మన జీవనశైలిలో మార్పులు, వేళకు భోజనం చేయకపోవడం వల్ల నేటి కాలంలో గ్యాస్, ఎసిడిటీ అనేవి సర్వసాధారణ సమస్యలుగా మారాయి. అయితే, ఈ సమస్య నుంచి తక్షణ ఉపశమనం కోసం జనం సోడా, కూల్ డ్రింక్స్ వంటి కార్బోనేటెడ్ పానీయాలను ఆశ్రయిస్తున్నారు. ఈ పద్ధతి తాత్కాలికంగా ఉపశమనాన్ని ఇస్తున్నట్లు అనిపించినా, దీర్ఘకాలంలో ఇది అన్నవాహిక క్యాన్సర్కు దారితీస్తుందని గ్యాస్ట్రోఎంటరాలజీ నిపుణులు తీవ్రంగా హెచ్చరిస్తున్నారు.
శరీరంలో స్పింటర్ల పనితీరు.. సోడా ప్రభావం
మన శరీరంలో అన్నవాహిక మరియు పొట్ట కలిసే చోట 'స్పింటర్' అనే ఒక కండర వలయం ఉంటుంది. ఇది ఒక వాల్వ్ లాగా పనిచేస్తూ, మనం తిన్న ఆహారం లేదా పొట్టలోని ఆమ్లం తిరిగి పైకి రాకుండా అడ్డుకుంటుంది. అయితే, మనం సోడా తాగినప్పుడు అందులో ఉండే కార్బన్ డయాక్సైడ్ మరియు ఇతర రసాయనాలు ఈ స్పింటర్లను బలహీనపరుస్తాయి. దీనివల్ల పొట్టలోని ఆమ్లం తిరిగి అన్నవాహికలోకి ప్రవేశిస్తుంది. దీనినే వైద్య భాషలో యాసిడ్ రిఫ్లక్స్ అని పిలుస్తారు. అన్నవాహిక లోపలి పొరలు ఈ ఆమ్ల తీవ్రతను తట్టుకోలేవు, ఫలితంగా అక్కడ పుండ్లు ఏర్పడటం లేదా కణజాలం దెబ్బతినడం జరుగుతుంది.
బ్యారెట్ ఈసోఫేగస్ క్యాన్సర్కు ముందు దశ
నిరంతరం సోడా తాగడం వల్ల వచ్చే యాసిడ్ రిఫ్లక్స్ కారణంగా అన్నవాహికలోని కణాలు రూపాంతరం చెందుతాయి. దీనిని బ్యారెట్ ఈసోఫేగస్ అంటారు. ఇది క్యాన్సర్ రావడానికి ముందు కనిపించే ప్రమాదకరమైన స్థితి. గత రెండు దశాబ్దాలుగా మన దేశంలో, ముఖ్యంగా దక్షిణాసియా ప్రాంతంలో అన్నవాహిక క్యాన్సర్ కేసులు గణనీయంగా పెరగడానికి ఈ కార్బోనేటెడ్ డ్రింక్స్ వినియోగమే ప్రధాన కారణమని అధ్యయనాలు చెబుతున్నాయి.
ప్రాణాంతకమైన పొరపాట్లు
చాలామంది ఛాతీలో మంట లేదా నొప్పి రాగానే దాన్ని గ్యాస్ సమస్యగా భావించి, వెంటనే సోడా తాగుతుంటారు. కానీ, కొన్నిసార్లు ఛాతీ నొప్పి గుండెపోటుకు సంకేతం కావచ్చు. అటువంటి కీలక సమయంలో సోడా తాగి ఉపశమనం కోసం వేచి చూడటం వల్ల చికిత్స అందక ప్రాణాలు కోల్పోయే ప్రమాదం ఉంది. సోడా అనేది కేవలం గాలిని బయటకు పంపే ఒక కృత్రిమ మార్గం మాత్రమే తప్ప అది ఎప్పటికీ మందు కాదు.
తరచుగా సోడా తాగే అలవాటు ఉన్నవారిలో జీర్ణ ఎంజైమ్ల ఉత్పత్తి తగ్గిపోవడమే కాకుండా, ఎముకల సాంద్రత కూడా తగ్గుతుంది. అందుకే గ్యాస్ సమస్యకు సోడా పరిష్కారం అని అనుకోవడం ఒక పెద్ద భ్రమ. ప్రకృతిసిద్ధంగా దొరికే మజ్జిగ, కొబ్బరి నీళ్లు లేదా గోరువెచ్చని నీరు తీసుకోవడం వల్ల ఎటువంటి సైడ్ ఎఫెక్ట్స్ లేకుండా గ్యాస్ సమస్యను దూరం చేసుకోవచ్చు. ప్రాణాపాయం కలిగించే సోడా బాటిళ్లను ఇకనైనా దూరం పెట్టడం మన ఆరోగ్యానికి ఎంతో శ్రేయస్కరం.
