టీ20 వరల్డ్ కప్ 2026 క్రికెట్ ప్రేమికులకు భారీ ఆనందాన్ని అందించింది. ICC అధికారికంగా షెడ్యూల్‌ను విడుదల చేసింది. ఈ టోర్నమెంట్ వచ్చే సంవత్సరం ఫిబ్రవరి 7 నుంచి ప్రారంభమవుతుంది. తొలి మ్యాచ్ పాకిస్థాన్-నెదర్లాండ్స్ జట్ల మధ్య కొలంబో వేదికగా జరుగుతుంది. అదే రోజు భారత జట్టు కూడా మైదానంలోకి దిగనుంది. ముంబై వేదికగా టీమ్ ఇండియా USAతో తలపడనుంది.
ఇదే సమయంలో అత్యంత ఆసక్తికర పోరుగా భావించబడే భారత్-పాకిస్థాన్ మ్యాచ్ ఫిబ్రవరి 15న నిర్వహించనున్నట్లు ICC ప్రకటించింది. కొలంబోలో జరిగే ఈ హై వోల్టేజ్ మ్యాచ్‌పై ఇప్పటికే ప్రపంచవ్యాప్తంగా క్రికెట్ అభిమానుల్లో భారీ ఉత్సాహం నెలకొంది. టికెట్లు విడుదల కాకముందే ప్రేక్షకులు ఆన్‌లైన్ ప్లాట్‌ఫార్మ్‌లలో భారీగా సెర్చ్ చేస్తున్నారు.
టీ20 WC 2026 గ్రూపింగ్‌లో భారత్, పాకిస్థాన్, USA, నమీబియా, నెదర్లాండ్స్ ఒకే గ్రూప్‌లో ఉన్నాయి. దీంతో ప్రారంభ దశ నుంచే హై-టెన్షన్ మ్యాచ్‌లకు వేదిక కానుంది. మొత్తం 20 జట్లు పాల్గొనే ఈ టోర్నీని భారత్ మరియు శ్రీలంక సంయుక్తంగా నిర్వహించనున్నాయి. పాక్ జట్టు అన్ని మ్యాచులు శ్రీలంకలోనే ఆడుతుందని ICC స్పష్టం చేసింది. మరోవైపు భారత జట్టు తమ హోమ్ కండీషన్స్‌లో కీలక మ్యాచ్‌లు ఆడబోతోంది. టోర్నమెంట్ ఫైనల్ మార్చి 8న జరుగనుంది.
అదే సమయంలో ఈ రోజు సాయంత్రం 6.30 గంటలకు ICC అధికారిక ఈవెంట్‌లో మ్యాచుల పూర్తి వివరాలు వేదికలు, తేదీలు, సూపర్-8, సెమీఫైనల్స్ షెడ్యూల్‌లు విడుదల కానున్నాయి. ఈ కార్యక్రమంలో రోహిత్ శర్మ, సూర్యకుమార్ యాదవ్, శ్రీలంక మాజీ కెప్టెన్ ఏంజెలో మాథ్యూస్, మహిళల క్రికెట్ స్టార్ హర్మన్ ప్రీత్ కౌర్ పాల్గొననున్నారు. ఈ వీడియో లాంచ్‌ను ICC సోషల్ ప్లాట్‌ఫార్మ్‌లన్నింటిలో ప్రత్యక్ష ప్రసారం చేయనుంది.
డిఫెండింగ్ ఛాంపియన్‌గా ఇండియా బరిలోకి దిగనుంది. గత సంవత్సరం జరిగిన టీ20 వరల్డ్ కప్‌లో RSAపై కేవలం 7 పరుగుల తేడాతో విజయం సాధించి ప్రపంచ కప్‌ను గెలుచుకున్న సంగతి తెలిసిందే. రోహిత్ శర్మ నేతృత్వంలోని భారత జట్టు మళ్లీ టైటిల్‌ను కాపాడాలని లక్ష్యంగా పెట్టుకుంది. మరోవైపు బాబర్ అజమ్ నేతృత్వంలోని పాకిస్థాన్ జట్టు ఇండియాపై ప్రతీకారం తీర్చుకోవాలని చూస్తోంది. భారత్-పాక్ మ్యాచ్ జరగనున్న నేపథ్యంలో దేశాల మధ్య క్రికెట్ ఉత్కంఠ మరింత పెరిగింది.
