విశ్లేషకులు స్పష్టం చేస్తున్నారు.