అమెరికా విధించిన టారిఫ్‌లకు ప్రతిస్పందనగా భారత్ ఒక కీలక నిర్ణయం తీసుకుంది. అమెరికా నుంచి కొనుగోలు చేయాల్సిన $3.6 బిలియన్ల విలువైన బోయింగ్ P-8I జెట్ల ఒప్పందాన్ని తాత్కాలికంగా నిలిపివేసింది. ఈ నిర్ణయం రక్షణ రంగంలో రెండు దేశాల మధ్య కొనసాగుతున్న సహకారంపై ప్రభావం చూపనుంది.
2021లో భారత్-అమెరికా మధ్య 6 P-8I జెట్ల కొనుగోలు కోసం $2.42 బిలియన్ల ఒప్పందం కుదిరింది. ఈ జెట్లు సముద్ర భద్రత, పర్యవేక్షణ, శత్రు సబ్‌మరైన్ల గుర్తింపులో కీలక పాత్ర పోషిస్తాయి. భారత నౌకాదళానికి వీటి అవసరం అధికంగా ఉంటుంది.
అయితే ఈ జెట్ల తయారీలో ఉపయోగించే కొన్ని ముఖ్యమైన ముడి సరుకులు భారత్ నుంచే అమెరికాకు ఎగుమతి అవుతాయి. తాజాగా ట్రంప్ ప్రభుత్వం భారతపై భారీ సుంకాలు విధించడంతో, ఆ ముడి సరుకుల ధరలు పెరిగాయి. దీనివల్ల తయారీ ఖర్చులు కూడా పెరిగిపోయాయి.
మొదట ఒప్పందం కుదిరినప్పుడు ఈ డీల్ విలువ $2.42 బిలియన్లు మాత్రమే. కానీ ఇప్పుడు సుంకాల ప్రభావంతో మొత్తం వ్యయం దాదాపు 50% పెరిగి, $3.6 బిలియన్లకు చేరింది. ఈ పెరుగుదల భారత్‌కు ఆర్థిక భారం అవుతుందని భావించి, కేంద్ర ప్రభుత్వం డీల్‌ను నిలిపివేసింది.
రక్షణ నిపుణుల అభిప్రాయం ప్రకారం, ఈ నిర్ణయం తాత్కాలికమే అయ్యే అవకాశం ఉంది. టారిఫ్‌ల సమస్య పరిష్కారం కాని పక్షంలో, రెండు దేశాల మధ్య రక్షణ కొనుగోలు ఒప్పందాలు ఆలస్యమవుతాయని వారు హెచ్చరిస్తున్నారు.
ఈ పరిణామం భారత్-అమెరికా వ్యాపార సంబంధాలపై కూడా ప్రతికూల ప్రభావం చూపవచ్చు. ఇప్పటికే అనేక వాణిజ్య రంగాల్లో ఇరుదేశాల మధ్య ఉద్రిక్తతలు నెలకొన్నాయి. రాబోయే నెలల్లో ఈ సమస్యకు పరిష్కారం కనుగొనగలిగితేనే డీల్ మళ్లీ ప్రారంభమయ్యే అవకాశం ఉంటుంది.
