అక్కినేని యువ హీరో నాగచైతన్య, నటి శోభిత ధూళిపాళ తమ వైవాహిక జీవితంలో తొలి ఏడాదిని పూర్తి చేసుకున్నారు. తమ మొదటి వివాహ వార్షికోత్సవం సందర్భంగా శోభిత సోషల్ మీడియాలో ఒక ప్రత్యేకమైన వీడియోను పంచుకున్నారు. ఇప్పటివరకు ఎవరూ చూడని తమ పెళ్లి నాటి మధుర క్షణాలను అభిమానులతో పంచుకుని అందరినీ ఆశ్చర్యపరిచారు.
శోభిత తన ఇన్స్టాగ్రామ్ ఖాతాలో పోస్ట్ చేసిన ఈ వీడియోలో నాగచైతన్య-శోభితల సంప్రదాయ తెలుగు వివాహ వేడుకలోని పలు ఘట్టాలు ఉన్నాయి.
ఈ జంట మధ్య అనురాగం, కుటుంబ సభ్యుల ఆనందం వంటివి ఈ వీడియోలో అందంగా చిత్రీకరించారు. ఈ వీడియో క్లిప్లు ప్రస్తుతం సోషల్ మీడియాలో వేగంగా వైరల్ అవుతున్నాయి.
ఈ వీడియోకు శోభిత ఒక భావోద్వేగభరితమైన క్యాప్షన్ను కూడా జతచేశారు. "గాలి ఎప్పుడూ ఇంటి వైపుకే వీస్తుంది. నా భర్తతో కలిసి సూర్యుని చుట్టూ ఒక పూర్తి ప్రయాణాన్ని ముగించాను.
అగ్నితో శుద్ధి అయినట్లుగా కొత్త అనుభూతి కలుగుతోంది. శ్రీమతిగా ఒక సంవత్సరం..." అంటూ తన ఆనందాన్ని వ్యక్తం చేశారు. ఈ పోస్ట్ చూసిన అభిమానులు, నెటిజన్లు ఈ జంటకు శుభాకాంక్షలు తెలుపుతున్నారు.
