సినిమా టికెట్ ధరల పెంపుపై జరుగుతున్న చర్చల నేపథ్యంలో నటుడు శివాజీ చేసిన వ్యాఖ్యలు ఇప్పుడు సోషల్ మీడియాలో హాట్ టాపిక్గా మారాయి. సినిమా పరిశ్రమ గురించి, సినిమా టికెట్ల ధరల పెంపుపై ఆయన చెప్పిన నిజాయితీగల అభిప్రాయం అనేక మంది సినీ ప్రేక్షకులు, యూత్లో చర్చనీయాంశంగా మారింది. ఇండస్ట్రీలో బయటకు కనిపించే గ్లామర్ వెనుక ఎంతో మంది కష్టాలు, జీవిత పోరాటాలు ఉంటాయని ఆయన భావోద్వేగంతో వివరించారు.
శివాజీ మాట్లాడుతూ ఫిల్మ్ ఇండస్ట్రీలో కేవలం 5శాతం మంది మాత్రమే లగ్జరీ లైఫ్ గడుపుతారు. మిగతా 95శాతం మంది చాలా సాధారణ జీవితం గడుపుతూ, తమ కుటుంబాలను నెట్టుకొస్తున్నారు. లైట్స్మన్, ఫైటర్లు, టెక్నీషియన్లు, డ్రెస్సు మాన్, అసిస్టెంట్ డైరెక్టర్లు, వర్కర్లు… ఇవాళ ఒక సినిమా ఆగిపోతే వీళ్లకే పెద్ద నష్టం. కానీ ప్రజలు ఎప్పుడూ హీరో, హీరోయిన్, పెద్ద బడ్జెట్లనే చూస్తారు” అని చెప్పారు.
సంక్రాంతి, దసరా వంటి సీజన్లలో బస్సు టికెట్ ఛార్జీలు మూడు రెట్లు పెరుగుతాయి. ట్రైన్ టికెట్ దొరకదు, బస్సులో అందరూ 5 వేలు, 6 వేలు పెట్టి వెళ్తారు. అప్పుడు ఎవరూ ప్రశ్నించరు. అదే సినిమా టికెట్ రేటు 200 నుండి 300కి పెరిగితే విలన్లా చూస్తారు. ఎందుకు ఈ డబుల్ స్టాండర్డ్? సినిమా కూడా ఒక ఇండస్ట్రీ. దాంట్లో వేలమంది ఉద్యోగాలు ఉన్నాయి అని వ్యాఖ్యానించారు.
సినిమా టికెట్ ధరల పెంపుపై విమర్శలు చేసే వారిని ఉద్దేశిస్తూ ప్రజలు సినిమా టికెట్కు మాత్రమే ఎందుకు స్పందిస్తారు? సినిమా అనేది ప్రజలకు వినోదాన్ని ఇచ్చే రంగం కాని, ఇదికూడా అనేక కుటుంబాలకు జీవనాధారం. సినిమా టికెట్ ధర పెరిగితే చూడకపోతే సరిపోతుంది. కానీ దాన్ని పెద్ద సమస్యలా చూపించడం తప్పు” అన్నారు. సినిమా పరిశ్రమను ఇతర రంగాలతో సమానంగా చూడాలని, పరిశ్రమ కష్టాలను అర్థం చేసుకోవాలని శివాజీ స్పష్టం చేశారు. ఆయన అభిప్రాయాలు చాలా మందికి ఆలోచన కలిగించేలా ఉన్నాయని నెటిజన్లు కామెంట్లు చేస్తున్నారు.
