కువైట్ ప్రభుత్వం ఎనర్జీ డ్రింక్స్పై కఠిన నియంత్రణలు విధిస్తూ కీలక నిర్ణయం తీసుకుంది. కువైట్ ఆరోగ్య శాఖ మంత్రి డాక్టర్ అహ్మద్ అబ్దుల్వహాబ్ అల్ అవధీ ఉత్తర్వులు జారీ చేస్తూ, ఎనర్జీ డ్రింక్స్ విక్రయాలు, వినియోగంపై కొత్త నిబంధనలు అమల్లోకి తీసుకువచ్చారు. ఈ నిర్ణయం ప్రజారోగ్యాన్ని కాపాడడమే లక్ష్యంగా తీసుకున్నట్టు ప్రభుత్వం వెల్లడించింది.
కొత్త నిబంధనల ప్రకారం 18 ఏళ్లు నిండిన వారికి మాత్రమే ఎనర్జీ డ్రింక్స్ విక్రయించాలి. ఒక్క వ్యక్తి రోజుకు గరిష్టంగా రెండు క్యాన్లు మాత్రమే తాగేందుకు అనుమతి ఉంది. అలాగే ఒక్క క్యాన్లో 250 మిల్లీలీటర్లకు 80 మిల్లీగ్రాముల కంటే ఎక్కువ కాఫీన్ ఉండకూడదు అని స్పష్టం చేశారు. దీని ద్వారా యువత, పిల్లల ఆరోగ్యంపై ప్రతికూల ప్రభావాలు తగ్గించాలనే ఉద్దేశం ఉంది.
ఎనర్జీ డ్రింక్స్ ప్యాకేజింగ్పై స్పష్టమైన ఆరోగ్య హెచ్చరికలు తప్పనిసరిగా ముద్రించాలి అని ప్రభుత్వం ఆదేశించింది. అలాగే ఈ ఉత్పత్తులకు సంబంధించి ప్రకటనలు, స్పాన్సర్షిప్లు పూర్తిగా నిషేధించారు. టీవీ, సోషల్ మీడియా, ఇతర వేదికల్లో ప్రచారం చేయడానికి ఇకపై అనుమతి ఉండదు.
పాఠశాలలు, కళాశాలలు, యూనివర్సిటీలు సహా అన్ని ప్రభుత్వ, ప్రైవేట్ విద్యాసంస్థల్లో ఎనర్జీ డ్రింక్స్ విక్రయాలు పూర్తిగా నిషేధించబడ్డాయి. అంతేకాకుండా ప్రభుత్వ కార్యాలయాలు, రెస్టారెంట్లు, కేఫ్లు, కిరాణా దుకాణాలు, ఫుడ్ ట్రక్కులు, వెండింగ్ మెషీన్లు, ఆన్లైన్ డెలివరీ యాప్స్లో కూడా అమ్మకాలు చేయరాదని ఆదేశించారు.
అయితే ఎనర్జీ డ్రింక్స్ను కేవలం కోఆపరేటివ్ సొసైటీలు మరియు ప్రత్యేక మార్కెట్లలో మాత్రమే, అది కూడా నిర్దిష్ట విభాగాల్లో అమ్ముకోవచ్చని ప్రభుత్వం అనుమతి ఇచ్చింది. అక్కడ కూడా వయస్సు ధృవీకరణ, పరిమిత వినియోగ నిబంధనలు కచ్చితంగా పాటించాల్సి ఉంటుందని స్పష్టం చేసింది. ఈ నిర్ణయంతో కువైట్లో ప్రజారోగ్య భద్రత మరింత బలపడుతుందని అధికారులు ఆశాభావం వ్యక్తం చేశారు.
