ఢిల్లీలోని ఎర్రకోట వద్ద జరిగిన కారు బాంబు పేలుడు ఘటన దేశవ్యాప్తంగా సంచలనంగా మారింది. ఈ కేసులో హర్యానా రాష్ట్రానికి చెందిన అల్ ఫలా విశ్వవిద్యాలయం (Al Falah University) పేరుమళ్లీ చర్చకు వచ్చింది. ఈ పేలుడు ఘటనకు సంబంధించి ఆ విశ్వవిద్యాలయానికి చెందిన కొందరు వైద్యులు అనుమానితులుగా ఉన్నారని అధికారులు తెలిపారు. దీంతో ఈ విశ్వవిద్యాలయం విద్యా రంగంలోనే కాకుండా, భద్రతా సంస్థల దృష్టిలోనూ నిలిచింది.
ఈ నేపథ్యంలో, నేషనల్ అసెస్మెంట్ అండ్ అక్రిడిటేషన్ కౌన్సిల్ (న్యాక్) అల్ ఫలా విశ్వవిద్యాలయానికి షోకాజ్ నోటీసులు జారీ చేసింది. న్యాక్ గుర్తింపు లేకుండానే తమ వెబ్సైట్లో తప్పుడు సమాచారం ఇచ్చినందుకు ఈ చర్య తీసుకున్నట్లు తెలిపింది. విశ్వవిద్యాలయం తమకు న్యాక్ గుర్తింపు ఉందని ప్రజలకు, విద్యార్థులకు తెలియజేస్తూ వెబ్సైట్లో ప్రదర్శించిందని, ఇది పూర్తిగా తప్పుదారి పట్టించే చర్య అని న్యాక్ పేర్కొంది. “మేము గుర్తింపు ఇచ్చినట్లు చెప్పడం అసత్యం” అని న్యాక్ నోటీసులో స్పష్టం చేసింది.
అల్ ఫలా విశ్వవిద్యాలయం హర్యానాలోని ఫరీదాబాద్ జిల్లాలో 76 ఎకరాల విస్తీర్ణంలో ఉంది. ఈ సంస్థ 1997లో ఒక చిన్న ఇంజినీరింగ్ కాలేజీగా ప్రారంభమైంది. తర్వాత దశలవారీగా విస్తరించి, 2014లో హర్యానా ప్రభుత్వ చట్టం కింద విశ్వవిద్యాలయ హోదా పొందింది. 2019లో దీనికి అనుబంధంగా మెడికల్ కాలేజీని కూడా ఏర్పాటు చేశారు. గతంలో ఈ విశ్వవిద్యాలయం న్యాక్ నుంచి ‘ఏ’ గ్రేడ్ పొందినట్లు కొన్ని మీడియా కథనాలు ప్రచారం చేయగా, ఇప్పుడు న్యాక్ ఆ సమాచారం పూర్తిగా తప్పు అని నిర్ధారించింది.
ప్రస్తుతం న్యాక్ నుంచి వచ్చిన నోటీసులు విద్యా రంగంలో చర్చకు దారితీశాయి. విద్యా సంస్థలు నకిలీ గుర్తింపులతో విద్యార్థులను, తల్లిదండ్రులను తప్పుదారి పట్టించడాన్ని న్యాక్ తీవ్రంగా ఖండించింది. ఈ కేసు ఫలితం రాబోయే రోజుల్లో ఈ విశ్వవిద్యాలయం భవిష్యత్తును నిర్ణయించనుంది. అంతేకాక, ఎర్రకోట పేలుడు ఘటనలో ఈ విశ్వవిద్యాలయానికి చెందిన వైద్యుల పేర్లు రావడం, ఇప్పుడు న్యాక్ చర్య జరగడం — రెండూ కలిపి ఈ సంస్థ చుట్టూ వివాదాలు మరింత ముదురుతున్నాయి.
