తీర ప్రాంత నగరం విశాఖపట్నం డేటా సెంటర్లకు ప్రధాన కేంద్రంగా మారుతోంది. రాష్ట్ర ప్రభుత్వం విశాఖను గ్లోబల్ డేటా సెంటర్ హబ్గా తీర్చిదిద్దేందుకు తీసుకున్న నిర్ణయాలు ఇప్పుడు ఫలితాలు ఇస్తున్నాయి. కేవలం ఏడాది వ్యవధిలోనే అనేక పెద్ద కంపెనీలు ఏఐ ఆధారిత హైపర్ స్కేల్ డేటా సెంటర్లు ఏర్పాటు చేసేందుకు ముందుకు వచ్చాయి. అంతేకాకుండా, ఈ ప్రాజెక్టుల కోసం దేశీయ, అంతర్జాతీయ సంస్థలు కలిసి జాయింట్ వెంచర్లు ఏర్పాటు చేయడం విశాఖ ప్రాధాన్యతను మరింత పెంచుతోంది.
అదానీ గ్రూప్ విశాఖలో డేటా సెంటర్ నిర్మాణంలో ముందడుగు వేసిన తొలి సంస్థ. మధురవాడలో 170 ఎకరాల భూమిపై 300 మెగావాట్ల సామర్థ్యంతో డేటా సెంటర్ నిర్మించేందుకు రూ.16 వేల కోట్లు పెట్టుబడిగా ప్రకటించింది. ఈ ప్రాజెక్టుకు ఇటీవలే పర్యావరణ అనుమతులు లభించాయి. దీతో పాటు గూగుల్ కూడా అమెరికా వెలుపల అతి పెద్ద పెట్టుబడిగా రూ.1.35 లక్షల కోట్లతో ఒక గిగావాట్ సామర్థ్యంతో డేటా సెంటర్ స్థాపించాలని నిర్ణయించింది. అదానీ గ్రూప్తో కలిసి సబ్సీ కేబుల్ నిర్మాణానికి జాయింట్ వెంచర్ ఏర్పాటు చేసింది. వీరికి ప్రభుత్వం 580 ఎకరాలు కేటాయించింది.
ఇక తాజాగా రిలయన్స్ కంపెనీ కూడా ‘డిజిటల్ కనెక్షన్’ పేరుతో ఒక గిగావాట్ సామర్థ్యంతో డేటా సెంటర్ నిర్మించనున్నట్లు ప్రకటించింది. రిలయన్స్, బ్రూక్ఫీల్డ్, డిజిటల్ రియాల్టీ కలిసి ఈ ప్రాజెక్టును చేపడుతున్నారు. ఇందుకు ప్రభుత్వం 400 ఎకరాలు కేటాయించనుండగా, ఈ ప్రాజెక్టులో సుమారు రూ.98 వేల కోట్లు పెట్టుబడి పెట్టనున్నారు. అదేవిధంగా సిఫీ టెక్నాలజీస్ ఇటీవలే 550 మెగావాట్ల సామర్థ్యంతో డేటా సెంటర్ నిర్మాణానికి శంకుస్థాపన చేసింది. వీరికి ప్రభుత్వం 31.6 ఎకరాలకు అనుమతి ఇచ్చింది.
తెల్మన్ గ్లోబల్ హోల్డింగ్స్ కూడా 300 మెగావాట్ల సామర్థ్యంతో డేటా సెంటర్ నిర్మించేందుకు రూ.15 వేల కోట్ల పెట్టుబడితో ప్రభుత్వంతో ఒప్పందం కుదుర్చుకుంది. అదికాక, ఆస్ట్రేలియాకు చెందిన మరో పెద్ద కంపెనీ శ్రీకాకుళంలో 1.2 గిగావాట్ల డేటా సెంటర్ ఏర్పాటు చేయాలని ప్రతిపాదిస్తోంది. విశాఖలో కార్యాలయం ఏర్పాటు చేసే దిశగా భూముల అన్వేషణ జరుగుతోంది. ఎల్ అండ్ టీ కంపెనీ భారతదేశంలో ఐదు ప్రాంతాల్లో డేటా సెంటర్లను నిర్మించనున్నట్లు ప్రకటించగా, వాటిలో ఒకటి విశాఖలో ఉండనుంది.
ఇప్పటివరకు రాష్ట్ర ప్రభుత్వం ఆరు గిగావాట్ల డేటా సెంటర్ల స్థాపనను లక్ష్యంగా పెట్టుకోగా, కేవలం ఆరు నెలల్లోనే 3.65 గిగావాట్ల సామర్థ్యంతో ప్రాజెక్టులకు ఒప్పందాలు కుదిరాయి. మెటా కూడా విశాఖలో సబ్సీ కేబుల్ ల్యాండింగ్ స్టేషన్ ఏర్పాటుకు ఆసక్తి చూపుతుంది. దీంతో విశాఖ తూర్పు తీరంలో అతి పెద్ద సబ్సీ కేబుల్ ల్యాండింగ్ సెంటర్గా మారనుంది. అదనంగా, ఒక అమెరికన్ కంపెనీ విశాఖలో రెడీమేడ్ దుస్తుల పరిశ్రమ, జీసీసీ కేంద్రం ఏర్పాటు చేయడానికి ఆసక్తి చూపిస్తోంది. ఈ సంస్థ రూ.6 వేల కోట్ల పెట్టుబడి పెట్టడానికి సిద్ధమైంది.
