Custodial Torture Case: రఘురామ కేసులో విచారణకు హాజరైన ఐపీఎస్ అధికారి సునీల్‌ నాయక్ ..!

Custodial Torture Case: డిప్యూటీ  స్పీకర్  రఘురామకృష్ణరాజు కస్టోడియల్ టార్చర్ కేసులో విచారణ కీలక దశకు చేరుకుంది. హైకోర్టు ఆదేశాల మేరకు ఐపీఎస్ అధికారి సునీల్ నాయక్ సోమవారం గుంటూరులోని సీసీఎస్ (CCS) పోలీస్ స్టేషన్‌లో విచారణాధికారి ముందు హాజరయ్యారు. ఈ కేసులో ఆరోపణలు ఎదుర్కొంటున్న ఆయనను విచారణాధికారి, ఎస్పీ దామోదర్ మరోసారి సుదీర్ఘంగా ప్రశ్నిస్తున్నారు. గతంలో జరిగిన విచారణలో కొన్ని అంశాలపై స్పష్టత రాకపోవడంతో, తాజా విచారణ ప్రాధాన్యత సంతరించుకుంది.

గత విచారణ వివరాల్లోకి వెళ్తే, హైకోర్టు ఉత్తర్వుల ప్రకారం ఈ నెల 5వ తేదీ నుంచి 11వ తేదీ వరకు సునీల్ నాయక్ వరుసగా ఏడు రోజుల పాటు విచారణకు హాజరయ్యారు. ఆ సమయంలో ఎస్పీ దామోదర్ ఈ కేసులోని వివిధ కోణాలపై ఆయన్ను ప్రశ్నించారు. అయితే, ఈ నెల 12వ తేదీన కూడా విచారణకు రావాల్సి ఉండగా, కొన్ని వ్యక్తిగత కారణాల వల్ల ఆయన హాజరుకాలేదు. తన తల్లి అనారోగ్యంతో బాధపడుతున్నారని, ఆమెను చూసేందుకు పట్నా వెళ్లాల్సి ఉందని ఆయన కోర్టును ఆశ్రయించారు.

సునీల్ నాయక్ విన్నపాన్ని పరిశీలించిన హైకోర్టు, మానవీయ కోణంలో ఆయనకు పట్నా వెళ్లేందుకు అనుమతిని ఇచ్చింది. అయితే, విచారణకు ఆటంకం కలగకూడదన్న ఉద్దేశంతో మార్చి 23వ తేదీన (ఈరోజు) కచ్చితంగా విచారణాధికారి ముందు హాజరుకావాలని స్పష్టమైన ఆదేశాలు జారీ చేసింది. కోర్టు ఆదేశాలను పాటిస్తూ ఆయన నేడు గుంటూరు చేరుకుని పోలీసుల ఎదుట విచారణకు నిలబడ్డారు. రఘురామ అరెస్ట్ సమయంలో జరిగిన పరిణామాలు, పోలీసుల పాత్రపై అధికారులు ఆయన్ను నిలదీస్తున్నట్లు తెలుస్తోంది.

ఈ కేసులో ఇప్పటివరకు జరిగిన విచారణపై పోలీసు వర్గాల్లో భిన్నమైన అభిప్రాయాలు వ్యక్తమవుతున్నాయి. సునీల్ నాయక్ విచారణకు హాజరవుతున్నప్పటికీ, పోలీసుల ప్రశ్నలకు ఆయన సరిగ్గా సమాధానాలు చెప్పడం లేదని, దర్యాప్తుకు పూర్తిగా సహకరించడం లేదని సమాచారం. కీలకమైన ఆధారాలు  ఘటన జరిగిన సమయంలో ఉన్న పరిస్థితులపై ఆయన మౌనం వహించడం లేదా పొంతన లేని సమాధానాలు చెప్పడం విచారణాధికారులకు సవాలుగా మారింది.

ప్రస్తుతం జరుగుతున్న ఈ విచారణలోనైనా ఆయన నోరు విప్పుతారా లేదా అన్నది వేచి చూడాలి. రఘురామ కస్టోడియల్ టార్చర్ కేసు రాష్ట్ర రాజకీయాల్లో  పోలీస్ శాఖలో పెద్ద దుమారమే రేపింది. ఈ కేసులో బాధ్యులైన వారిని పట్టుకునేందుకు దర్యాప్తు బృందం అన్ని కోణాల్లో ఆధారాలను సేకరిస్తోంది. నేటి విచారణ ముగిసిన తర్వాత పోలీసులు ఈ కేసులో తదుపరి చర్యలు ఏ విధంగా ఉంటాయన్న దానిపై ఒక ప్రక్రియను సిద్ధం చేసే అవకాశం ఉంది.