ఆంధ్రప్రదేశ్ ప్రభుత్వం పాలనలో సాంకేతికత వినియోగాన్ని మరింత విస్తరిస్తోంది. పౌర సేవలను వేగంగా, పారదర్శకంగా ప్రజలకు అందించేందుకు ఏపీ ప్రభుత్వం ఇప్పటికే మనమిత్ర వాట్సాప్ గవర్నెన్స్, స్మార్ట్ రేషన్ కార్డులు వంటి వినూత్న విధానాలను అమలు చేస్తోంది. ఈ దిశలోనే రాష్ట్ర వ్యాప్తంగా ప్రతి కుటుంబాన్ని ఒకే వేదికపైకి తీసుకురావడానికి ‘స్మార్ట్ ఫ్యామిలీ కార్డులు’ అనే విప్లవాత్మక కార్యక్రమాన్ని ప్రారంభించేందుకు సీఎం నారా చంద్రబాబు నాయుడు నిర్ణయించారు. 2026 జూన్ నాటికి రాష్ట్రంలోని ప్రతి కుటుంబానికి ఈ కార్డులు అందేలా చర్యలు తీసుకోవాలని ఆయన అధికారులకు ఆదేశించారు.
స్మార్ట్ ఫ్యామిలీ కార్డుల ప్రధాన ఉద్దేశం ప్రతి కుటుంబాన్ని ఒక యూనిట్‌గా తీసుకుని, వారికి సంబంధించిన వివిధ ప్రభుత్వ డేటాను ఒకే చోట సమగ్రంగా అందుబాటులో ఉంచడం. ఈ కార్డుల్లో క్యూఆర్ కోడ్ అమర్చబడుతుంది. దాన్ని స్కాన్ చేస్తే ఆ కుటుంబానికి సంబంధించిన అన్ని కీలక వివరాలు, ప్రభుత్వం అందిస్తున్న పథకాలు, పౌరసేవలు, వెల్ఫేర్ బెనిఫిట్స్ వంటి సమాచారం వెంటనే లభిస్తుంది. రాష్ట్రంలోని కోటి 40 లక్షల కుటుంబాలకు ఈ కార్డులను అందించేందుకు ప్రత్యేకంగా ‘ఫ్యామిలీ బినిఫిట్ మేనేజ్‌మెంట్ సిస్టమ్ (FBMS)’ను రూపొందిస్తున్నారు.
ఈ స్మార్ట్ ఫ్యామిలీ కార్డులు కేవలం ఒక గుర్తింపు పత్రం కాదు; అవి పౌరుల డిజిటల్ ప్రొఫైల్‌లాంటివి. కుల ధ్రువీకరణ పత్రాలు, రేషన్ కార్డు సేవలు, పింఛను వివరాలు, స్కాలర్‌షిప్‌లు, ఆధార్ సమాచారం, వ్యాక్సినేషన్ రికార్డులు — ప్రజలకు అవసరమైన ప్రతి సేవను ఒకే చోట చూడగలుగేలా ఈ వ్యవస్థను తీర్చిదిద్దుతున్నారు. దీంతో ప్రభుత్వ శాఖల మధ్య సమాచార మార్పిడి వేగవంతమవుతుంది. ప్రజలు ఎక్కడికైనా వెళ్లి అర్జీలు పెట్టుకోవాల్సిన తంటాలు తగ్గిపోతాయి.
స్మార్ట్ ఫ్యామిలీ కార్డుల ద్వారా ప్రభుత్వం పథకాల అమలులో పారదర్శకత, ఖచ్చితత్వాన్ని పెంచుకోవచ్చు. అర్హులైన వారికి సరైన సమయంలోనే బెనిఫిట్స్ అందేలా పర్యవేక్షించవచ్చు. ఫ్యామిలీ బెనిఫిట్ మేనేజ్‌మెంట్ సిస్టమ్‌తో రాష్ట్రవ్యాప్తంగా ఉన్న కుటుంబాల డేటా ఆటోమేటిక్‌గా అప్‌డేట్ అవుతుండడంతో, ప్రభుత్వ సంక్షేమ పథకాల పంపిణీ మరింత సమర్థవంతంగా మారుతుంది. స్వర్ణాంధ్ర విజన్ యూనిట్లు ఈ ప్రక్రియను గ్రామ, వార్డు స్థాయిలో ముందుకు తీసుకెళ్లనున్నాయి. మొత్తం మీద, ఏపీ ప్రభుత్వం తీసుకున్న ఈ స్మార్ట్ ఫ్యామిలీ కార్డుల నిర్ణయం డిజిటల్ గవర్నెన్స్‌లో మరో పెద్ద అడుగుగా చెప్పవచ్చు.
