Ocean Plastic: సముద్రాల్లో ప్లాస్టిక్కు చెక్! వైరల్ వీడియో వెనుక నిజమైన పురోగతి!
Ocean Plastic Vacuum: సముద్రాల్లో పేరుకుపోతున్న ప్లాస్టిక్ వ్యర్థాలను తొలగించే భారీ యంత్రం. సోషల్ మీడియాలో వీడియో వైరల్.. 2040 నాటికి సముద్రాల్లో ఉన్న ప్లాస్టిక్లో 90 శాతం వరకు తొలగించడమే లక్ష్యం.
సోషల్ మీడియాలో వీడియో వైరల్..
600 మీటర్ల భారీ వ్యవస్థ..
2040 నాటికి సముద్రాల్లో ఉన్న ప్లాస్టిక్లో 90 శాతం తొలగించడమే లక్ష్యం..
సముద్రాల్లో పేరుకుపోతున్న ప్లాస్టిక్ వ్యర్థాలను తొలగించే భారీ యంత్రం వీడియో మళ్లీ సోషల్ మీడియాలో వైరల్ అవుతోంది. అసలు ఈ వీడియో 2022లో విడుదలైనదే అయినప్పటికీ, తాజాగా మళ్లీ ప్రాచుర్యం పొందింది. ఈ వీడియోలో సముద్రంపై తేలుతూ భారీగా ప్లాస్టిక్ను సేకరించే ప్రత్యేక వ్యవస్థ కనిపించడం నెటిజన్లను ఆకట్టుకుంటోంది.
600 మీటర్ల భారీ వ్యవస్థ
ఈ సాంకేతికతను ది ఓషన్ క్లీనప్ అనే సంస్థ అభివృద్ధి చేసింది. సుమారు 600 మీటర్ల పొడవు ఉన్న ఈ నీటిపై తేలే నిర్మాణం సముద్రపు అలలను ఉపయోగించి ప్లాస్టిక్ను ఒకచోటికి చేరుస్తుంది. ముఖ్యంగా గ్రేట్ పసిఫిక్ గార్బేజ్ పాచ్ వంటి ప్రపంచంలోనే అతిపెద్ద చెత్త ప్రాంతాల్లో ఇది ఉపయోగిస్తున్నారు.
2040 లక్ష్యం
ఈ ప్రాజెక్ట్ లక్ష్యం 2040 నాటికి సముద్రాల్లో ఉన్న ప్లాస్టిక్లో 90 శాతం వరకు తొలగించడం. వైరల్ వీడియో చూసిన తర్వాత చాలా మంది ఈ ప్రయత్నాన్ని ప్రశంసిస్తూ, సముద్ర జీవవ్యవస్థను కాపాడేందుకు ఇది కీలక అడుగని అభిప్రాయపడ్డారు. అయితే కొందరు ప్రాజెక్ట్ పురోగతిపై సందేహాలు కూడా వ్యక్తం చేశారు.
ప్రాజెక్ట్లో తాజా పురోగతి
సోషల్ మీడియాలో ఒక యూజర్ ప్రాజెక్ట్ ప్రస్తుత స్థితిపై ప్రశ్నించగా, తాజా వివరాలు బయటపడ్డాయి. 2022లో ఉన్న System 002 నుంచి ఇప్పుడు మరింత అభివృద్ధి చెందిన System 03 దశకు ప్రాజెక్ట్ చేరింది. ప్రస్తుతం ఇది గ్రేట్ పసిఫిక్ గార్బేజ్ పాచ్లో సమర్థంగా పనిచేస్తోంది.
2025 జూన్ నాటికి సముద్రాల నుంచి సుమారు 5 లక్షల కిలోల ప్లాస్టిక్ను తొలగించారు. ఇది ప్రాజెక్ట్లో ఒక కీలక మైలురాయిగా భావిస్తున్నారు.
నదుల్లో కూడా
ఈ సంస్థ సముద్రాలతో పాటు నదుల్లో కూడా ప్లాస్టిక్ తొలగింపు చర్యలు చేపడుతోంది. 20కి పైగా “ఇంటర్సెప్టర్స్” ద్వారా 2025లోనే 2.5 కోట్ల కిలోలకుపైగా వ్యర్థాలను తొలగించారు. అదే ఏడాది చివరికి ఈ మొత్తం 4.5 కోట్ల కిలోలకు చేరగా, 2026 జనవరి నాటికి ఇది 5 కోట్ల కిలోలను దాటింది.
30 నగరాల ప్రణాళిక
2025లో సంస్థ “30 Cities Program” అనే కొత్త కార్యక్రమాన్ని ప్రారంభించింది. దీని లక్ష్యం నదుల ద్వారా సముద్రాల్లోకి వెళ్లే ప్లాస్టిక్ను 2030 నాటికి మూడో వంతు వరకు తగ్గించడం.
ప్రస్తుతం సాధించిన పురోగతితో ప్రాజెక్ట్ సరైన దిశలో సాగుతోందని నిపుణులు చెబుతున్నారు. ఇంకా మరింత విస్తరణ జరిగితే, భవిష్యత్తులో సముద్రాల్లో ప్లాస్టిక్ సమస్యను గణనీయంగా తగ్గించే అవకాశం ఉందని వారు వెల్లడిస్తున్నాడు.
ఒకప్పుడు కేవలం వైరల్ వీడియోగా కనిపించిన ఈ ప్రాజెక్ట్, ఇప్పుడు వాస్తవంగా ఫలితాలు ఇస్తోంది. ప్రకృతిని కాపాడాలంటే సాంకేతికతను ఎలా ఉపయోగించాలో ఈ ప్రయత్నం చూపిస్తోంది. సముద్రాలు శుభ్రంగా ఉండాలంటే ఇలాంటి ప్రయత్నాలు మరింత పెరగాల్సిన అవసరం ఉందని నిపుణులు చెబుతున్నారు.
Be the first to react
