ఒకవైపు థియేటర్లలో వరుస కొత్త సినిమాలు ప్రేక్షకులను అలరిస్తుంటే, మరోవైపు ఓటీటీల్లో కూడా హాట్ హాట్ రిలీజ్లు సాగుతున్నాయి. తెలుగు, తమిళం, కన్నడ, హిందీతో పాటు హాలీవుడ్ సినిమాలు కూడా డిజిటల్ ప్లాట్ఫార్మ్లలో మంచి ఆదరణ పొందుతున్నాయి. ముఖ్యంగా మంచి కంటెంట్ ఉంటే చాలు — అది స్థానిక సినిమా కాకపోయినా, డబ్బింగ్ వెర్షన్ అయినా సరే ప్రేక్షకులు ఆసక్తిగా చూస్తున్నారు. ప్రస్తుతం ఓ రొమాంటిక్ థ్రిల్లర్ ఓటీటీలో హంగామా చేస్తోంది.
అంచనాలు లేకుండా విడుదలైన ఈ సినిమా బాక్సాఫీస్ వద్దనే కాదు, ఇప్పుడు ఓటీటీలోనూ సంచలనం సృష్టిస్తోంది. రూ.55 కోట్లకు పైగా వసూళ్లు సాధించి సూపర్ హిట్గా నిలిచిన ఈ సినిమా పేరు అంచక్కల్లకోక్కన్. తెలుగులో దీనిని చాప్రా మర్డర్ కేసు అనే టైటిల్తో ప్రేక్షకుల ముందుకు తీసుకువచ్చారు.
మర్డర్ మిస్టరీతో రొమాన్స్ కలయిక…
లుక్మాన్ అవరన్, చెంబన్ వినోద్ జోస్, మణికందన్ ఆర్. ఆచారి, మేఘా థామస్ ప్రధాన పాత్రల్లో నటించిన ఈ సినిమా కథ ఒక మర్డర్ మిస్టరీ చుట్టూ తిరుగుతుంది. హీరో ప్రేమకథతో ప్రారంభమైన కథనం, ఒక్కసారిగా ఓ హత్యతో ఉత్కంఠభరితంగా మారుతుంది. ఆ కేసు హీరో జీవితాన్ని ఎలా ప్రభావితం చేస్తుంది? నిజమైన నిందితుడు ఎవరు? ఆ రహస్యాల వెనుక ఎలాంటి ఆశ్చర్యకరమైన నిజాలు దాగి ఉన్నాయి? అన్నదే సినిమా హైలైట్.
సినిమా మొదటి నుండి చివరి వరకూ ఊహించని ట్విస్టులు, సస్పెన్స్ ప్రేక్షకులను సీటుకు కట్టేస్తాయి. రొమాంటిక్ సన్నివేశాల మధ్య కూడా అనుకోని మలుపులు రావడంతో థ్రిల్ మూడింతలు పెరుగుతుంది. సాధారణంగా ప్రేమకథలలో చూడని ఉత్కంఠను ఈ సినిమాలో చూడొచ్చు.
నటీనటుల అద్భుత ప్రదర్శన….
హీరోగా లుక్మాన్ అవరన్ తన పాత్రలో ప్రాణం పోశారు. చెంబన్ వినోద్ జోస్, మణికందన్ ఆర్. ఆచారి తమ పాత్రలను నిజాయితీగా ఆవిష్కరించారు. మేఘా థామస్ నటన కూడా కథకు బలాన్ని చేకూర్చింది.
టెక్నికల్ విభాగంలోనూ హైలైట్…
సినిమాటోగ్రఫీ, బ్యాక్గ్రౌండ్ స్కోర్ కథ ఉత్కంఠను మరింతగా పెంచాయి. అలాగే రొమాన్స్, థ్రిల్లర్తో పాటు కొన్ని ఫన్నీ సన్నివేశాలు కూడా ఉండటంతో, సినిమా ఒకే సారి అన్ని రకాల ప్రేక్షకులను అలరించేలా మారింది.
ప్రస్తుతం ఈ సినిమా మలయాళంలో అమెజాన్ ప్రైమ్ వీడియోలో అందుబాటులో ఉండగా, తెలుగులో చాప్రా మర్డర్ కేసు పేరుతో ఆహా ఓటీటీలో స్ట్రీమింగ్ అవుతోంది. అంచనాలు లేకుండా వచ్చినా పెద్ద విజయాన్ని సాధించిన ఈ సినిమా, రొమాంటిక్ థ్రిల్లర్లను ఇష్టపడే వారికి ఖచ్చితంగా మిస్ కాకూడని ఎంటర్టైనర్ అని చెప్పొచ్చు.
