రిజర్వ్ బ్యాంక్ ఆఫ్ ఇండియా (ఆర్బీఐ) ప్రకటన వచ్చిన కొన్ని గంటల్లోనే దేశంలోని దిగ్గజ ప్రభుత్వ బ్యాంకుల్లో ఒకటైన బ్యాంక్ ఆఫ్ బరోడా ( Bank Of Baroda ) తమ కస్టమర్లకు అదిరే శుభవార్త అందించింది. ఆర్బీఐ వడ్డీ రేట్లను తగ్గించిన క్రమంలో బెంచ్మార్క్ రిటైల్ లోన్ లెండింగ్ రేట్ (BRLLR) సవరిస్తున్నట్లు తెలిపింది.
వివిధ రుణాలకు లింకై ఉన్న ఈ బీఆర్ఎల్ఎల్ఆర్ రేటును తగ్గిస్తున్నట్లు తెలిపింది. సవరించిన కొత్త వడ్డీ రేట్లను డిసెంబర్ 6, 2025 నుంచే అమలులోకి తెస్తున్నట్లు తెలిపింది. ఈ మేరకు పత్రికా ప్రకటన చేసింది. మరి ఆ వివరాలు తెలుసుకుందాం.
బాంబే స్టాక్ ఎక్స్చేంజీ వెబ్సైట్లోని బ్యాంక్ ఆఫ్ బరోడా నోటిఫికేషన్ ప్రకారం.. సవరించిన బీఆర్ఎల్ఎల్ఆర్ రేటు డిసెంబర్ 6 నుంచే అమలులోకి వస్తుంది. ప్రస్తుతం 8.15 వద్ద ఉన్న ఈ వడ్డీ రేటును 25 బేసిస్ పాయింట్ల మేర తగ్గించి 7.90 శాతానికి తగ్గించినట్లు పేర్కొంది.
దీంతో రుణాల వడ్డీ రేటు తగ్గి నెలవారీ ఈఎంఐల భారం తగ్గనుంది. రిజర్వ్ బ్యాంక్ ఆఫ్ ఇండియా శుక్రవారం రోజున రెపో రేటును మరో 25 బేసిస్ పాయింట్లు తగ్గిస్తున్నట్లు ప్రకటించింది. దీంతో రెపో రేటు 5.50 శాతం నుంచి 5.25 శాతానికి తగ్గింది. ఈ ఏడాది 2026లో మొత్తంగా చూసుకుంటే 125 బేసిస్ పాయింట్ల మేర కోత పెట్టింది.
గత 2025 ఫిబ్రవరిలో 25 బేసిస్ పాయింట్లు, జూన్ నెలలో 50 బేసిస్ పాయింట్లు తగ్గించింది. అయితే, అక్టోబర్ నెలలో జరిగిన ఎంపీసీ మీటింగ్లో వడ్డీ రేట్లను మార్చకుండా యథాతథంగా కొనసాగించింది. చాలా మంది తమ గృహ రుణాలను మార్జినల్ కాస్ట్ ఆఫ్ ఫండ్స్ బేస్డ్ లెండింగ్ రేటు, బేస్ రేటు లేదా బెంచ్ మార్క్ ప్రైమ్ లెండింగ్ రేటు వంటి వాటి ఆధారంగా తీసుకుంటున్నారు.
ఈబీఎల్ఆర్ కంటే ఎక్కువ వడ్డీ రేటు చెల్లిస్తున్నారు. ప్రస్తుతం బ్యాంక్ ఈబీఎల్ఆర్ రేటును తగ్గించిన క్రమంలో వారందరికీ ఊరట లభించనుంది. చాలా వరకు హోమ్ లోన్స్ ఈబీఎల్ఆర్ కు లింక్ అయి ఉంటాయి. తాజా రెపో రేటు తగ్గింపు కారణంగా హోమ్ లోన్ వడ్డీ రేట్లు తగ్గి ఈఎంఐల భారం తగ్గనుంది.
బ్యాంకులు హోమ్ లోన్ వడ్డీ రేటు తగ్గించినప్పుడు రుణ గ్రహీతలకు రెండు ఆప్షన్స్ ఇస్తారు. తమ ఈఎంఐని తగ్గించుకోవడం లేదా హోన్ లోన్ టెన్యూర్ తగ్గించుకోవడం చేయొచ్చు. అయితే, హోమ్ లోన్ టెన్యూర్ తగ్గించుకోవడం ద్వారానే దీర్ఘకాలంలో భారీగా ఆదా చేసుకోవచ్చని నిపుణులు సూచిస్తున్నారు.
