Talliki Vandanam Scheme: ఆంధ్రప్రదేశ్లోని పాఠశాల విద్యార్థులకు, వారి తల్లులకు రాష్ట్ర ప్రభుత్వం తీపి కబురు అందించింది. కూటమి ప్రభుత్వం ప్రతిష్టాత్మకంగా చేపట్టిన ‘సూపర్ సిక్స్’ పథకాల్లో ఒకటైన తల్లికి వందనం నిధుల విడుదలపై ముఖ్యమంత్రి నారా చంద్రబాబు నాయుడు స్పష్టత ఇచ్చారు. 2026-27 విద్యా సంవత్సరానికి సంబంధించి ఈ పథకం నిధులను వచ్చే జూన్ నెలలో లబ్ధిదారుల ఖాతాల్లో జమ చేయనున్నట్లు ఆయన ప్రకటించారు. నెల్లూరు జిల్లా వింజమూరులో జరిగిన ‘పేదల సేవలో’ కార్యక్రమంలో పాల్గొన్న సందర్భంగా సీఎం ఈ కీలక అప్డేట్ ఇచ్చారు.
వేసవి సెలవుల అనంతరం రాష్ట్రవ్యాప్తంగా పాఠశాలలు, జూనియర్ కాలేజీలు పునఃప్రారంభం కాగానే ఈ ప్రక్రియ మొదలవుతుందని ప్రభుత్వం తెలిపింది. గత ఏడాది కూడా ప్రభుత్వం విజయవంతంగా ఈ నిధులను పంపిణీ చేసిన సంగతి తెలిసిందే. ఇప్పుడు కొత్త విద్యా సంవత్సరం మొదలైన వెంటనే, ఇంట్లో ఎంతమంది పిల్లలు చదువుకుంటుంటే అంతమందికి ఈ పథకం వర్తింపజేస్తామని ముఖ్యమంత్రి హామీ ఇచ్చారు. దీనివల్ల ఆర్థిక ఇబ్బందులతో చదువుకు దూరం కాకుండా విద్యార్థులకు భరోసా లభిస్తుందని ప్రభుత్వం భావిస్తోంది.
ఈ పథకం కింద అర్హులైన ప్రతి విద్యార్థికి ఏడాదికి రూ. 15,000 ఆర్థిక సాయం అందుతుంది. అయితే, పాఠశాలలు మరియు కళాశాలల్లో మౌలిక సదుపాయాల కల్పన, నిర్వహణ ఖర్చుల కోసం రూ. 2,000 మినహాయించి, మిగిలిన రూ. 13,000 మొత్తాన్ని నేరుగా తల్లి బ్యాంకు ఖాతాలోకి జమ చేస్తారు. ఒకవేళ విద్యార్థికి తల్లి లేని పక్షంలో తండ్రి లేదా సంరక్షకుల అకౌంట్లో ఈ నగదు వేస్తారు. ఒకటో తరగతి నుంచి ఇంటర్మీడియట్ వరకు చదువుతున్న ప్రభుత్వ ప్రైవేట్ స్కూల్ విద్యార్థులందరికీ ఈ లబ్ధి చేకూరనుంది.
తల్లికి వందనం నిధులు పొందాలంటే కొన్ని ముఖ్యమైన నిబంధనలను తప్పనిసరిగా పాటించాలి. విద్యార్థికి కనీసం 75 శాతం హాజరు ఉండాలని ప్రభుత్వం స్పష్టం చేసింది. అలాగే, లబ్ధిదారులైన తల్లుల బ్యాంకు ఖాతాలకు ఆధార్ సంఖ్య అనుసంధానమై ఉండటం అత్యవసరం. ఈ ప్రక్రియ పూర్తి కాని వారు వెంటనే తమ బ్యాంకును సంప్రదించి కేవైసీ వివరాలను అప్డేట్ చేసుకోవాలని అధికారులు సూచిస్తున్నారు. అకౌంట్ యాక్టివ్గా ఉంటేనే ఎలాంటి సాంకేతిక సమస్యలు లేకుండా డబ్బులు జమ అవుతాయి.
రాష్ట్రవ్యాప్తంగా అమలవుతున్న సంక్షేమ పథకాల్లో భాగంగా మహిళా సాధికారతకు, విద్యకు పెద్దపీట వేస్తున్నామని ఈ సందర్భంగా సీఎం చంద్రబాబు గుర్తుచేశారు. పింఛన్ల పంపిణీ, ఉచిత గ్యాస్ సిలిండర్ల పథకం, మహిళలకు ఉచిత బస్సు ప్రయాణం వంటి కార్యక్రమాలు ఇప్పటికే ప్రజల్లోకి వెళ్లాయని ఆయన పేర్కొన్నారు. విద్యార్థుల ఉజ్వల భవిష్యత్తు కోసం తల్లికి వందనం పథకాన్ని మరింత పకడ్బందీగా అమలు చేస్తామని, అర్హులైన ప్రతి ఒక్కరికీ న్యాయం చేస్తామని ప్రభుత్వం స్పష్టం చేసింది.
