ఏపీ–తెలంగాణ జల వివాద చర్చలపై సందిగ్ధత..
జలసౌధలో జరగాల్సిన కేఆర్ఎంబీ భేటీపై అనుమానాలు..
ఆంధ్రప్రదేశ్, తెలంగాణ రాష్ట్రాల మధ్య నీటి పంపకాల అంశంపై కీలకంగా భావిస్తున్న కృష్ణా నదీ యాజమాన్య బోర్డు (కేఆర్ఎంబీ) త్రిసభ్య కమిటీ సమావేశంపై అనిశ్చితి నెలకొంది. తాగునీటి అవసరాలపై చర్చించి నిర్ణయం తీసుకోవడానికి ఈ సమావేశాన్ని ఏర్పాటు చేసినప్పటికీ, తెలంగాణ ప్రభుత్వం మరోసారి తేదీ మార్పు కోరడంతో పరిస్థితి ఆసక్తికరంగా మారింది.
కేఆర్ఎంబీ అధికారులు రేపు ఉదయం 11 గంటలకు హైదరాబాద్లోని జలసౌధలో త్రిసభ్య కమిటీ సమావేశాన్ని నిర్వహించాలని నిర్ణయించారు. ఈ మేరకు ఈ నెల 8వ తేదీన ఆంధ్రప్రదేశ్, తెలంగాణ ప్రభుత్వాలకు సమాచారం పంపించారు. రెండు రాష్ట్రాల నీటి అవసరాలు, ప్రస్తుత పరిస్థితులు, విడుదలలపై చర్చించేందుకు ఈ భేటీ కీలకంగా భావిస్తున్నారు.
అయితే, ఈ సమావేశాన్ని ఈ నెల 14వ తేదీన నిర్వహించాలని తెలంగాణ ప్రభుత్వం గతంలోనే కోరింది. తాజాగా మరోసారి అదే తేదీకి సమావేశాన్ని వాయిదా వేయాలని విజ్ఞప్తి చేస్తూ తెలంగాణ ఈఎన్సీ రమేశ్ బాబు కేఆర్ఎంబీకి లేఖ రాశారు. దీంతో రేపటి సమావేశం జరుగుతుందా లేదా అనే అంశంపై స్పష్టత లేకుండా పోయింది.
ఇక వేసవి కాలంలో రెండు రాష్ట్రాల్లో తాగునీటి అవసరాలు పెరుగుతున్న నేపథ్యంలో, కృష్ణా జలాల వినియోగంపై తీసుకునే నిర్ణయాలు ప్రజలకు ఎంతో కీలకంగా మారాయి. ఈ నేపథ్యంలో కేఆర్ఎంబీ తుది నిర్ణయంపై అధికారులు, రైతులు, ప్రజలు ఆసక్తిగా ఎదురుచూస్తున్నారు.
