అమెరికా రాజధాని వాషింగ్టన్ డీసీ మళ్లీ ఆందోళనకు గురైంది. అత్యంత రక్షణ కలిగిన ప్రాంతాల్లో ఒకటైన వైట్ హౌస్ సమీపంలో జరిగిన కాల్పుల ఘటన ప్రపంచవ్యాప్తంగా చర్చనీయాంశమైంది. మధ్యాహ్నం సమయంలో జరిగిన ఈ దాడిలో వెస్ట్ వర్జీనియాకు చెందిన ఇద్దరు నేషనల్ గార్డ్ సభ్యులు తీవ్రంగా గాయపడగా దుండగుడిని పోలీసులు ఎదురుకాల్పుల్లో పట్టుకున్నారు.
దుండగుడు ఎవరు? దాడి ఎందుకు?
ప్రాథమిక సమాచారం ప్రకారం దాడి చేసిన వ్యక్తిని అధికారులు ఆఫ్ఘానిస్తాన్‌కు చెందిన వ్యక్తిగా గుర్తించారు. అతను ఏ ఉద్దేశ్యంతో సైనికులపై దాడి చేశాడన్నది ఇంకా స్పష్టంగా తెలియలేదు. అయితే నిఘా కెమెరాల్లో అతడు నేషనల్ గార్డ్ వైపు నేరుగా వెళ్లి కాల్పులు ప్రారంభించిన దృశ్యాలు గుర్తించడంతో FBI ప్రత్యేక విచారణను ప్రారంభించింది.
వైట్ హౌస్ పరిసరాల్లో అలర్ట్
సంఘటన జరిగిన వెంటనే ఫస్ట్ రెస్పాండర్లు చేరుకొని గాయపడిన సైనికులను ఆసుపత్రికి తరలించారు. వారి పరిస్థితి క్రిటికల్‌గా ఉన్నట్టు అధికారులు తెలిపారు. సోషల్ మీడియాలో వచ్చిన “సైనికులు మరణించారు” అనే వార్తలను ప్రభుత్వం ఖండించింది.
అత్యవసర పరిస్థితుల్లో భాగంగా వైట్ హౌస్, మెయిన్ ట్రెజరీ, ఫ్రీడ్‌మెన్స్ బ్యాంక్ వంటి కీలక భవనాలను తాత్కాలికంగా లాక్‌డౌన్ చేశారు. సీక్రెట్ సర్వీస్, FBI, ATF సహా అనేక ఫెడరల్ దళాలు పరిసర ప్రాంతాలను పూర్తిగా దిగ్బంధించాయి.
దాడి జరిగిన ప్రాంతం రీగన్ వాషింగ్టన్ నేషనల్ ఎయిర్‌పోర్ట్ రన్‌వేతో దగ్గరగా ఉండడంతో FAA తాత్కాలికంగా విమాన రాకపోకలను నిలిపివేసింది. కొద్దిసేపటికే పరిస్థితి అదుపులోకి రావడంతో సేవలను పునరుద్ధరించారు.
ట్రంప్ తీవ్రమైన వ్యాఖ్యలు
థాంక్స్‌గివింగ్ సందర్భంగా ఫ్లోరిడాలో ఉన్న అధ్యక్షుడు డొనాల్డ్ ట్రంప్ ఈ దాడిని తీవ్రంగా ఖండించారు.మన దేశాన్ని కాపాడే గార్డ్ సభ్యులపై దాడి చేసిన ఆ వ్యక్తి మూల్యం తప్పకుండా చెల్లించాలి. దేవుడు మన సైన్యాన్ని రక్షించుగాక అని ఆయన ప్రకటించారు.అంతేకాక, భద్రతను మరింత బలోపేతం చేయడానికి అదనంగా 500 నేషనల్ గార్డ్ సిబ్బందిని వాషింగ్టన్‌కు పంపాలని ట్రంప్ పరిపాలన ఆదేశించింది. మాజీ అధ్యక్షుడు జో బైడెన్ కూడా ఈ దాడిని ఖండించారు.
డీసీలో ఇప్పటికే హెవీ డిప్లాయ్‌మెంట్ గమనించాల్సిన విషయం ఏమిటంటే గత ఆగస్టులో ట్రంప్ స్థానిక పోలీసులను ఫెడరలైజ్ చేస్తూ అత్యవసర ఉత్తర్వులు జారీ చేసిన నేపథ్యంలో డీసీలో ఇప్పటికే అనేక రాష్ట్రాల నుండి నేషనల్ గార్డ్ దళాలు మోహరించబడ్డాయి. చెక్‌పాయింట్లు పహారాలు, పబ్లిక్ ఈవెంట్ల భద్రత వంటి కీలక పనులను ఈ దళాలు నిర్వహిస్తున్నాయి.
ఇప్పుడు జరిగిన ఈ కాల్పుల తర్వాత అమెరికా అంతటా ఫెడరల్ భవనాలు, రవాణా కేంద్రాల్లో భద్రతను మరింత పెంచడం ప్రారంభించారు. ప్రత్యేకంగా నేషనల్ గార్డ్ స్థావరాల వద్ద అదనపు సెక్యూరిటీ అమలు చేస్తున్నారు.
