తెలంగాణ రాష్ట్రంలో వర్షాలు విస్తృతంగా కురుస్తున్న నేపథ్యంలో, గోదావరి నది ప్రవాహం భద్రాచలం వద్ద మరింత పెరుగుతోంది. ఎగువ ప్రాంతాల నుంచి భారీగా వరద నీరు చేరుతుండటంతో శనివారం ఉదయం 7 గంటల సమయంలో గోదావరి నీటిమట్టం 32.5 అడుగులకు చేరింది. నీటి పెరుగుదలతో భద్రాచలం స్నాన ఘట్టాల మెట్లు వరద నీటిలో మునిగిపోయాయి.
ఇంకా ఎగువ నుండి వరద ప్రవాహం కొనసాగితే, భద్రాచలం వద్ద నీటిమట్టం మరింత పెరిగే అవకాశం ఉందని అధికారుల అంచనా. ఇప్పటికే దుమ్ముగూడెం మండలంలోని పర్ణశాల వద్ద వరద నీరు నార చీరల ప్రాంతాన్ని చేరడంతో, పర్యాటకుల ప్రవేశంపై అధికారులు ఆంక్షలు విధించారు.
ఇతర ప్రాంతాల్లోనూ పరిస్థితి గందరగోళంగా ఉంది. చర్ల మండలంలోని తాలిపేరు జలాశయానికి ఎగువ నుంచి విపరీతంగా వరద నీరు వచ్చి చేరుతోంది. దీనివల్ల జలాశయం నిండిపోవడంతో అధికారులు అప్రమత్తమయ్యారు. భద్రాచలం పట్టణాన్ని వరద ప్రభావం నుంచి కాపాడేందుకు స్లూయిజ్ గేట్ల వద్ద మోటార్లను ఏర్పాటు చేసి నీటి ప్రవాహాన్ని నియంత్రిస్తున్నారు.
