అంబటి చట్టంతో చలగాటం! ప్రెస్ మీట్లు, నిరసనలకు ఒకే! EDకి మాత్రం అనారోగ్యం!

• ఈడీతో ఆటలు ఆడుతున్న అంబటి రాంబాబు.. అధికారుల షాక్ తట్టుకోగలరా!
• రూ.250 కోట్ల మద్యం రవాణా దందా.. అంబటి కుటుంబానికి నిధుల మళ్లింపుపై ఈడీ నజర్!
• ప్రెస్ మీట్లకు రాని గుండె సమస్యలు.. ఈడీ విచారణకు వచ్చేసరికి రెండు స్టంట్ల సాకులా!

గత వైఎస్సార్ కాంగ్రెస్ పార్టీ ప్రభుత్వ హయాంలో జరిగిన రూ.250 కోట్ల మద్యం రవాణా టెండర్ల కుంభకోణం, అక్రమ నిధుల మళ్లింపు వ్యవహారంపై ఎన్‌ఫోర్స్‌మెంట్ డైరెక్టరేట్ (ఈడీ) దర్యాప్తును ముమ్మరం చేసింది. లిక్కర్ రవాణా సబ్ కాంట్రాక్టులను మాజీ మంత్రి అంబటి రాంబాబు అనుచరులు, బినామీలు సొంతం చేసుకున్నారని, ఆ లావాదేవీల నుంచి ఆయన కుటుంబ సభ్యులకు, అనుబంధ సంస్థలకు పెద్ద ఎత్తున నిధులు చేరాయనే బలమైన ఆరోపణలు ఉన్నాయి. ఈ నేపథ్యంలో సమగ్ర బ్యాంక్ లావాదేవీల రికార్డులు, పాన్, ఆధార్ కార్డులతో విచారణకు వ్యక్తిగతంగా హాజరు కావాలని ఈడీ అధికారులు అంబటి రాంబాబుకు అధికారికంగా సమన్లు జారీ చేశారు.

నోటీసులకు అనారోగ్య సాకులు – వరుసగా రెండుసార్లు డుమ్మా

ఈడీ జారీ చేసిన చట్టబద్ధమైన సమన్లకు హాజరు కాకుండా అంబటి రాంబాబు తప్పించుకునే ప్రయత్నం చేస్తున్నారనే విమర్శలు వ్యక్తమవుతున్నాయి. తొలుత సెప్టెంబర్ 11న హాజరు కావాలని ఇచ్చిన నోటీసులు తనకు ఆలస్యంగా అందాయని ఆయన చెప్పడంతో, ఈడీ అధికారులు సెప్టెంబర్ 24న విచారణకు రావాలని మరో అవకాశం కల్పించారు. అయితే, గతంలో తనకు గుండెకు రెండు స్టంట్లు వేశారని, వైద్యుల సలహా మేరకు ప్రస్తుతం విశ్రాంతి తీసుకుంటున్నానంటూ సమాచారం పంపి ఆయన మరోసారి విచారణకు గైర్హాజరయ్యారు.

ప్రెస్ మీట్లకు లేని సమస్య.. ఈడీ సమయానికే అస్వస్థత?

అంబటి రాంబాబు చూపుతున్న అనారోగ్య కారణాలు తీవ్ర రాజకీయ చర్చనీయాంశంగా మారాయి. ప్రభుత్వ విధానాలకు వ్యతిరేకంగా మీడియా సమావేశాలు (ప్రెస్ మీట్లు) పెట్టడానికి, టీవీ డిబేట్లలో మాట్లాడటానికి, నిరసన ప్రదర్శనల్లో చురుగ్గా పాల్గొనడానికి అడ్డురాని గుండె జబ్బులు.. సరిగ్గా ఈడీ కార్యాలయానికి వెళ్లి అధికారుల ప్రశ్నలను ఎదుర్కోవాల్సి వచ్చేసరికి మాత్రమే తెరపైకి రావడం ఆయన ద్వంద్వ వైఖరిని స్పష్టంగా చాటుతోందని రాజకీయ విశ్లేషకులు ఎద్దేవా చేస్తున్నారు.

విక్టిమ్ కార్డు వ్యూహం – రాజకీయ రంగు పులిమే ప్రయత్నం

ఈడీ ఎదుట ప్రత్యక్ష విచారణ నుంచి తప్పించుకోవడం వెనుక పక్కా వ్యూహం ఉందనే ప్రచారం సాగుతోంది. ఒకవేళ బలమైన ఆర్థిక నేర ఆధారాలతో ఈడీ అధికారులు అరెస్ట్ వంటి కఠిన చర్యలకు ఉపక్రమిస్తే, దాన్ని 'రాజకీయ కక్షసాధింపు'గా చిత్రీకరించి ప్రజల్లో సానుభూతి పొందేందుకు 'విక్టిమ్ కార్డు'ను ఉపయోగించాలనేది ఆయన ఆలోచనగా కనిపిస్తోంది. సాంకేతిక, ఆర్థిక ఆధారాల ప్రాతిపదికన దర్యాప్తు సంస్థలు చట్టప్రకారం ముందుకు వెళ్తుంటే, వాటికి రాజకీయ రంగు పులిమి కేసు తీవ్రతను తగ్గించేందుకు ప్రయత్నాలు జరుగుతున్నాయనే విమర్శలు వినిపిస్తున్నాయి.

సత్తెనపల్లి బినామీల విచారణ – చిక్కిన ఆర్థిక ఆధారాలు

ఈ కేసులో ఈడీ అధికారులు ఇప్పటికే పక్కా ఆధారాలు సేకరించారు. అంబటి రాంబాబు ప్రధాన అనుచరులు, బినామీలుగా అనుమానిస్తున్న సత్తెనపల్లికి చెందిన పలువురు వైఎస్సార్‌సీపీ స్థానిక నాయకులను ఇప్పటికే ఈడీ అధికారులు ప్రశ్నించి వారి వాంగ్మూలాలను నమోదు చేశారు. సదరు వ్యక్తుల బ్యాంక్ ఖాతాల వివరాలు, లిక్కర్ సబ్ కాంట్రాక్టుల ద్వారా చేతులు మారిన కోట్ల రూపాయల నగదు లావాదేవీల జాబితాను ఈడీ ఇప్పటికే స్వాధీనం చేసుకుంది. ఈ క్రమంలో నేరుగా విచారణకు వెళ్తే అధికారుల ఎదుట సమాధానం చెప్పలేక ఇరుక్కుపోతామనే భయంతోనే అంబటి ముఖం చాటేస్తున్నారని భావిస్తున్నారు.

సహకరించకపోతే కఠిన చర్యలు – బెయిల్ కూడా దక్కని ప్రమాదం

ఈడీ రూపొందించే ఆర్థిక ఆధారాల చక్రబంధం ముందు రాజకీయ విన్యాసాలు, ప్రెస్ మీట్ల దూకుడు ఏమాత్రం పనిచేయవని న్యాయ నిపుణులు హెచ్చరిస్తున్నారు. మనీలాండరింగ్ నిరోధక చట్టం (PMLA) కింద జారీ చేసిన సమన్లకు సహకరించకుండా ఇలాగే మొండికేస్తే కోర్టుల నుంచి బెయిల్ కూడా లభించకుండా దీర్ఘకాలం జైలు జీవితం గడపాల్సి వస్తుందని గుర్తుచేస్తున్నారు. పార్టీ అధినేత వైఎస్ జగన్ రాజకీయ ప్రయోజనాల కోసం దర్యాప్తు సంస్థలను డీకొట్టే ప్రయత్నం చేస్తే చివరికి నష్టపోయేది తన సొంత రాజకీయ భవిష్యత్తేనని అంబటి రాంబాబు గ్రహించాల్సి ఉందని పరిశీలకులు అభిప్రాయపడుతున్నారు.