బంగాళాఖాతం ఈసారి వరుస అల్లకల్లోలాలకు కేంద్రంగా మారింది. వేసవి కాలంలో అనూహ్యంగా వర్షాలు పడటం, వర్షా కాలంలో కుండపోత వానలు కురవడం, శీతాకాలం ప్రారంభమైనా కూడా మళ్లీ వర్షాలు కురిసే పరిస్థితి కొనసాగుతుండటంతో రాష్ట్ర ప్రజలు వాతావరణ మార్పులపై ఆందోళన చెందుతున్నారు. మొంథా తుఫాన్ ప్రభావం నుంచి బయటపడకముందే మరో అల్పపీడనం ఏర్పడటం వాతావరణ శాఖను అప్రమత్తం చేసింది. ఈసారి కూడా మళ్లీ పెద్దఎత్తున వర్షాలు కురిసే అవకాశం ఉందని అధికారులు హెచ్చరిస్తున్నారు.
శనివారం ఉదయం బంగాళాఖాతంలోని అండమాన్ సమీపంలో అల్పపీడనం ఏర్పడింది. ఇది ప్రస్తుతం పశ్చిమ–వాయువ్య దిశగా కదులుతూ, రాబోయే రోజుల్లో మరింత బలపడే అవకాశం ఉందని వాతావరణ శాఖ తెలిపింది. సోమవారం నాటికి ఇది వాయుగుండంగా, బుధవారం నాటికి తుఫాన్గా మారే అవకాశం ఉందని అంచనా. తుఫాన్ ఏర్పడితే ‘సెన్యార్’ అనే పేరు పెట్టనున్నట్లు తెలిపారు. అయితే ఇది ఏ తీర ప్రాంతాన్ని తాకుతుందనే విషయంపై స్పష్టత ఇంకా వెలువడలేదు. మార్గం మార్చుకునే అవకాశమూ ఉన్నట్లు అధికారులు పేర్కొన్నారు.
ఈ వాయుగుండం ప్రభావంతో నవంబర్ 28 నుంచి డిసెంబర్ 1 వరకు ఆంధ్రప్రదేశ్ వ్యాప్తంగా వర్షాలు కురిసే అవకాశం ఉందని వాతావరణ శాఖ హెచ్చరించింది. ఈ కాలంలో తేలికపాటి నుంచి మోస్తరు వర్షాలు పడే అవకాశం ఎక్కువగా ఉంది. అదే విధంగా ఈరోజు నెల్లూరు, ప్రకాశం జిల్లాలు, అలాగే రాయలసీమలోని తిరుపతి, చిత్తూరు, అన్నమయ్య, కడప జిల్లాల్లో కూడా అక్కడక్కడ తెరువైన వానలు పడతాయని అంచనా.
వరుస వర్షాలు, వరదలతో ఇప్పటికే పెద్దస్థాయిలో నష్టం చవిచూసిన రైతులకు ఇది మరో ఆందోళన. ప్రస్తుతం ధాన్యం కోతలు జరుగుతున్న సమయంలో వర్షాలు పడే అవకాశం ఉండటంతో ఏపీ విపత్తుల నిర్వహణ సంస్థ ప్రత్యేక హెచ్చరికలు జారీ చేసింది. రైతులు వెంటనే ధాన్యం కుప్పలు వేసుకోవాలని, తడవకుండా జాగ్రత్తలు తీసుకోవాలని సూచించింది. అలాగే అత్యవసర పరిస్థితుల్లో ప్రజలు 112, 1070, 18004250101 నంబర్లకు కాల్ చేసి సహాయం పొందవచ్చని తెలిపింది.
ఈ సంవత్సరం APలో వర్షాలు విపరీతంగా కురవడం రాష్ట్ర మౌలిక సదుపాయాలపై, వ్యవసాయంపై తీవ్ర ప్రభావం చూపింది. నిరంతరం ఏర్పడుతున్న వాయుగుండాలు, తుఫాన్లు, భారీ వర్షాలు రోడ్లు, వంతెనలు, ఇళ్లు, సాగు భూములకు భారీ నష్టం కలిగించాయి. ఇక కొత్తగా వస్తున్న అల్పపీడనం నేపథ్యంలో ప్రభుత్వం, రైతులు, ప్రజలు మళ్లీ అప్రమత్తంగా ఉండాల్సిన అవసరం ఉంది. వాతావరణ శాఖ ఎప్పటికప్పుడు కొత్త అప్డేట్లు ఇస్తోంది.
